Read Sayula Popoluca 1 Timoteo 3 Bible Online

1 Timoteo 3 - Sayula Popoluca bible

1 Timoteo 3

¹Iyacs̈ta'cway ayʉ̱́j inʉmgapay, te tu'c jayau iwamp iguicuida̱tcʉs̈wa'n cupʉcpajyat, oyway yos̈ iwamp.

²Po tu'c jeme icuida̱tpay cupʉcpajyat itp ti itsʉ̱nawa'n sin culpa, ma ijtʉ tu'gujyu ito's̈ay, siempre ma pensa̱t oy, magatʉ'tswatu neti, ma niporta̱jtʉ oy, ma pʉctsou oymanac tʉcyo'ypajyat, ma jat may pa i-aque's̈wa'n.

³Caje' mu'gajayau, caje' tsuguinjayau, magawanwit jaytumi̱n, po ma jayawa'n, ma che'n paz, magawanwit tumi̱n demás,

⁴ma manda̱t oy itʉcm tsʉ̱ngapay, ma iguijayaumaygac iwajyat mit ma iguirespeta̱tcac.

⁵Ni'c jeme igajatpay iguimanda̱tcʉs̈ itʉcm tsʉ̱ngapay, ¿natpaj iguicuida̱tcʉs̈wa'n Dios ijayajwat?

⁶Mit tu'c namcupʉcpay ca-oyap itan pa cuida̱tpay ni'c oyap inimʉjninʉ́jmʉ, mit oyap iguicastiga̱tp Dios as̈am iguicastiga̱jt Awayagatsna'.

⁷We'ney jeme cacupʉjcapay itp ti igui-oyninʉmgawa'n ayé jayau tanámpay encarga̱tic. Te caje' we'n ayé mismu jayajwat iguimalninʉmgáj je', mit oyap igui-actamp Awayagatsna'.

⁸We'ney diáconojat jeme majyigapay templuni'c ma niporta̱tcʉjʉ oy, magatigatsí̱jca lo que inʉmgapay, caje' mu'gajayajwat, magawangawit jaytumi̱n.

⁹Ma is̈capca oy lo que Dios nas̈actujawigapay pa nas̈cupʉjcawa'n, ma tsʉ̱nga limpiu ijo̱tni'jcat.

¹⁰Mit ayʉ̱́jat ma proba̱jtʉ'jca te pichingáj oy, mit te nepʉn iguigamalninʉmgap ma tanga as̈am diáconojat.

¹¹We'ney to's̈ajyat jeme majyigapay templuni'c ma niporta̱tcʉjʉ oy, magawe̱twatcaja nepʉn, ma pensa̱tca oy, ma cumplia̱tca nu'pʉjʉn.

¹²Tu'c diácono ma ijtʉ tu'gujyu ito's̈ay, ma manda̱t oy iwajyat mit itʉcm tsʉ̱ngapay.

¹³Ni'c ayé diáconojat jeme majyigapay oy, tsʉ̱ngáj bien oyninʉ́mijcat, mit más capʉ̱tcáj iguinʉmgawa'n ni'c icupʉjcap Cristu Jesús.

¹⁴Ayʉ̱́j noc tʉja'jyap po tʉnatsʉ̱nap tʉnʉs̈wa'n pe'jyu mam intsʉ̱na.

¹⁵Mit te tʉganʉs̈p pe'jyu, injawinup nat inyiporta̱jtʉwa'n mam igui-e'pca Dios ijayajwat ni'c mijchat is̈templujat ayé Dios jeme tsʉ̱napay pa siempre, mit inmoygap maj jayajwat pa ma siguia̱tca lo que iyacs̈ta'cway.

¹⁶Mit iyacs̈ta'cway oymanac lo que nacupʉjcapay ni'c ayé Dios nas̈actujawigau. Dios min yam as̈am jayau, Espíritu Santu iguiyacs̈icninʉm, igui-is̈cau ángejlat. Inʉmdacyo'ygajau i-oyway noticia pa jeme caje'jatway judíujat, jayajwat ayʉ̱́j mundujway icupʉjcau je', mit je' cu'tnuw pa tsajpni'c mam i-oymanagui.