Read Sayula Popoluca 1 Tesalonicenses 5 Bible Online

1 Tesalonicenses 5 - Sayula Popoluca bible

1 Tesalonicenses 5

¹Hermanujat, ca-itp ti tʉja'ygʉs̈awa'n ti tiempu o ti s̈ʉjw imi'nwa'n Jesús.

²Ni'c bien is̈jawiga ni'c icojawa'n ayé s̈ʉjw itumi'námpay el Señor Jesús, mi'náj de repente as̈am tu'c nu'mpay imi'n tsu'm.

³Iguinʉmgawa'n ni'c itp paz mit cajatáj neti, cʉs̈wa'n itunas̈cáj de repente mit tu'c pʉ̱tna̱s̈. Iguijatcáj as̈am tu'c to's̈ay de repentejyu iguipʉcta̱cp itinchay pa ita'cwa'n, mit ca-oyáj ipo'jca.

⁴Po hermanujat, mijchat migatsʉ̱ngap as̈am jayajwat cacupʉjcapay. Ayé s̈ʉjw is̈camingajáj de repente as̈am tu'c nu'mpay imi'n tsu'm.

⁵Ni'c nu'pʉjʉn mijchat miyo'ygap Dios iluzni'c mit mitsʉ̱ngáj oy en ayé s̈ʉjw imi'nwa'n Jesús, ni'c ingawatcap mal as̈am jayajwat cacupʉjcapay, ni'c je'jat as̈am jeme yo'ygapay tsu'm chitimicni'c.

⁶Jemni'c nagama̱gawit as̈am japu̱jtat, po natsʉ̱́nga prepara̱tic mit siempre nagawatcadá̱jca neti.

⁷Ni'c jeme ma̱gapay, ma̱gap tsu'm. Mit jeme mu̱jcʉjʉpay, mu̱jcʉjʉp tsu'm.

⁸Po ʉjtsat nayo'ygapay s̈ʉ̱m, siempre natsʉ̱́nga prepara̱tic. Nacupʉ́jca mit naniwángʉjʉ ni'c yename natsʉ̱ngáj oy as̈am tu'c soldaj tsʉ̱napay bien arma̱tic. Mit na-atsʉ̱ngap nas̈salva̱tcáj Dios ni'c yename natsʉ̱ngámpey oy as̈am tu'c soldaj jeme icompay ipus̈ancumo'n.

⁹Ni'c Dios nas̈caya̱s̈cawu pa nas̈condena̱tcáj. Je' iwamp nanisalva̱tcʉjʉwa'n, mit i-acmin el Señor Jesucristu pa nas̈salva̱tcáj.

¹⁰Mit je' o'c pa ʉjtsat, mit te natsʉ̱ngap o te na-o'jcap, najawigap ni'c je' o'c pa natsʉ̱ngawa'n tuwitic mit je' pa siempre.

¹¹Jemni'c ni-animá̱tcʉjʉ minu'pʉjʉjnat mit nimájyigʉjʉ pa incupʉjcawa'n más, ni'c yename is̈watí̱jca.

¹²Hermanujat, tʉnʉmgajap pi respeta̱tca ayé jayajwat jeme yos̈watcapay mit mijchat. Je'jat is̈cuida̱tcap mit is̈tsawigap mijchat inmutʉgʉygaway el Señor.

¹³Respetá̱tca may mit wanga ayé jayajwat ni'c oy lo que iwatcapay. Tsʉ̱́nga en paz minu'pʉjʉjnat.

¹⁴Hermanujat, tʉnʉmgajapey pi tsawiga jeme candʉ'jnatway pa iyos̈watcawa'n, pi anima̱tca jeme yo'ygapay desanima̱tic, pi majyiga jeme cacupʉjcapay oy, pi aguepca calma mit nu'pʉjʉn jayajwat.

¹⁵Nicuidá̱tcʉjʉ pigawatcaja mal jeme is̈watcajapay mal. Po siguiá̱tca is̈watcawa'n oy minu'pʉjʉjnat, mit watí̱jcaja oy nu'pʉjʉn jayajwat.

¹⁶Ma ji'c siempre injo̱jtat.

¹⁷Ora̱tí̱jca siempre.

¹⁸Nʉmí̱jcaja Dios ni'ctiyu̱s̈ pa nu'pʉjʉn cosa, ni'c jemé ayé Dios iwampay nawátca ni'c nacupʉjcap Cristu Jesús.

¹⁹Camatújca lo que iwatámpay Espíritu Santu.

²⁰Cammalninʉmga ayé jayajwat jeme i-ajque's̈cajapay Dios ipalabra.

²¹Probá̱tca te oy nu'pʉjʉn i-ajque's̈capay, mit pʉctsóuga jeme oyway.

²²Niju'ptángʉjʉ de nu'pʉjʉn mal.

²³Mit ayé Dios nas̈moygapay paz pi is̈limpia̱tcajac nu'pʉjʉn mal, pi is̈cuida̱tcajac nu'pʉjʉn, in-espíritu imvida mit incuerpu, pa nepʉn ma is̈caculpa̱tcac hasta ayé s̈ʉjw imi'nwa'n el Señor Jesucristu.

²⁴Dios icumplia̱tp mit je' nas̈ya̱s̈cau. Mit je' nas̈actuwatcáj nu'pʉjʉn ayʉ̱́j cosa oyway.

²⁵Hermanujat, orá̱tcaja Dios pa ʉjtsat.

²⁶Saludá̱tca nu'pʉjʉn hermanujat mit tu'c ame'tamuc ni'c miniwangʉjʉp.

²⁷Tʉmanda̱tp el Señor inʉ'jyni'c pi cotscaja ayʉ̱́j noc pa ma marauga nu'pʉjʉn cupʉcpajyat.

²⁸Pi is̈moygac favor el Señor Jesucristu pa mijchat minu'pʉjʉjnat. Amén.