Read Sayula Popoluca 2 Tesalonicenses 2 Bible Online

2 Tesalonicenses 2 - Sayula Popoluca bible

2 Tesalonicenses 2

¹Hermanujat, mi'náj el Señor Jesucristu, mit en ayé s̈ʉjw nani-apʉcmujcʉjʉ̱́j mit je'.

²Po tʉnʉmgajap camtʉ'tscupʉ́jcayu jaran ne campensa̱tca te inʉmgap ni'c coynup ayé s̈ʉjw itumi'námpay el Señor. Camcupʉjca jeme inʉmámpay we'n, ne jeme i-acotstujcapay tiempu, ne jeme anuncia̱tcapay, ne camcupʉjca-ey tu'c noc jeme inʉmgámpay ni'c ʉjtsat tʉnja'ygau.

³Nes̈ʉ̱n cammoyga laj is̈we̱tcáj nepʉn, ni'c itáj ti imijnʉ'cwa'n tu'c mal tiempu ni'c jayajwat imutsuguinwatcáj Dios, mit que's̈ta̱jcʉ'gáj Cristu imutsuguin, jeme nʉmicway pa itogoywa'n.

⁴Mit je' ca's̈ʉ'gáj mit imutsuguinwatáj Dios mit we'ney nu'pʉjʉn cosa inʉmgapay ni'c diosat, mit igawa'náj nu'pʉjʉn cosa na-adora̱tpay. Mit je' nitsʉ̱nda̱jcʉ̱́j en ayé laj mam igui-adorá̱tca Dios, mit je' niwajtʉ̱́j as̈am Dios.

⁵¿Inganijawigap ni'c we'n tʉnʉmgʉ́s̈aj cuandu tʉtsʉ̱́naj mit mijchat?

⁶Mit injawigap ti ayé igui-atucpay ayé maljayau pa magami'n jaran. Mit que's̈ta'gáj po hasta iguicojyáj itiempu.

⁷Ni'c yos̈watnup anu'mu Cristu imutsuguin, po i-atsʉ̱nap hasta ipichinwa'n ayé jeme jinap igui-atucpay.

⁸Cʉs̈wa'n que's̈ta'gáj Cristu imutsuguin, po ique's̈ta'cwa'n oymanac el Señor, i-actogoyáj jaran mit ipalabra jeme ijtʉpay maj, mit itu'mbajcʉs̈áj jaran ayé maljayau.

⁹Cristu imutsuguin mi'náj ni'c iguimo'áj poder Awayagatsna'. Mit ijtʉ̱́j may poder, mit iwatáj milagrujat mit i-acnigu-epigʉs̈ʉ̱́j jayajwat pa iguiwe̱jta̱jcʉs̈wa'n.

¹⁰Mit icomgʉs̈áj nu'pʉjʉn we̱t ma̱lway pa jeme togoygámpay ni'c ayé jayajwat igawangawu lo que iyacs̈ta'cway pa inisalva̱tcʉjʉwa'n.

¹¹Jemni'c Dios imoygʉs̈p laj ma niwe̱tcʉjʉ, pa más macupʉjca ayé we̱t,

¹²pa ma tsʉ̱nga condena̱tijcat nu'pʉjʉn jeme igacupʉjcaway lo que iyacs̈ta'cway, ni'c más iwangau nu'pʉjʉn ma̱jlat.

¹³Hermanujat, is̈wangap el Señor, mit ʉjtsat itp ti tʉs̈nʉmi̱jcajawa'n Dios ni'ctiyu̱s̈ por mijchat ni'c Dios is̈cupiugau desde ámbanu pa pi nisalva̱tcʉjʉ ni'c is̈limpia̱tcau Espíritu Santu mit ni'c incupʉjcawey lo que iyacs̈ta'cway.

¹⁴Mit Dios is̈ya̱s̈cau ni'c incupʉjcau ayé oyway noticia tʉnʉmgajaway, mit is̈ya̱s̈cawey pa is̈aguepcawa'n parte mit el Señor Jesucristu mam jinap itsʉ̱na mʉjninʉmic.

¹⁵Hermanujat, jemni'c pi siguia̱tca mʉgʉc, mit mutánga ayé ama̱s̈an tʉ-ajque's̈cajaway, te tʉnʉmgajap o te tʉja'ygajap nocni'c.

¹⁶Mit el Señor Jesucristu mit Dios Nate̱jat nas̈wangap, nas̈consola̱tcap pa siempre, mit nas̈actu-atsʉ̱ngap tu'c cosa oyway ni'c nas̈moygau favor,

¹⁷pi is̈-animá̱tcac, pi is̈moygac maj injo̱tni'jcat pa is̈nʉmgawa'n nu'pʉjʉn cosa oyway mit pa is̈watcawa'n nu'pʉjʉn cosa oyway.