Read Sayula Popoluca 1 Timoteo 5 Bible Online

1 Timoteo 5 - Sayula Popoluca bible

1 Timoteo 5

¹Ingache'gáj tu'c na'way po intsawiyáj as̈am tu'c inte̱t, mit we'ney intsawigʉs̈áj ya̱wayna'jat as̈am tu'c inje̱way.

²Tsawigʉs̈ ajchwaywájat as̈am tu'c inma̱m. Tsawigʉs̈ey quis̈aywájat as̈am tu'c inje̱way, ma e'pca ni'c miyo'yp limpiu.

³Majyigʉs̈ cu-o'cwájat jeme ca-itcʉjʉpay nepʉn.

⁴Po te tu'c cu-o'cwáy ijtʉp iwajyat mit i-ocwájat, ma pʉctajnʉ'jca je'jat iguimajyigawa'n itʉcm tsʉ̱ngapay mit ma acpítujcaja favor ima̱m mit ite̱t, ni'c Dios i-e'p ni'c oy nawátca we'n mit ayé igui-acji'jcap ijo̱jt.

⁵Po tu'c cu-o'cwáy ca-ijtʉpay nepʉn tsʉ̱nap itu'gumu, solo je' i-atsʉ̱nap Dios mit ji'cs̈ pa iguiyo'jtawa'n mit igui-ora̱jtawa'n Dios tsu'm mit s̈ʉ̱m.

⁶Po te tu'c cu-o'c iwatp solo lo que iyo'tpay ijo̱jt, Dios i-aguepáj ayé as̈am o'guic ni'c ca-ijtʉp parte mit je'.

⁷Manda̱tcʉs̈ ma watca as̈am tʉnʉ́jmaj pa magatsʉ̱nga malninʉmijcat.

⁸Mit tu'c jayau más ma cuida̱t itʉcm tsʉ̱ngapay mit we'ney ifamilia catsʉ̱ngapay mit je'. Mit te igawatp we'n, jalmanu icupʉc, mit jatáj más mal que tu'c jayau canicupʉcpay.

⁹Ja'ygu't listani'c cu-o'cwájat jeme itcʉjʉnupay sesenta s̈iwit, mit itcʉjʉway tu'gu ina'u.

¹⁰Ayé cu-o'cwájat ma tsʉ̱nga oyninʉ́mijcat ni'c iwatcau oy, i-acye'jcau iwajyat, i-atendia̱tcau oy iguitʉcyo'ygaway, iservia̱tcajau Dios ijayajwat, imajyigau jeme itunas̈caway, iwatí̱jcau nu'pʉjʉn cosa oyway.

¹¹Po camja'ygu't listani'c yaucu-o'cwájat ni'c je'jat oyáj iguiwatca solo iyo'tpay ijo̱jtat mit icuyaguigáj Cristu ni'c más iwangap inicʉ'pa̱tcʉjʉwa'natu.

¹²Mit tangáj culpa̱tic ni'c icuyaguigau ayé primerway compromisu ni'c solo iservia̱tcajáj Cristu.

¹³Mit we'ney candʉ'nyujcáj mit tsʉ̱ngáj solo pa itʉcyo'ygawa'nu. Mit caje'yu ni'c candʉ'nyujcáj po we̱jtacyo'ygámpey mit itunitʉgʉygʉjʉ̱́j jayje', mit inʉmgáj jeme ca-oyway nas̈nʉm.

¹⁴Jemni'c tʉnwamp ma nicʉ'pa̱tcʉjʉ ayé yaucu-o'cwájat, ma acye'jca iwajyat, ma cuida̱tca itʉjcat, magamoyga laj tu'c mutsuguin iguimalninʉmgáj.

¹⁵Ni'c cʉjtu'c yaucu-o'cwájat icuyaguigau oyway to̱u pa iguijayaumaygawa'n Awayagatsna'.

¹⁶Te tu'c hermanu o tu'c hermana itcʉjʉp itʉcmat tu'c cu-o'cwáy ma cuida̱tca je'jat, mit we'n igatunas̈cáj cupʉcpajyat iguimantenia̱tcawa'n. Ayé cupʉcpajyat imantenia̱tcáj cu-o'cwájat, po jeme ca-itcʉjʉpay nepʉn.

¹⁷Ayé na'waywájat jeme manda̱tcapay oy templuni'c merecia̱tp nas̈respeta̱tcawa'n may, mit más narespeta̱tcáj jeme yos̈watcapay mʉgʉc pa ipredica̱tcawa'n mit pa i-ajque's̈cawa'n.

¹⁸Ni'c as̈am itsʉ̱na ja'yic Dios ilibruni'c: Ingacojmáj pusa̱t ayé buey na-actute'ní̱jcapay trigu po moyga laj ma cay s̈ʉ̱n. Mit we'ney tu'c yos̈watpay merecia̱tp iguitso̱jcawa'n.

¹⁹Ingawatáj cuenta jeme i-acusa̱tcapay tu'c na'way te ca-itp mechc o tu̱gup testigu contra je'.

²⁰Jeme siguia̱tcapay iguiwatca mal che'cta̱jcʉs̈ mam nu'pʉjʉn hermanujat iguimárauga pa japu̱jtat ma pʉ̱tca-ey.

²¹Tʉmanda̱tp mi̱ mam igui-e'pca Dios mit el Señor Jesucristu mit mam igui-e'pca-ey i-ángejlat cupíwijcatway. Tʉmanda̱tp pi wat ayʉ̱́j tʉnʉjmaway. Camcupiugʉs̈ jayajwat po ajque's̈cʉ́s̈a pareju.

²²Camtʉ'tscupiu jaran tu'c jayau pa is̈mo'wa'n mʉjway yos̈ templuni'c. Te inwatp we'n, oyap is̈jimp ayé jayau te iwatp mal. Nicuidá̱jtʉ mit ma̱jlat.

²³Cam-u̱cwit puru nʉ', po u'guey s̈ʉ̱n vinu pa ma oytan injo̱jt mit pa pigatu'ní̱jcʉ.

²⁴Cʉjtu'c jayajwat najawigʉs̈ap ima̱jlat antes icoygawa'n mam ijuzga̱twa'n Dios, po jacʉjtu'c jayajwat ima̱jlat cuque's̈cáj hasta mam ijuzga̱twa'n Dios.

²⁵Wename-ey najawigap jeme iwatcapay oy, mit te nagajawigap jinap te iwatcap oy, po ayé itp ti icuque's̈cawa'n.