Read Sayula Popoluca 1 Timoteo 4 Bible Online

1 Timoteo 4 - Sayula Popoluca bible

1 Timoteo 4

¹Po Espíritu Santu inʉmp claru ni'c en ayé tiempu mi'námpay cʉjtu'c icuyaguigáj lo que icupʉjcapay, mit imaraugáj mal-espíritujat nas̈we̱tcapay, mit imaraugajáj i-ama̱s̈an.

²Imaraugáj jayajwat que's̈pay iyucuinmat oymanac, po ayé we̱tpajyat. Mit ayé we̱tpajyat cajatu'ngap ijo̱jtat iguiwátca mal ni'c yújijcatanu.

³Mit ayé maljayajwat i-atujcáj maganicʉ'pá̱jtʉ nepʉn, mit inʉmgáj ni'c itp cayan ca-oyway nas̈caywa'n. Po Dios iyac nu'pʉjʉn cayan, mit jeme cupʉjcapay mit jeme i-is̈capcapay lo que iyacs̈ta'cway ma cayga nu'pʉjʉn, mit ma nʉmgaja Dios ni'ctiyu̱s̈ por ayé cayan.

⁴Ni'c oy nu'pʉjʉn iyacway Dios mit ca-oy ʉjtsat nas̈nʉmgawa'n ni'c ca-oy ayé, más oy napʉctsóuga mit nanʉ́mgaja Dios ni'ctiyu̱s̈.

⁵Mit ayé cayan tamp limpiu ni'c we'n iguinʉm Dios ilibruni'c, mit tampey limpiu ni'c nayo'tcajap Dios ma bendiciona̱t ayé cayan.

⁶Te inajque's̈cʉs̈ap hermanujat lo que tʉnʉjmaway, mipichináj oy pa is̈servia̱jtawa'n Jesucristu, mit impʉgáj maj mit ayé palabra nacupʉjcapay, ni'c insiguia̱jtap mʉgʉc ayé oyway ama̱s̈an.

⁷Cuyágui ayé ma̱lway cuentujat ni'c ayé puru we̱t-ampiu, mit cuji'cs̈i is̈watwa'n lo que Dios iwampay.

⁸Ni'c oy s̈ʉ̱n nawátca ejerciciu pa nacuerpu, po te nawatp lo que Dios iwampay, ayé más oy pa nu'pʉjʉn navida, ni'c we'n Dios nas̈prometia̱tcajap tu'c vida oyway jinap, mit we'ney pa ayé tiempu mi'námpay.

⁹Iyacs̈ta'cway ayʉ̱́j tʉnyʉmway, mit oy nu'pʉjʉn jayajwat ma pʉctsouga ayé.

¹⁰En ayʉ̱́j vida nayos̈watcap mʉgʉc mit jayajwat nas̈apes̈ta̱jcap, po namajmoygap ni'c naconfia̱tcap mit ayé Dios jeme tsʉ̱napay pa siempre. Mit je' isalva̱tcʉs̈p nu'pʉjʉn jayajwat mit isalva̱tcʉs̈áj jeme je' iguicupʉjcámpay.

¹¹We'n ajque's̈ mit manda̱t as̈am tʉnʉ́jmaj.

¹²Cammo' laj nepʉn is̈-e'páj menus ni'c miyaunaj, po yajcʉ́s̈a oyway ejemplu cupʉcpajyat. Ma jawiga ni'c oy lo que inyʉmpay mit oy lo que inwatpay. Ma e'pca ni'c inwamp Dios mit incuji'cs̈ip nu'pʉjʉn. Ma e'pca-ey ni'c incupʉcp Dios mit miyo'yp limpiu.

¹³Mientras tʉcoyp mam intsʉ̱na, cuji'cs̈i is̈cotscʉs̈awa'n Dios ipalabra. Cuji'cs̈i-ey is̈ajque's̈cʉs̈awa'n cupʉcpajyat mit tsawigʉs̈.

¹⁴Camnijawiyo't ayé favor Dios is̈moyway, ni'c ayé favor is̈ajyu'jtau Dios pa is̈servia̱jtawa'n je'. Mit impʉctso̱u ayé favor cuandu na'waywájat is̈yajcajau icʉ'jat inyucuinm.

¹⁵Cuji'cs̈i is̈watwa'n nu'pʉjʉn tʉnʉjmapay pa nu'pʉjʉn jayajwat ma e'pca ni'c misiguia̱tp oy.

¹⁶Nicuidá̱jtʉ mi̱ mit pensa̱t oy lo que inajque's̈pay. Siguiá̱jta mʉgʉc lo que tʉnʉjmaway, ni'c te inwatp we'n minisalva̱jtʉ̱́j mi̱, mit we'ney jeme is̈maraugapay nisalva̱tcʉjʉ́mpey.