Read Sayula Popoluca 2 Timoteo 2 Bible Online

2 Timoteo 2 - Sayula Popoluca bible

2 Timoteo 2

¹Mi̱ tʉ-e'p as̈am tʉ̱wáy, mit tʉtsawip pi pʉc más maj mit ayé favor is̈moypay Dios, ni'c namutʉgʉygau Cristu Jesús.

²Mi̱ inmarau lo que tʉ-ajque's̈away mam igui-ís̈caj may jayajwat, mit jinap ajque's̈cʉ́s̈a-ey jayajwat cumplia̱tcapay, pa we'n ijatcáj igui-ajque's̈caja japu̱t jayajwat.

³Mit mi̱ oy pi tunas̈ as̈am tu'c oyway soldaj imuyos̈watpay Jesucristu.

⁴Ni'c jeme yos̈watpay as̈am soldaj ca-oyap iguitunitʉ́gʉjyʉ jatu'c yos̈, ni'c iwamp itanwa'n más oy mit ayé jeme iguiyacway pa soldaj.

⁵Mit we'ney jeme pujʉ'gámpay carrerani'c igapʉctsowáj premiu te capujʉ'cp pajcu as̈am iguinʉ́mgaja.

⁶Tu'c camwatpay itp ti iyos̈wajtʉ'cwa'n pa iguipʉctsowa'n icosecha.

⁷Pensa̱t oy lo que tʉnajapay mi̱, mit el Señor is̈actujawiyáj nu'pʉjʉn ayʉ̱́j cosajat.

⁸Nijawi Jesucristu. Je' pichin David ifamiliani'c mit jutucta̱c mam itsʉ̱nga á̱nimajat. Mit ayʉ̱́j ayé oyway noticia tʉnyʉmdacyo'ypay ni'c je' jutucta̱c.

⁹Jemni'c tʉntunas̈p mit tʉtsʉ̱nap presu cutsumda'guic as̈am tu'c ma̱lway jayau. Ʉ̱ tʉtsʉ̱nap atucta'guic po Dios ipalabra nepʉn iga-atucp.

¹⁰Tʉnmajmoyp cuandu tʉs̈tunas̈ ni'c tʉnwangʉs̈p ayé jayajwat jeme Dios icupiugʉs̈way ma nisalva̱tcʉjʉ, pa we'n tsʉ̱ngáj siempre mam i-oymanagui. Jatáj we'n ni'c namutʉgʉygau Cristu Jesús.

¹¹Iyacs̈ta'cway lo que inʉmgapay: Te na-o'jcau mit Jesús, wename-ey natsʉ̱ngawa'n pa siempre mit je',

¹²te natunas̈cap, natsʉ̱ngámpey mit Jesús mam imanda̱t. Te nanʉmgap ni'c naga-is̈capcap Jesús, je' inʉmámpey ni'c nas̈ca-is̈capcap.

¹³Te ʉjtsat nagacumplia̱tcap, po Jesús siempre cumplia̱tp. Je' catigatsp, ne ca-oyap iniwe̱jtʉ.

¹⁴Actunijawigʉs̈ ayé cupʉcpajyat lo que tʉnʉjmaway. Manda̱tcʉs̈ mam igui-e'p el Señor maganinʉmgʉjʉ, ni'c te ninʉmgʉjʉp ayé caservia̱tp pa neti, mit oyap iguidesanima̱tcʉs̈ jeme imaraugapay.

¹⁵Cuji'cs̈i inyos̈watwa'n pa ma e'p Dios ni'c inwatp oy, mit micumplia̱tp pa inyos̈watwa'n mit ca-itp ti intuwinchu̱gámpay, mit inajque's̈áj pajcu ayé oyway noticia jeme iyacs̈ta'cway.

¹⁶Cammaraugʉs̈ jeme tʉ'tscotscapay ni'c jayajwat as̈amay ayé más itunitʉgʉygʉjʉ̱́j ma̱jlat.

¹⁷Mit ayé mal i-ajque's̈capay, jatáj mʉj as̈am tu'c pu'ts iyon. We'n iguijatcau Himeneo mit Fileto,

¹⁸ni'c icuyaguigau lo que iyacs̈ta'cway. Je'jat inʉmgap ni'c nagajajutucta̱jcáj mit we'n igui-awétiga una̱c cupʉcpajyat.

¹⁹Po Dios i-actangʉs̈p mʉgʉc cupʉcpajyat, mit icupiugʉs̈ pa iguije'jatcʉs̈wa'n. El Señor i-is̈capcʉs̈p ijayajwat mit jeme inʉ'jutcapay Cristu iyacs̈ta'cway ma niju'ptangʉjʉ de nu'pʉjʉn mal.

²⁰Mit cupʉcpajyat as̈am traste i-usa̱tcapay en tu'c mʉjway tʉjc. Itp traste waticway de oro mit de plata. Mit itpey traste de cujy mit de na̱s̈. Mit traste ojyatway i-ocupa̱tcap pa cosa ojyatway, mit traste ca-ojyatway i-ocupa̱tcap pa cosa ca-ojyatway.

²¹Wename-ey te tu'c cupʉcpay nilimpia̱jtʉp de cosa ma̱jlatway, Dios ipʉgáj as̈am tu'c traste oyway, mit ilimpia̱táj pa ije', mit ayé cupʉcpay iservia̱jtáj ijayc, mit tsʉ̱náj dispuestu pa iguiwatwa'n nu'pʉjʉn cosa oyway.

²²Mi̱ nicuidá̱jtʉ mit ayé ma̱jlat iwangapay ya̱wayna'jat, mit siguiá̱jta lo que iyacs̈ta'cway. Siguia̱t incupʉcwa'n mit muniwangʉ́s̈ʉ jayajwat. Siguia̱t intsʉ̱nawa'n en paz mit ayé cupʉcpajyat jeme inʉ'jutcapay el Señor, mit ma tsʉ̱nga limpiu injo̱jtat is̈nʉ'jutcawa'n je'.

²³Camwatcʉs̈ cuenta ayé jayajwat jeme ipensa̱tcapay puru tontería ni'c je'jat iga-entendia̱tcap neti. Mi̱ injawip ni'c je'jat solo i-acchu̱chigap tsuguin.

²⁴Mit jeme iservia̱jtapay el Señor maga-acchu̱chi tsuguin, po ma muniwangʉs̈ʉ jayajwat, ma jat may pa i-ajque's̈wa'n, magacutu'mpʉc iguitunas̈wa'n.

²⁵Mit ma tsawi jo̱toy jeme awa'nigapay, mit Dios iwa'náj igui-actuyajcʉs̈wa'n ima̱lway to̱jwat, mit we'n i-is̈capcáj lo que iyacs̈ta'cway,

²⁶mit oyáj ipíchinga Awayagats icʉ'jugum ni'c je' igui-actangap mit igui-actuwatcap lo que je' iwampay.