Read Sayula Popoluca 1 Timoteo 1 Bible Online

1 Timoteo 1 - Sayula Popoluca bible

1 Timoteo 1

¹Ʉ̱ Pablo. Jesucristu tʉs̈yac pa apóstol ni'c we'n imanda̱tca Dios jeme nas̈salva̱tcapay mit el Señor Jesucristu jeme na-atsʉ̱ngapay.

²Tʉsaluda̱tp mi̱ Timoteo. Tʉ-e'p mi̱ as̈am tu'c tʉ̱wáy ni'c tʉ-actugupʉc Dios, mit micupʉcp iyacs̈ta'cway. Dios Nate̱jat mit Jesucristu el Señor pi is̈moygac favor, pi is̈-ayo̱wis̈cac, pi is̈moygac paz.

³Antes tʉnʉjcs̈ pa Macedoniajway na̱s̈, tʉnajau pi tan nʉ'jcopac Efeso. Tʉnwan pi manda̱tcʉs̈ mʉgʉc una̱c jayajwat maga-ajque's̈ca jatu'c ama̱s̈an.

⁴Ne magacupʉjca we̱tcuentujat ne magawatca cuenta ampay jayajwat inʉ'jyat ni'c ayé ca-ijtʉp fin. Ayé cosajat nas̈yajcapu pa napensa̱tca po nas̈ca-actujawigap nat nas̈cupʉjcawa'n Dios pa nanisalva̱tcʉjʉwa'n. Wename tʉtsáwi jinap.

⁵Nacumplia̱tcáj ayʉ̱́j mandamientu te naniwangʉjʉp. Mit naniwangʉjʉp cuandu najo̱jt itsʉ̱na limpiu, mit cuandu najawip ni'c nawatp oy mit nacupʉcp iyacs̈ta'cway.

⁶Po cʉjtu'c pichingau oyway to̱uni'c mit icuyaguigau ayʉ̱́j cosa ojyatway, mit itunitʉgʉygʉjʉu puru we̱t-ampiu.

⁷Iwangap igui-ajque's̈cawa'n ley mit inʉmgap ni'c iyacs̈ta'cway nu'pʉjʉn i-ajque's̈capay po igajawigap ti inʉmgapay, ne iga-is̈capcap lo que i-ajque's̈capay.

⁸Po najawigap ni'c oy ayé ley te ijayaumaygap iyacs̈ta'cway.

⁹Najawigap ni'c ayé ley cawatic pa tu'c jayau yacs̈icway. Ayé watic pa jeme igawatcapay oy mit jeme cajayaumaygapay, jeme igawangapay Dios mit jeme iwatcapay mal, jeme igarespeta̱tcapay Dios mit jeme itucotscapay Dios, jeme i-ago'jcapay ite̱jtat, jeme i-ago'jcapay ima̱jmat, mit pa ago'cpayna'jat.

¹⁰Mit pa chajyo'ypajyat mit afeminadujat, jayaunu'mpajyat, we̱tpayna'jat mit pa jeme tʉ'tsjura̱tcapay. Mit ayé ley watiguey pa nu'pʉjʉn cosa catsʉ̱námpay de acuerdu mit ayé oyway ama̱s̈an.

¹¹Po ayʉ̱́j oyway noticia iyacp tu'c ama̱s̈an más oyway, mit Dios tʉs̈yajcau tʉ-ajque's̈ ayé. Mit oymanac ayé oyway noticia ni'c nas̈actujawigap ni'c Dios mʉjninʉmic.

¹²Tʉnyʉjmap ni'ctiyu̱s̈ Cristu Jesús el Señor ni'c je' tʉs̈moy maj tʉyos̈wat mit je'. Mit je' confia̱t mit ʉ̱, mit tʉs̈yac pa tʉserviá̱jta je'.

¹³Mit ámbanu tʉntucots Dios. Tʉmpo'ctangʉs̈ mit tʉnapes̈ta̱jcʉs̈ cupʉcpajyat. Po majawe'naj Dios tʉs̈-ayo̱wis̈ ni'c tʉngajawiwu lo que tʉnwatway ni'c tʉganicupʉcp.

¹⁴Po el Señor tʉs̈moy mayo'c favor, jemni'c tʉs̈cupʉc je', mit jinap tʉnmuniwangʉs̈ʉp jayajwat ni'c tʉncupʉcnup Cristu Jesús.

¹⁵Iyacs̈ta'cway ayʉ̱́j inʉmgapay, mit oy ma cupʉjca nu'pʉjʉn jayajwat ni'c Cristu Jesús min en ayʉ̱́j mundu pa iguisalva̱tcʉs̈wa'n maljayajwat, mit tʉs̈jawi ʉ̱jate más tʉma̱lo'c.

¹⁶Po jemni'c Dios tʉs̈-ayo̱wis̈ pa Jesucristu tʉs̈actujawiyáj ni'c je' tʉs̈aguejpau mayo'c calma, ni'c ʉ̱jate más tʉma̱lo'c. Mit ayé tu'c ejemplu pa jeme icupʉjcámpay je' pa ma itcʉjʉ vida jeme cacʉs̈ámpay.

¹⁷Jemni'c narespetá̱tca mit na-oyninʉ́mga pa nu'pʉjʉn tiempu ayé Dios jeme más manda̱tpay. Mit je' cacʉs̈p, ca-o'cp, mit je' naga-e'p, je' tu'gujyu Dios itpay, mit je' ijawip nu'pʉjʉn. Amén.

¹⁸Timoteo, tʉ-e'p mi̱ as̈am tʉ̱wáy, mit tʉtsawip pi lucha̱t oy pa Cristu. Ni'c hermanujat i-aproba̱tcau ni'c mipichináj oy pa is̈muyos̈watwa'n Cristu.

¹⁹Jemni'c siguia̱t cupʉc, pi jawi ni'c inwatp oy. Ni'c cʉjtu'c icuyaguigau lo que oyway mit i-actogoygau lo que icupʉjcaway.

²⁰We'n iguijatcau Himeneo mit Alejandro. Ayʉ̱jat tʉnacpichingʉs̈ mam itsʉ̱nga cupʉcpajyat pa ma tanga Awayagatsna' icʉ'jugum, pa magapʉctanga iguitucotscawa'n Dios.