Read Sayula Popoluca 2 Timoteo 4 Bible Online

2 Timoteo 4 - Sayula Popoluca bible

2 Timoteo 4

¹Dios ijuzga̱tcʉs̈áj jeme tsʉ̱ngapnajway mit o'guijcatway cuandu imi'nwa'n Jesucristu pa imanda̱twa'n. Mit mi̱ tʉmanda̱tp mam igui-e'pca Dios mit el Señor Jesucristu.

²Tʉmanda̱tp pi ajque's̈ lo que Dios inʉmpay, siempre cuji'cs̈i pa inajque's̈wa'n, actujawigʉs̈ jayajwat magawatca mal, tsawigʉs̈ mit may calma mit inajque's̈cʉs̈áj oyway ama̱s̈an.

³Ni'c mi'náj tu'c tiempu jayajwat igajawangáj oyway ama̱s̈an po más imarawo'jcʉjʉ̱́j jatu'c cosa namay, mit iche'ngáj ajque's̈pajyat mit ayé jayajwat igui-ajque's̈cajáj natu je'jat iguiwanga.

⁴Mit je'jat igajamaraugáj lo que iyacs̈ta'cway mit más iwangáj iguimaraugawa'n we̱tcuentujat.

⁵Po mi̱ pensa̱t oy mit nu'pʉjʉn inwatpay, majmo' is̈tunas̈wa'n, siguia̱t nʉmdacyo'y ayé oyway noticia, cumplia̱t oy ayé yos̈ inwatpay.

⁶Ni'c ʉ̱ cajati pa tʉs̈yacwa'n tʉmvida pa Dios ma pʉctsou, mit coynup hora pa tʉ-o'cwa'n.

⁷Oyo'gu tʉlucha̱jt pa Cristu, tʉncumplia̱tway nu'pʉjʉn tʉnyos̈, tʉncuida̱t oymanac lo que tʉncupʉcway.

⁸Mit jinap tʉnaguepnup guarda̱tic tu'c premiu ni'c tʉnwatway lo que iyacs̈ta'cway. El Señor Dios je' tu'c Juez yacs̈icway, je' tʉs̈mo'áj ayé premiu en ayé s̈ʉjw, mit caje'yu ʉ̱ tʉs̈mo'áj premiu, po imoygʉs̈ámpey premiu pa nu'pʉjʉn jeme i-atsʉ̱ngapay imi'nwa'n Cristu.

⁹Cuji'cs̈i inmi'nwa'n pe'bet mam ʉ̱ tʉtsʉ̱na,

¹⁰ni'c Demas tʉs̈cuyaguiu, más iwan itsʉ̱nawa'n oy en ayʉ̱́j mundu, mit nʉcs̈ pa nʉ'jcopac Tesalónica. Crescente tʉnacnʉcs̈ pa Galaciajway na̱s̈ mit Tito nʉcs̈ pa Dalmaciajway na̱s̈.

¹¹Solo Lucas tan mit ʉ̱. Che'n Marcos mit mumijnac pa tʉs̈majyiyáj.

¹²Tíquico tʉnacnʉcs̈ pa nʉ'jcopac Efeso.

¹³Inmi'nwa'n mumijnac tʉncapa jeme tʉnyacway nʉ'jcopac Troas, mit tʉnyac mam itsʉ̱na Carpo. Mit mumíjnaguey tʉnlibrujat, po más tʉnwamp nocwájat tʉntuja'ypay.

¹⁴Alejandro pus̈an-oyacpayna' tʉs̈wajtau mayo'c mal. El Señor igui-actutso'gáj as̈am iguiwajt.

¹⁵Mi̱ nicuidá̱jtʉ-ey de ayé jayau, ni'c mayo'c veces igui-atujc lo que tʉnajque's̈caway.

¹⁶Cuandu primeru tʉnicowájnʉj yos̈tujugum, nepʉn tʉs̈camajyiwu, nu'pʉjʉn tʉs̈cuyaguigau. Tʉnyo'jtap Dios ma perdona̱tcʉs̈.

¹⁷Po el Señor tʉs̈majyiu mit tʉs̈moy maj pa tʉcumplia̱t tʉs̈nʉmdacyo'ywa'n Cristu i-oyway noticia, pa we'n imaraugáj nu'pʉjʉn jeme caje'jatway judíujat. Mit Dios tʉs̈libra̱t autoridajat icʉ'jugujmat as̈am nanilibrá̱jtʉ león augʉtʉm.

¹⁸Mit el Señor tʉs̈libra̱táj de nu'pʉjʉn mal mit tʉs̈cuida̱táj hasta tʉcojawa'n mam Dios imanda̱t tsajpni'c. Na-oyninʉ́mga je' pa nu'pʉjʉn tiempu. Amén.

¹⁹Tʉnajyu'tp saludu pa Prisca, Aquila mit pa Onesíforo ifamilia.

²⁰Erasto tan nʉ'jcopac Corinto. Mit Trófimo tʉnyac tu'nij Miletojway na̱s̈.

²¹Cuji'cs̈i inmi'nwa'n antes itʉgʉywa'n payic. Is̈ajyu'tcajap saludu Eubulo, Pudente, Lino, Claudia mit nu'pʉjʉn hermanujat.

²²El Señor Jesucristu ma tan mit mi̱. Pi is̈moygac favor mijchat minu'pʉjʉjnat. Amén.