Read Sayula Popoluca 2 Tesalonicenses 3 Bible Online

2 Tesalonicenses 3 - Sayula Popoluca bible

2 Tesalonicenses 3

¹Mit jinap, hermanujat, orá̱tca pa ʉjtsat pa tʉnʉmdacyo'yga jʉmgapa'tu el Señor ipalabra pa ma pʉctsouga oy as̈am mijchat is̈pʉctsóugaj.

²Orá̱tca-ey pa Dios ma tʉs̈libra̱tcac mam i-it jayajwat ma̱lo'jcatway, ni'c caje' nu'pʉjʉn jayajwat icupʉjcap Dios iyacs̈ta'cway.

³Mit el Señor Dios icumplia̱tp, mit je' is̈moygáj maj, mit je' is̈cuida̱tcáj mam i-it ma̱jlat.

⁴Tʉconfia̱tcap mit mijchat ni'c nacupʉjcap el Señor, ni'c inwatcap as̈am tʉmandá̱tcaj, mit siguia̱táj is̈wátca.

⁵Mit el Señor pi is̈actujawigac injo̱tni'jcat ni'c je' is̈wangap, mit is̈actumajmoygámpey nu'pʉjʉn pruebajat as̈am Cristu iguimajmojy.

⁶Hermanujat, tʉmanda̱tcap mijchat as̈am el Señor Jesucristu tʉs̈manda̱tcau ʉjtsat, pigamunipʉjcʉjʉ tu'c hermanu candʉ'nway pa iyos̈watwa'n, ne igasiguia̱jtap lo que tʉ-ajque's̈cajaway.

⁷Mijchat injawigap ni'c itp ti is̈watcawa'n as̈am ʉjtsat tʉs̈wátcaj, ni'c cuandu tʉtsʉ̱́ngaj mit mijchat, tʉgacandʉ'nwatcawu.

⁸Tʉgacaygawu nejʉm we'nu, po tsu'm mit s̈ʉ̱m tʉyos̈watcau mʉgʉc hasta cʉs̈ tʉnjo̱jtat pa pigatunas̈ca is̈mantenia̱tcáj.

⁹Mit tʉnaguepcapate derechu is̈mantenia̱tcáj, po tʉyos̈watcau pa tʉyajcajawa'n ejemplu pa pi watca as̈am ʉjtsat tʉs̈wátcaj.

¹⁰Ni'c cuandu tʉtsʉ̱́ngaj mit mijchat tʉnʉmgajau ni'c te tu'c jayau igawamp iyos̈watwa'n, magacay.

¹¹Tʉnmaraugap ni'c cʉjtu'c jayajwat mam mijchat candʉ'jnat pa iyos̈watcawa'n, solo itunitʉgʉygʉjʉp jayje'.

¹²Mit as̈am ayé jayajwat tʉnmanda̱tcap mit tʉntsawigap as̈am tʉs̈manda̱tcau el Señor Jesucristu, ni'c ma yos̈watca tranquilu je'jat iyos̈ni'jcat pa icaygawa'n.

¹³Mit mijchat, hermanujat, camyajca is̈watcawa'n oy.

¹⁴Te tu'c jayau igamarap lo que tʉnyʉmgapay nocni'c, ajcuque's̈ca ayé jayau mit cammunipʉ́jcʉjʉ je' pa ma winchu̱ga.

¹⁵Po inga-e'pcáj je' as̈am inmutsuguijnat, po intsawigáj as̈am tu'c inhermanujat.

¹⁶Mit el Señor nas̈moygapay paz pi is̈moyí̱jcac paz jʉmgapa'tu mam intsʉ̱ngawa'n. El Señor pi is̈mutangac mijchat minu'pʉjʉjnat.

¹⁷Ʉ̱ Pablo tʉnajyu'táj ayʉ̱́j saludu ja'yic tʉncʉ'ni'c, mit we'n tʉs̈firma̱t nu'pʉjʉn noc.

¹⁸El Señor Jesucristu pi is̈moygac favor pa mijchat minu'pʉjʉjnat. Amén.