Read Sayula Popoluca Hebreos 10 Bible Online

Hebreos 10 - Sayula Popoluca bible

Hebreos 10

¹Moisés iley que's̈ as̈am tu'c amu̱jʉc ni'c ca-oyawu itan pa siempre, solo jat we'n pa najáwiga ni'c mi'náj cosa ojyatway. Mit ja-icotstʉgʉygajau Dios aníma̱tnipin cada s̈iwit, po ne ayé cosajat ca-oyawu iguipichingajap oy ayé jayajwat jeme adora̱tcaway jem.

²Igapíchijnate oy ayé cosajat, canesita̱tpate iguicotscajawa'n Dios aníma̱tnipin. Mit jeme tʉgʉygaway adora̱tpay, ma tsʉ̱ngate limpiu pa siempre, igajanijawigájate ni'c iwatcau mal.

³Po como icotscajau Dios aníma̱tnipin cada s̈iwit, ayé inʉmo'jcʉu ni'c inijawi-í̱jcau ayé mal iwatcaway,

⁴ni'c ayé tu̱runipin mit chi̱bunipin ca-oyap iguichi'tcaja jayajwat ima̱jlat.

⁵Jemni'c cuandu Cristu imijn en ayʉ̱́j mundu, icumplia̱t inʉmway Dios ilibruni'c, inʉm: Ingawanu aníma̱tnipin ne ofrendajat, po ʉ̱ is̈yac pa tʉjatwa'n jayau.

⁶Ingapʉctso̱wu aníma̱jtat is̈no'jcajaway, ne ingapʉctso̱wu-ey jeme is̈cotscajaway pa jayajwat ima̱jlat.

⁷Cʉs̈ tʉnʉjmau: “Oh Dios, tʉmín pa tʉs̈watwa'n lo que mi̱ inwampay, as̈am itsʉ̱na ja'yic inlibruni'c ti tʉnwatámpay.”

⁸Primeru inʉjmau Dios: Ingawangʉs̈u aníma̱tnipin, ofrenda, ne aníma̱t no'guicway jeme is̈cotscajaway pa jayajwat ima̱jlat. Nejʉmay de ayé cosajat is̈ca-acji'jcawu injo̱jt, mit ayé iwatcau ni'c we'n iguinʉjm ley.

⁹Mit cʉs̈ inʉjmau: “Oh Dios, tʉmín pa tʉs̈watwa'n lo que mi̱ inwampay.” Dios ichi't ayé ampay ley jeme iwajtʉ'cway, mit jinap iyac tu'c cosa namay pa ʉjtsat nawátca lo que je' iwampay.

¹⁰Mit jinap natsʉ̱ngap aparta̱tic pa Dios ni'c Jesucristu iwat lo que Dios iwanway, ni'c je' ni-entrega̱jtʉu tu'mbagu pa i-o'cwa'n pa nu'pʉjʉn jayajwat.

¹¹Nu'pʉjʉn judíujat ipa̱nijat cada s̈ʉjw iyos̈wátcaj pa Dios mit iyajcau may veces nije'yu aníma̱tnipin, mit ayé nunca ca-oyawu iguichi'tcaja jayajwat ima̱jlat.

¹²Po Jesucristu tu'mbagu iguiyajc inipin pa iguitso'cwa'n nu'pʉjʉn mal nawatcaway, mit cʉs̈ nitsʉ̱nda̱jcʉu Dios i-oyimaycʉ'ni'c.

¹³Mit jem i-atsʉ̱náj hasta Dios iguivencia̱tcʉs̈wa'n imutsuguijnat.

¹⁴Mit como je' tu'mbagu iguiyajc inipin, i-acpichingʉs̈ oy pa siempre nu'pʉjʉn jeme i-aparta̱tcʉs̈way pa ije'.

¹⁵Mit Espíritu Santu nas̈actujawigap ni-as̈amu, ni'c inʉjmʉ'c Dios ilibruni'c:

¹⁶Ayʉ̱́j ayé nam acuerdu tʉnwatámpay mit je'jat yam una̱c s̈ʉjwat, inʉm el Señor: Tʉnajque's̈cʉs̈áj tʉnley ma mutanga ijo̱tni'jcat, mit imutangámpey icopacni'jcat.

¹⁷Mit siguia̱t iguinʉm: Tʉnyijawiyo'tcʉs̈áj nu'pʉjʉn mal iwatcaway.

¹⁸Mit te Dios nas̈perdona̱tcajau nama̱jlat ni'c nacupʉjcau Cristu, cajanesita̱tp nas̈cójtsa Dios tanti as̈am iguinʉjm ayé ampay ley.

¹⁹Hermanujat, jinap na-aguepcap confianza pa nas̈cutomigawa'n Dios en ayé lugar i-aparta̱tway pa ʉjtsat tsajpni'c, ni'c Cristu iyac inipin pa ʉjtsat.

