Read Sayula Popoluca 1 Timoteo 6 Bible Online

1 Timoteo 6 - Sayula Popoluca bible

1 Timoteo 6

¹Ayé cupʉcpajyat jeme imoygapay yos̈ ma jawiga ni'c oy ma respeta̱tca may ijaycat. Te igarespeta̱tcap, imalninʉmgáj Dios mit lo que tʉnajque's̈capay.

²Mit te itcʉjʉpey ijaycat jeme cupʉjcapay maga-aguepca menus ni'c je'jat hermanujat, po ma servia̱tcaja más oy ni'c je'jat cupʉcpajyat mit ma muniwangʉjʉ. Jemni'c ma watcaja oyway yos̈ pa je'jat. Ajque's̈cʉ́s̈a mit tsawigʉs̈ ma watca we'n.

³Te tu'c jayau i-ajque's̈p jatu'c ama̱s̈an mit te caje' as̈am ayé ama̱s̈an oyway inʉmway el Señor Jesucristu, ne iga-ajque's̈p yacs̈ic ayé ama̱s̈an ni'c na-adorá̱tca Dios,

⁴ayé jayau nimʉjninʉjmʉp mit iga-is̈cap neti. Je' culocoip pa i-ucyo'twa'n, pʉmba'tu imuninʉjmʉp. Mit ayé jayau i-acchu̱chip tsuguin, i-amp jeme ijtʉpay, itucotsp tu'c jayau, mit puru ma̱jlat ipensa̱tp.

⁵Jayajwat as̈am ayé tsʉ̱ngap pa igui-acchu̱chigawa'n tsuguin ni'c iga-entendia̱tcap neti. Je'jat iga-is̈capcap lo que iyacs̈ta'cway. Ipensa̱tcap igui-adora̱tcawa'n Dios solo pa igui-actsʉ̱ngawa'n tumi̱n. Ni-apartá̱jtʉ de ayé jayau ma̱jlatway.

⁶Po más valia̱tp te na-adora̱tcap Dios iyacs̈ta'cway mit te natsʉ̱ngap contentu mit lo que na-aguepcapay.

⁷Ni'c neti nagamumingawu en ayʉ̱́j mundu, mit na-o'jcawa'n netijéy nagamunʉs̈cáj.

⁸Po te na-aguepcap cayan mit najamujcat, natsʉ̱́nga contentu mit ayé.

⁹Po jeme iwangapay ijatcawa'n ricu, más iguimingajáj prueba mʉgʉcway mit iguipichingajáj mal. Iwangáj may cosajat caservia̱tcapay mit iguiwatcajáj mal. Mit ayé cosajat igui-actogoygap jayajwat.

¹⁰Mit te más nawangap tumi̱n, ca-oy ayé ni'c jem ichu̱chi nu'pʉjʉn mal. Mit cʉjtu'c más iwangau tumi̱n hasta icuyaguigau lo que icupʉjcaway, mit cʉs̈ más itunas̈cau.

¹¹Po mi̱ como Dios inmuyos̈watp, cuyagui ayé mal cosajat, mit siguiá̱jta lo que iyacs̈ta'cway. Siguia̱t is̈-adora̱twa'n Dios, siguia̱t incupʉcwa'n, siguia̱t is̈wa'nwa'n Dios. Aguep calma mit camnimʉjninʉ́jmʉ.

¹²Defendia̱t oymanac lo que nacupʉjcapay. Pʉctsou oy ayé vida jeme cacʉs̈ámpay ni'c Dios is̈ya̱s̈ pa is̈pʉctsowa'n ayé vida. Mit inactujawigʉs̈ may jayajwat ni'c oyo'gu incupʉc.

¹³Tʉmanda̱tp mi̱ mam igui-e'p Dios jeme imoygʉs̈pay vida nu'pʉjʉn cosajat, mit mam igui-e'p Jesucristu jeme i-actujawiway Poncio Pilato ni'c je' Dios igui-ajyu't.

¹⁴Tʉmanda̱tp pi jayaumay lo que tʉnajaway, pigatsʉ̱na mancha̱tic mit ma̱jlat, pi is̈camalninʉmac nepʉn hasta ique's̈ta'cwa'n el Señor Jesucristu.

¹⁵Ni'c Dios iyac tu'c s̈ʉjw itumi'námpay Jesucristu, ni'c Dios ayé más oyninʉmicway, je' tu'gujyu jeme ijtʉpay nu'pʉjʉn poder. Je' tu'c rey jeme imanda̱tpay nu'pʉjʉn rejyat, mit je' ayé Señor jeme imanda̱tpay nu'pʉjʉn jayajwat manda̱tcapay en ayʉ̱́j mundu.

¹⁶Mit je' Dios tu'gu jeme ca-o'cpay, je' tsʉ̱nap luzjugum mam nepʉn ca-oyap iguicutomip, mit nepʉn igani-e'p je' ne ca-oyap igui-e'pca. Na-oyninʉ́mga je' ni'c je' manda̱tp pa siempre. Amén.

¹⁷Manda̱tcʉs̈ jeme ricujatway en ayʉ̱́j mundu maganimʉjninʉ́mgʉjʉ, ne magaconfia̱tca mit itumi̱jnat jeme cʉs̈pay, po ma confia̱tca mit ayé Dios jeme tsʉ̱napay pa siempre, mit je' nas̈moygap nu'pʉjʉn cosajat pa natsʉ̱nga oy.

¹⁸Manda̱tcʉs̈ ayé ricujat ma watca oy, ma ayo̱wis̈ca jayajwat, ma majyiga pro̱wijat mit lo que i-aguepcapay.

¹⁹Pa we'n itcʉjʉ̱́j ayé riqueza jeme cacʉs̈ámpay pa ayé tiempu mi'námpay. Ayé inʉmo'jcʉp ni'c ipʉctsougáj oy ayé vida cacʉs̈ámpay.

²⁰Timoteo, cuida̱t oymanac lo que tʉnʉjmaway, mit cammaraugʉs̈ jeme tʉ'tscotscapay, mit camwatcʉs̈ cuenta jeme inʉmgapay ni'c i-is̈capo'jcap, mit iga-is̈capcap neti.

²¹Ni'c jeme inʉmgaway ni'c i-is̈capo'jcap, icuyaguigau lo que icupʉjcaway. Dios pi is̈mo'ac favor. Amén.