Read Sayula Popoluca Hebreos 12 Bible Online

Hebreos 12 - Sayula Popoluca bible

Hebreos 12

¹Jinap ʉjtsat na-aguepcap mayo'c ampay jayajwat nas̈yajcajaway ejemplu nat nacupʉjcawa'n. Jemni'c nachi'tca nu'pʉjʉn cosa nas̈-u'tscapay, mit nu'pʉjʉn ma̱jlat nas̈ajca'ugapay, mit napujʉ'jca pa jʉpm en ayé carrera nas̈moygaway Dios, mit nagacutániga.

²Mit naga-e'pyájca Jesús, ni'c je' i-acchu̱chiu lo que nacupʉjcapay, mit je' nas̈acpichingáj oy. Je' ji'c ijo̱jt ni'c isalva̱tcʉs̈áj jayajwat, jemni'c je' imajmoy iguitunas̈ cunu̱s̈ni'c, mit igawatu cuenta jeme iguitucotscaway. Mit jinap je' tsʉ̱nap mʉjninʉmic i-oyimaycʉ'ni'c Dios mam je' imanda̱t.

³Nijáwiga lo que iwatway Jesús ni'c je' itunas̈ cuandu iguipʉctʉgʉygau maljayajwat, pa we'n miganicansa̱tcʉjʉ̱́j ne migadesmaya̱tcáj.

⁴Mijchat milucha̱tcap mit ma̱jlat, po inganitunas̈cap hasta pa in-o'jcawa'n.

⁵¿Mijchat inyijawiyo'tcaway nat is̈tsawigau Dios? ni'c je' is̈-e'pcap as̈am is̈wajyat. Mit inʉm ilibruni'c: Hijo, wat cuenta cuandu el Señor is̈acyacs̈p pa pi jayaumay, mit camdesmaya̱t cundu is̈che'cta'gáj.

⁶Ni'c el Señor jeme iwampay, i-acyacs̈áj, mit nu'pʉjʉn iwayjatpay, icastiga̱táj.

⁷Mit oy pi majmoyga cuandu Dios is̈acyacs̈cáj, ni'c je' is̈-e'pcap as̈am is̈wajyat. Ni'c siempre tu'c jayau itp ti igui-acyacs̈wa'n iway pa ma jayaumay.

⁸Ni'c nu'pʉjʉn Dios iwajyat, je' i-acyacs̈cʉs̈p, mit te Dios is̈ca-acyacs̈cap mijchat, miyo'ygájate as̈am pejpejnat ni'c caje' Dios is̈wajyat.

⁹Natsʉ̱ngap en ayʉ̱́j mundu, na-aguepcap nate̱jtat, mit je'jat nas̈acyacs̈cap mit narespeta̱tcap je'jat. Jinap más oy najayaumáyga nate̱jtat Dios tsajpni'cway, mit natsʉ̱ngáj oy.

¹⁰Mit nate̱jtat nas̈acyacs̈cau pa tu'c tiempujyu natu je'jat iguijáwigaj. Po Dios nas̈acyacs̈cap pa natsʉ̱ngawa'n oy, pa we'n natsʉ̱ngáj aparta̱tic de nu'pʉjʉn mal as̈am je' itsʉ̱na.

¹¹Cuandu meru nas̈acyacs̈cap Dios, caji'cp najo̱jtat, po cʉs̈wa'n ayé nas̈pichijnap más oy ni'c napʉctangap nas̈watcawa'n lo que iyacs̈ta'cway, mit natsʉ̱ngáj en paz mit Dios.

¹²Jemni'c ni-animá̱tcʉjʉ mit moyga maj inhermanujat.

¹³Mit che'nga to̱u yacs̈icway mam inyo'ygawa'n, pa we'n jeme yo'ygapay desanima̱tic ma pʉjca maj, mit magapichinga yacs̈icto̱uni'c iyacway Dios.

¹⁴Siguiá̱tca intsʉ̱ngawa'n en paz minu'pʉjʉjnat, mit tsʉ̱nga-ey limpiu injo̱tni'jcat. Ni'c jeme catsʉ̱ngapay aparta̱tic de nu'pʉjʉn mal, ca-oyáj igui-e'pca el Señor Dios.

¹⁵Nicuidá̱tcʉjʉ nepʉn magacuyagui ayé favor iyacpay Dios, magaca's̈ʉ'c tu'c maljayau mam mijchat mit is̈actogoyda̱jcáj, mit oyap iguijimbʉ'n nu'pʉjʉn cupʉcpajyat.

¹⁶Maga-it mam mijchat tu'c malwatpayna', ne maga-itey tu'c jeme inijawiyo'támpay jaran Dios, as̈am iguiwajt Esaú, ni'c por tu'c cayan ito'ctʉgʉy iderechu pa iguimutanwa'n nu'pʉjʉn.

¹⁷Mit injawigap ni'c cʉs̈ iguiwajt we'n, ijawanatu ma iguibendiciona̱tac ite̱t, po ite̱t igajawanu iguipʉctsowáj. Mit caja-oyawu itigats lo que iwatway Esaú, mit je' jajʉyate.

¹⁸Jinap mijchat incutomigap Dios, caje' as̈am ampay jayajwat iguicutómigaj ayé copac Sinaí pa iguimaraugajawa'n Dios iley. Mit ayé copac icutomigaway tinin mʉgʉc, mit cʉs̈ chitimito'c itajn, mit chu̱chiu s̈e'mtu̱.

¹⁹Mit imaraugau ni'c ya̱s̈ trompeta, mit imaraugau ni'c Dios cots. Mit je'jat iyo'tcajau Dios ma iguigamucotscac más.

²⁰Ni'c ca-oyawu iguimajmoyga lo que imanda̱tway Dios, ni'c inʉm te tu'c aníma̱t itute'mp ayé copac, ipojcajáj mit tsa', o icotcáj mit tu'c cujy jʉpacway.

²¹Mit igui-acpʉ̱tcau mʉgʉc lo que i-is̈caway, hasta Moisés inʉm: “Tʉpʉ̱to'cp mit hasta tʉyaratp.”

²²Po jinap mijchat incutomigau ayé copac Sion mam i-ijtʉ inʉ'jcopac Dios jeme tsʉ̱napay pa siempre. Ayé inʉmo'jcʉp Jerusalén tsajpni'cway mam itsʉ̱nga miles de ángejlat apʉcmuguic pa igui-adora̱tcawa'n Dios.

²³Mit jem itsʉ̱nga apʉcmuguic jeme Dios icupiugʉs̈way. Je'jat tsