Read Sayula Popoluca Filemón 1 Bible Online

Filemón 1 - Sayula Popoluca bible

Filemón 1

¹Ʉ̱ Pablo. Tʉtsʉ̱nap presu ni'c tʉncupʉcp Jesucristu. Ʉ̱ mit hermanu Timoteo tʉsaluda̱tcap mi̱ Filemón. Mi̱ tʉwangap mit is̈muyos̈watcap pa Cristu.

²Mit tʉnsaluda̱tcapey hermana Apia mit Archipo, mit je' lucha̱tp pa Cristu mit ʉjtsat. Tʉnsaluda̱tcap ayé cupʉcpajyat jeme ni-apʉcmujcʉjʉpay intʉcm.

³Dios Nate̱jat mit el Señor Jesucristu pi is̈moygac favor mit paz.

⁴Tʉnyʉjmap Dios ni'ctiyu̱s̈ cada tʉ-ora̱jtawa'n mi̱,

⁵ni'c tʉnmarap ni'c inwamp el Señor Jesús mit incupʉcp je', mit inwangʉs̈pey nu'pʉjʉn Dios ijayajwat.

⁶Tʉn-ora̱jtap Dios pa ma pichin oy lo que inwatpay ni'c inactujawigʉs̈p jayajwat lo que incupʉcpay pa je'jat ma cupʉjca-ey. Mit we'n inactu-is̈capcʉs̈áj cosa oyway na-aguepcapay ni'c nacupʉjcap Cristu Jesús.

⁷Hermanu, ji'go'cp tʉnjo̱jtat mit tʉtsʉ̱ngap contentu ni'c inmuniwangʉs̈ʉp jayajwat, mit mi̱ in-anima̱tcʉs̈p Dios ijayajwat.

⁸Mit Cristu tʉs̈moy derechu pa tʉmanda̱twa'n mi̱ pi wat lo que tʉnʉjmámpay,

⁹po como tʉwamp mi̱, tʉgamucotsp as̈am tu'c manda̱tpay po tʉyo'jtap favor. Mi̱ in-e'p ni'c ʉ̱ Pablo tʉna'wayanu mit jinap tʉtsʉ̱nap presu ni'c tʉncupʉcp Jesucristu.

¹⁰Tʉyo'jtap pa Onésimo. Je' tʉn-e'p as̈am tʉnwáy ni'c tʉnactugupʉc Cristu yam cuytujugum.

¹¹Mit Onésimo in-ampay mozo mit is̈pichijnau mal, po jinap is̈servia̱jtáj oy, mit ʉ̱ we'ney tʉs̈servia̱jtap oy.

¹²Mit jinap tʉ-ajyu'jtájatu Onésimo, mit impʉctsowáj je' oymanac ni'c ʉ̱ tʉnwano'cp je.

¹³Ʉ̱ tʉnwampate ma tan mit ʉ̱ ma tʉs̈servia̱jtac yam ilugar de mi̱ mientras tʉtsʉ̱nap presu por ayé oyway noticia.

¹⁴Po tʉngawanu tʉs̈watwa'n neti ni'c tʉga-ucyo'tu mi̱, pa we'n ayé oy inwatpay ingawatáj obliga̱tic, po inwatáj ingustuni'c.

¹⁵Je' is̈cupo'c pa tu'c tiempujyu po jinap tanáj mit mi̱ pa siempre. Tʉs̈jawi jemni'c ijajt we'n.

¹⁶Ingajapʉctsowáj as̈am tu'c mozo ni'c je' jatáj más que tu'c mozo. Je' jinap impʉctsowáj as̈am tu'c hermanu jeme nawangapay. Ʉ̱ tʉnwano'cp mit mi̱ inwa'náj más, ni'c je' inmupro̱wije̱way mit je' tu'c hermanu icupʉcpay el Señor.

¹⁷Te mi̱ inyʉmp ni'c ʉjtsat tu'gu nayos̈watcap pa Cristu, tʉnwampey pi pʉctsou je' as̈am ʉ̱ is̈pʉctso̱p.

¹⁸Mit te je' is̈wajtau mal o te is̈tajnau pʉjqui, yajcac tʉncuentani'c.

¹⁹Ʉ̱ Pablo tʉja'jyap mit tʉnfirma, ayé cuenta ʉ̱ tʉntso'gáj. Mit ʉ̱ oyapate tʉnʉjma ni'c mi̱ is̈pʉjqui más ni'c ʉ̱ tʉ-actugupʉc Cristu.

²⁰Mi̱ hermanu, wajtac favor is̈pʉctsowa'n Onésimo pa ma ji'c tʉnjo̱jt. Tʉyo'jtap ayʉ̱́j favor ni'c nacupʉjcap el Señor.

²¹Tʉja'jyap ni'c tʉnjawip ni'c mi̱ is̈jayaumayáj, mit tʉnjawip ni'c inwatáj más, caje'yu tʉyo'jtapay.

²²Mit tʉyo'jtapey pi is̈-oyajcac tu'c lugar pa ʉ̱, ni'c tʉnatsʉ̱nap tʉnʉs̈wa'n mam mijchat, po orá̱tca mʉgʉc pa Dios ma tʉs̈libra̱tac.

²³Is̈saluda̱tp Epafras jeme tsʉ̱napay presu mit ʉ̱ ni'c tʉncupʉjcap Cristu Jesús.

²⁴Is̈saluda̱tcapey Marcos, Aristarco, Demas mit Lucas jeme tʉs̈muyos̈watcapay pa Cristu.

²⁵El Señor Jesucristu pi is̈moygac favor minu'pʉjʉjnat. Amén.