Read Sayula Popoluca 2 Timoteo 1 Bible Online

2 Timoteo 1 - Sayula Popoluca bible

2 Timoteo 1

¹Ʉ̱ Pablo. Jesucristu tʉs̈yac pa apóstol ni'c we'n iguiwajn Dios, mit je' iprometia̱tp vida cacʉs̈ámpay pa jeme icupʉjcapay Cristu Jesús.

²Timoteo, mi̱ tʉsaluda̱tp. Tʉwamp mi̱ as̈am tʉ̱wáy. Dios Nate̱jat mit el Señor Jesucristu pi is̈moygac favor, pi is̈-ayo̱wis̈cac, pi is̈moygac paz.

³Tʉnadora̱tp Dios as̈am ámbanu tʉnte̱jtat igui-adorá̱tcaj mit tʉnjawip ni'c limpiu tʉnjo̱jt. Mi̱ tʉ-ora̱tí̱jcap tsu'm mit s̈ʉ̱m mit tʉnyʉjmap Dios ni'ctiyu̱s̈ ni'c tʉnijawip mi̱.

⁴Tʉnyijawipnaj nat itu'jn injo̱jt cuandu tʉpichijn mam mi̱, jemni'c tʉnwamp tʉ-e'pwa'n pa ma ji'cta'c tʉnjo̱jt.

⁵Tʉnyijawi-í̱cp ni'c micupʉcp iyacs̈ta'cway. Micupʉcp as̈am primeru icupʉjc in-ogoy Loida, mit as̈amey icupʉjc inma̱m Eunice, mit tʉtsʉ̱nap seguru ni'c mi̱ micupʉcpey mʉgʉc.

⁶Jemni'c tʉtsawi mi̱ pi cuida̱t oymanac ayé favor is̈moyway Dios cuandu tʉyájcaj tʉncʉ'jat inyucuinm.

⁷Dios igawamp napʉ̱tcawa'n, iwamp na-aguépca maj najo̱tni'jcat. Je' iwamp naniwángʉjʉ, iwamp nagawátca tigapa'tu.

⁸Jemni'c camwinchu̱ga is̈nʉmdacyo'ywa'n ni'c incupʉcp el Señor, ne camwinchu̱ga ni'c ʉ̱ tʉtsʉ̱nap presu. Tʉntunas̈p ni'c tʉncupʉcp el Señor, mit mi̱ oy pi tunas̈ey as̈am ʉ̱ ni'c nawangap ayé oyway noticia, mit Dios nas̈moygáj maj.

⁹Dios nas̈salva̱tcau mit nas̈ya̱s̈cau pa naserviá̱tcaja je'. Dios nas̈salva̱tcau ni'c nas̈wano'jcau, caje' ni'c nawatcau oy pa je' nas̈pʉctsougáj. Nas̈moygau ayʉ̱́j favor ni'c we'n iguiwajn Dios antes ichu̱chij ayʉ̱́j mundu ni'c namutʉgʉygau Cristu Jesús.

¹⁰Mit jinap Dios nas̈actujawigap ayé favor ni'c min Jesucristu jeme nas̈salva̱tcaway, mit je' i-actogoyda̱c ayé poder nas̈ago'cpay pa siempre, mit nas̈actujawigap tu'c vida jeme cacʉs̈ámpay ni'c nacupʉjcap ayé oyway noticia.

¹¹Mit Dios tʉs̈ya̱s̈ pa tʉjatwa'n apóstol, pa tʉnʉmdacyo'jya i-oyway noticia, mit pa tʉs̈ajque's̈cʉs̈awa'n jeme caje'jatway judíujat.

¹²Mit jinap tʉntunas̈p mʉgʉc po tʉgawinchu̱gap ni'c tʉnjawip pʉn tʉncupʉcp mit tʉtsʉ̱nap seguru ni'c Dios oyap iguiguarda̱t tʉmvida ni'c tʉnyajcau ayé icʉ'jugum pa ayé s̈ʉjw ijuzga̱twa'n je'.

¹³Siguiá̱jta mʉgʉc ayé oyway ama̱s̈an as̈am mi̱ tʉyájcaj ejemplu. Cupʉc ayʉ̱́j ama̱s̈an mit muniwangʉ́s̈ʉ jayajwat ni'c namutʉgʉygau Cristu Jesús.

¹⁴Cuida̱t oymanac nu'pʉjʉn cosa oyway is̈moyway Dios, mit is̈majyiyáj Espíritu Santu jeme tsʉ̱napay najo̱tni'jcat.

¹⁵Mi̱ injawinup ni'c nu'pʉjʉn hermanujat Asiajatway tʉs̈cuyaguigau, mit tʉs̈cuyaguigawey Figelo mit Hermógenes.

¹⁶El Señor ma mutangʉs̈ Onesíforo mit itʉcm tsʉ̱ngapay ni'c may veces tʉs̈acji'jcau tʉnjo̱jt, mit cawinchu̱gawu ni'c tʉtsʉ̱nau presu.

¹⁷Cuandu je' itsʉ̱naj Roma, icuji'cs̈iu pa tʉs̈che'náj mʉgʉc hasta mam tʉs̈pa̱t.

¹⁸El Señor ma igui-ayo̱wis̈ac je' en ayé s̈ʉjw ijuzga̱twa'n. Mit mi̱ bien is̈jawi ni'c je' bien nas̈majyigau cuandu natsʉ̱́ngaj Efeso.