Read Sayula Popoluca Tito 2 Bible Online

Tito 2 - Sayula Popoluca bible

Tito 2

¹Po mi̱ ajque's̈ as̈am iguinʉm ayé oyway ama̱s̈an.

²Ajque's̈cʉs̈a na'waywájat ma pensa̱tca oy, ma yo'yga yacs̈ic, magatʉ'tswatcayu neti, ma cupʉjca oy, ma niwangʉjʉ, ma majmoyga cuandu iguitunas̈ca.

³We'ney ajchwaywájat ma niporta̱tcʉjʉ as̈am i-adora̱tcapay Dios, maga-ajca's̈ʉ'jca nejʉmay we̱t, magamu̱jcʉjʉ, ma yajca oyway ejemplu.

⁴Ma tsawiga yauto's̈ajyat ma wanga ina'jwat mit ma wanga-ey iwajyat.

⁵Magatʉ'tswatcayu neti, ma yo'yga limpiu, ma cuida̱tca itʉjcat, ma watca oy, ma jayaumayga ina'jwat, pa we'n nepʉn igatucojtsáj Dios ipalabra.

⁶Tsawigʉ́s̈ey ya̱wayna'jat magawatcada̱jca ma̱jlat.

⁷Actujawigʉs̈ ni'c mi̱ inwatp oy nu'pʉjʉn pa ma pʉjca tu'c oyway ejemplu. Actujawigʉs̈ ni'c inajque's̈p oyway ama̱s̈an, mit ma jawiga ni'c migatʉ'tscotspu,

⁸pi cots oy pa pigatsʉ̱na culpa̱tic, pa we'n tu'c mutsuguin inacwinchu̱gáj mit ca-oyáj is̈malninʉmgap.

⁹Tsawigʉs̈ ayé mozojat ma jayaumayga ijaycat pa ma iguigusta̱tcac nu'pʉjʉn lo que iwatcapay, mit magacochpo'nga,

¹⁰maganu'mgaja neti ijaycat, ma actujawiga ni'c ijayaumaygap oy nu'pʉjʉn. Ma watca nu'pʉjʉn ayʉ̱́j cosajat, pa we'n tsʉ̱náj oyninʉmic i-ama̱s̈an ayé Dios nas̈salva̱tcapay.

¹¹Dios nas̈actujawigap ni'c nas̈wangap mit iyac favor pa nu'pʉjʉn jayajwat ma tsʉ̱nga salva̱tic.

¹²Mit jinap Dios nas̈actujawigap ni'c nacuyáguiga nu'pʉjʉn mal igawampay je'. Nacuyáguiga-ey jeme iwangapay mal itpay en ayʉ̱́j mundu, mit nagawatcadá̱jca ma̱jlat. Nawátca lo que iyacs̈ta'cway, na-adorá̱tca Dios jinapay tiempu.

¹³Na-atsʉ̱́nga jeme nas̈acji'jcajámpay najo̱jtat, ni'c que's̈ta'gáj oymanac Jesucristu jeme nas̈salva̱tcapay, mit na-e'pcáj ayé Dios jeme mʉjninʉmicway.

¹⁴Je' iyac ivida pa nas̈chi'tcajáj nu'pʉjʉn mal na-aguepcapay, mit nas̈limpia̱tcawey pa nas̈je'jatcáj Dios, pa we'n nawangáj nas̈watcawa'n cosa oyway.

¹⁵Nʉmgʉs̈a we'n cupʉcpajyat, tsawigʉs̈ mit che'cta̱jcʉs̈ jeme iwatcapay mal. Inwatáj we'n as̈am tu'c jayau manda̱tpay. Camniyajcʉ is̈-e'pcáj menus.