Read Sayula Popoluca 1 Tesalonicenses 4 Bible Online

1 Tesalonicenses 4 - Sayula Popoluca bible

1 Tesalonicenses 4

¹Jinap hermanujat, como tʉs̈ajyu'tcau el Señor Jesús, tʉyo'tcajap mit tʉtsawigap pi yo'yga as̈am tʉ-ajque's̈cajaj pa is̈watcawa'n lo que Dios iwampay. Mit we'n is̈wátca po cuji'cs̈iga más pa inyo'ygawa'n más oy.

²Ni'c injawigap nat tʉmandá̱tcaj mijchat as̈am tʉs̈manda̱tcawey el Señor Jesús.

³Mit ayʉ̱́j ayé lo que Dios iwampay, iwamp pi yo'yga limpiu, mit camchajyo'yga.

⁴Ni'c cada jayau ma pensa̱t iguirespeta̱twa'n ito's̈ay, caje' pa iguichajyo'jyawa'n.

⁵Pigawánga ma̱jlat iyo'tpay injo̱jtat as̈am iguiwátca ayé jayajwat cacupʉjcapay ni'c je'jat iga-is̈capcap Dios.

⁶Nepʉn magawajta mal ihermanu ne magawe̱t en ayʉ̱́j asuntu tʉnʉmgajaway. Tʉ-ajque's̈cajau ni'c el Señor icastiga̱táj nu'pʉjʉn iwatcapay ayé ma̱jlat.

⁷Ni'c Dios nas̈ya̱s̈cau pa nayo'ygawa'n limpiu, caje' pa nas̈watcawa'n mal.

⁸Jeme imalninʉmpay ayʉ̱́j tʉnajque's̈pay, ʉjtsat tʉs̈camalninʉmgap, solo imalninʉmp Dios jeme nas̈moygapay Espíritu Santu.

⁹Mit ca-itp ti tʉnʉmgʉs̈awa'n más pa inyiwangʉjʉwa'n, ni'c Dios is̈actujawigaway pi niwangʉjʉ minu'pʉjʉjnat.

¹⁰Mit we'n is̈wátca ni'c inwangap nu'pʉjʉn hermanujat tsʉ̱ngapay nu'pʉjʉn laj Macedoniajway na̱s̈. Hermanujat, tʉtsawigap pi niwangʉjʉ más.

¹¹Che'nga pa intsʉ̱ngawa'n tranquilu. Cada jayau ma wat iyos̈, mit yos̈wátca as̈am tʉmandá̱tcaj.

¹²Mit we'n miyo'ygáj yacs̈ic mam is̈-e'pcáj jayajwat cacupʉjcapay, mit we'n is̈catogoygáj neti.

¹³Hermanujat, tʉnwamp pi jawiga nat ijatcawa'n ayé jeme o'guijcatway, magatu'nga injo̱jtat as̈am japu̱t jayajwat jeme iga-atsʉ̱ngapay vida cacʉs̈ámpay.

¹⁴Mit como nacupʉjcap ni'c Jesús o'c mit jutucta̱c, wename-ey nacupʉjcap ni'c Dios i-acjutucta̱jcʉs̈áj ayé cupʉcpajyat jeme o'jcaway, as̈am igui-acjutucta̱jc Jesús.

¹⁵Tʉnʉmgajap lo que inʉmway el Señor, ni'c ʉjtsat jeme natangámpay nijutuc imi'nwa'n el Señor Jesús, naganʉs̈cáj jʉpm de ayé cupʉcpajyat jeme o'guijcatway.

¹⁶Ni'c nije'yu el Señor Jesús managáj tsajpni'c mit cotsáj as̈am tu'c manda̱tpay, mit cotsáj mʉgʉc tu'c mʉjway ángel, mit Dios i-acya's̈áj trompeta. Mit o'guijcatway jeme icupʉjcaway Cristu jutucta̱jcʉ'jcáj.

¹⁷Cʉs̈wa'n ʉjtsat natangámpay nijutuc, Dios nas̈munʉs̈cáj tuwitic mit je'jat pa wintucjugum pa nas̈munipa̱tcʉjʉwa'n el Señor Jesús es̈pu̱t tsajp. Mit natsʉ̱ngáj pa siempre mit el Señor Jesús.

¹⁸Mit jemni'c tʉnʉ́mgajaj ayʉ̱́j cosajat, pa pi ni-animá̱tcʉjʉ más.