Read Sayula Popoluca 2 Tesalonicenses 1 Bible Online

2 Tesalonicenses 1 - Sayula Popoluca bible

2 Tesalonicenses 1

¹Ʉ̱ Pablo, Silvano mit Timoteo tʉnsaluda̱tcap cupʉcpajyat jeme tsʉ̱ngapay nʉ'jcopac Tesalónica. Mijchat inmutʉgʉygau Dios Nate̱jat mit el Señor Jesucristu.

²Dios Nate̱jat mit el Señor Jesucristu pi is̈moygac favor mit paz.

³Hermanujat, itp ti tʉs̈nʉmi̱jcajawa'n Dios ni'ctiyu̱s̈ por mijchat. Mit oy tʉs̈nʉmgajawa'n we'n ni'c micupʉjcap más mit miniwangʉjʉp más minu'pʉjʉjnat.

⁴Jemni'c tʉ-oyninʉmgap mijchat jʉmba'tu mam itsʉ̱nga Dios ijayajwat, ni'c inmajmoygap pruebajat mit micupʉjcap maja is̈po'ctangámpaj maljayajwat, mit inmajmoygap cuandu is̈tunas̈ca.

⁵Inmajmoygap is̈tunas̈ca pa pi jawiga ni'c Dios yacs̈ic iguiwat nu'pʉjʉn, ni'c je' inʉmp ni'c is̈merecia̱tcap intʉgʉygawa'n mam Dios imanda̱t, mit jemni'c is̈tunas̈ca.

⁶Ni'c Dios iwatp yacs̈ic pa igui-actunas̈cʉs̈wa'n jeme jinap is̈actunas̈capay.

⁷Mit mijchat intunas̈capay Dios is̈acpo'cs̈cáj tuwitic mit ʉjtsat en ayé s̈ʉjw imi'nwa'n el Señor Jesús tsajpni'c. Je' mi'náj mit ayé ángejlat jeme itcʉjʉpay maj, mit mingáj as̈am jʉn-ádatsic.

⁸Mit i-actutso̱jcʉs̈áj maljayajwat jeme igawatcaway cuenta Dios, ne igajayaumaygawu lo que inʉmpay i-oyway noticia el Señor Jesucristu.

⁹Mit Dios i-actutso̱jcʉs̈áj ayé jayajwat pa nu'pʉjʉn tiempu, mit tsʉ̱ngáj togoyic. Je'jat iga-e'pcáj mam el Señor itsʉ̱nawa'n oymanac mit may poder.

¹⁰Mit en ayé s̈ʉjw imi'nwa'n el Señor, iguimʉjninʉmgáj ijayajwat, mit nu'pʉjʉn cupʉcpajyat igui-e'pcáj ni'c je' mʉjninʉmic. Mit in-e'pcáj je' ni'c incupʉjcau lo que tʉnʉmgajaway.

¹¹Tʉ-ora̱tí̱jcajap mijchat pi yo'yga oy pa Dios ma nʉm ni'c caje' jalmanu is̈cupiugau. Inwangap is̈watcawa'n oy mit miyos̈wato'jcap ni'c micupʉjcap, mit jemni'c tʉnyo'jtap Dios pi is̈actuwatcac ayé cosa ojyatway, mit je' is̈moygáj maj.

¹²Te inwatcap we'n, nu'pʉjʉn i-oyninʉmgáj el Señor Jesucristu ni'c inyajcap oyway ejemplu, mit je' is̈-oyninʉmgámpey mijchat. Jatáj we'n ni'c nas̈moygap favor Dios mit el Señor Jesucristu.