²⁰Natʉgʉygáj jem ni'c je' tʉgʉjyʉ'c mam i-ijt ayé cortina itu-atujcaway ayé lugar aparta̱ticway templuni'c, ayé inʉmo'jcʉp ni'c je' iyac ivida pa ʉjtsat. Mit oyau iguiyac tu'c nam to̱u pa nas̈cutomigawa'n Dios, mit jem nas̈moygáj vida cacʉs̈ámpay.

²¹Mit na-aguepcap Cristu tu'c meru mʉjpa̱nij, mit je' icuida̱tcʉs̈ap Dios ijayajwat.

²²Jemni'c nacutómiga Dios mit nu'pʉjʉn najo̱jtat, nacupʉ́jca iyacs̈ta'cway nagadudá̱tca, mit je' nas̈limpia̱tcau pa nagajanijáwiga ma̱jlat, mit je' nas̈chi'tcajau nu'pʉjʉn mal nas̈mancha̱tcaway.

²³Namutánga mʉgʉc lo que nacupʉjcapay ni'c na-atsʉ̱ngap Dios, mit nagatígatsca lo que nacupʉjcapay ni'c Dios icumplia̱táj lo que iprometia̱tway.

²⁴Mit nanimájyigʉjʉ nanu'pʉjʉjnat mit nani-animá̱tcʉjʉ pa we'n naniwangʉjʉ̱́j más, mit nawátca oy.

²⁵Nagatentánga nani-apʉcmujcʉjʉwa'n as̈am cʉjtu'c iguicuyáguiga, más oy nanitsáwigʉjʉ. Mit más nanitsawigʉjʉ̱́j ni'c tomo'ganu pa imi'nwa'n Jesús.

²⁶Te na-is̈capcanup lo que iyacs̈ta'cway mit te nawatcap mal pa nas̈tu'mbajcuyaguigawa'n lo que nacupʉjcapay, Dios ca-oyap iguipʉctsou nejʉmay ofrendajat nacotscajámpay pa nama̱jlat.

²⁷Jeme iwatcámpay wename, ma pʉ̱tca ni'c je'jat itp ti iguijuzga̱tcáj Dios, mit Dios icastiga̱tcʉs̈áj imutsuguijnat mit icomgʉs̈áj en tu'c jʉjn tinimpay mʉgʉc pa ma cʉs̈ca.

²⁸Ni'c jeme igajayaumajyaway Moisés iley, triste i-o'jc te ijtʉu mechc o tu̱gup testigujat contra je'.

²⁹Mit itunas̈cáj más mʉgʉc ni'c iyajcau menus Dios iway, mit ni'c inʉmgap ni'c cavalia̱tp ayé nam acuerdu iyacway Jesús cuandu i-o'jc cunu̱s̈ni'c, mit por ayé acuerdu je'jat tsʉ̱ngau aparta̱tic pa Dios. Mit itunas̈cáj ni'c itucotscawey ayé Espíritu Santu iyacpay favor.

³⁰Najawigap ni'c el Señor Dios inʉm: “Ʉ̱ tʉncastiga̱táj mit tʉnactutso'gáj jeme iwatcapay mal.” Mit inʉmatu Dios ilibruni'c: “El Señor ijuzga̱tcʉs̈áj ijayajwat.”

³¹Jemni'c napʉ̱́tca nagaca'uga icʉ'jugum ayé Dios jeme tsʉ̱napay pa siempre.

³²Po nijáwiga ayé tiempu nas̈way. Cuandu cʉs̈ is̈namcupʉ́jcaj Dios, inmajmoygau cuandu is̈tunás̈caj mʉgʉc.

³³Iyacs̈ta'cway una̱c mijchat intunas̈cau mit is̈tucotscau jayau-awa'tsam. Mit ja-una̱c mijchat incotsmajyigau jeme itunas̈caway wename.

³⁴Mit inayo̱wis̈cawey jeme tsʉ̱ngaway presu, mit ji'c injo̱jtat cuandu maljayajwat is̈chi'tcajau nu'pʉjʉn inaguepcaway, ni'c injawigap ni'c impʉctsougáj tu'c lugar más oyway mit más jegámpay tsajpni'c.

³⁵Siguiá̱tca inconfia̱tcawa'n, ni'c we'n impʉctsougáj tu'c premiu más oyway.

³⁶Jemni'c oy pi majmoyga mit calma, ni'c cʉs̈wa'n is̈watca lo que Dios iwampay, impʉctsougáj lo que je' iprometia̱tway.

³⁷Inʉm Dios ilibruni'c: Cajati pa imi'nwa'n el Señor, ni'c je' itp ti imi'nwa'n, mit cajajegáj.

³⁸Po tu'c jayau yacs̈icway tsʉ̱náj oy ni'c cupʉcp, po te pitucp pa mugus̈á̱m tʉnga-e'po'jcʉ̱́j. We'n iguinʉjm Dios.

³⁹Po ʉjtsat nagawatcáj as̈am jeme pitujcapay pa itogoygawa'n, po ʉjtsat nacupʉjcáj mʉgʉc pa natsʉ̱ngawa'n salva̱tic.