Read Sayula Popoluca 2 Timoteo 3 Bible Online

2 Timoteo 3 - Sayula Popoluca bible

2 Timoteo 3

¹Oy pi jawi ni'c icojawa'n últimu s̈ʉjwat itáj pʉ̱tna̱s̈.

²Ni'c itáj jayajwat iwangáj nu'pʉjʉn pa je'jatu, más iwangáj itumi̱jnat, nimʉjninʉmgʉjʉp, ni-oyninʉmgʉjʉp, imalninʉmgap Dios, igajayaumaygap ite̱jtat, iga-agradecia̱tcap neti, iwatcap mal,

³iga-e'po'jcʉjʉp nepʉn ne igaperdona̱tcap nepʉn, iwe̱twatcajap japu̱jtat, iwatcada̱jcap tigapa'tu, iga-ayo̱wis̈cap nepʉn mit i-angap nu'pʉjʉn cosa oyway,

⁴traicionerujat, capensa̱tcap pa japu̱jtat ma tsʉ̱nga oy, nimʉjnijawigʉjʉp, iwangap más jeme iyo'tpay ijo̱jtat que iguiwangawa'n Dios.

⁵Je'jat niwatcʉjʉ̱́j ni'c iwangap Dios po igajayaumaygap ne igapʉctsougajap ipoder. Cammunipʉjcʉs̈ʉ jayajwat as̈am aye'jat.

⁶Ni'c as̈amay ayé jayajwat tʉgʉygap jʉmgapa'tu mit i-awe̱tigap to's̈ajyat tontajatway jeme iwatcapay mal. Mit ayé to's̈ajyat más iguijo̱tju'pcap ma̱jlat,

⁷ni'c ja-iwangap iguipʉctangawa'n tigapa'tu, po nunca igacoygajap pa igui-is̈capcawa'n lo que iyacs̈ta'cway.

⁸Mit as̈am Janes mit Jambres iguija-atújcaj Moisés, wename-ey ayʉ̱́jat iwangap igui-atujcawa'n lo que iyacs̈ta'cway. Ayé jayajwat ca-oyap ipensá̱tca oy, cacupʉjcap iyacs̈ta'cway.

⁹Po ayʉ̱́jat cajasiguia̱tcáj we'n ni'c nu'pʉjʉn ijawigáj ni'c je'jat tontojat, ni'c we'ney iguijatcau ayé jayajwat jeme i-atujcaway Moisés.

¹⁰Po mi̱ insiguia̱jtap lo que tʉ-ajque's̈apay. Insiguia̱jtap lo que tʉnwatpay, lo que tʉnaguepay pa tʉs̈watwa'n, mit we'ney lo que tʉncupʉcpay. In-e'p nat tʉs̈aguepcʉ́s̈a calma jayajwat, nat tʉs̈muniwangʉ́s̈ʉ jayajwat, nat tʉnimajmójyʉ cuandu tʉs̈tunas̈.

¹¹Injawipey nat tʉs̈po'ctangau, mit nat tʉs̈actunas̈cau ayé jayajwat tsʉ̱ngapay ayé nʉ'jcopajcat Antioquía, Iconio mit Listra. Injawip nat tʉs̈majmojy cuandu tʉs̈po'ctangau, po el Señor tʉs̈libra̱t de nu'pʉjʉn ayʉ̱́j cosajat.

¹²Mit we'ney nu'pʉjʉn jeme iwangapay iyo'ygawa'n limpiu mit Cristu Jesús, igui-actunas̈cáj jayajwat.

¹³Po maljayajwat mit we̱tpayna'jat siguia̱tcáj iguiwatca más mal. Je'jat iwe̱tcáj jayajwat mit cʉs̈wa'n je'jatu niwe̱tcʉjʉ̱́j.

¹⁴Po mi̱ siguiá̱jta lo que impʉctanway mit mutan mʉgʉc lo que incupʉcway, mit injawip pʉn is̈ajque's̈cajaway,

¹⁵ni'c mi̱ desde inyauya̱waymijn inis̈cajpau Dios ilibru, mit ayé oyap is̈actujawip nat nanisalva̱tcʉjʉwa'n ni'c nacupʉjcap Cristu Jesús.

¹⁶Dios i-actuja'ygʉs̈ ijayajwat nu'pʉjʉn tsʉ̱napay ja'yic ilibruni'c, mit ayé oy pa nas̈tu-ajque's̈wa'n mit pa nas̈actujawigʉs̈wa'n jayajwat magawatca mal, mit pa nas̈tutsawigʉs̈wa'n ma yo'yga yacs̈ic.

¹⁷Pa we'n Dios ijayajwat neti iguigatogoygáj, mit ipʉctangáj iguiwatcawa'n nu'pʉjʉn cosa oyway.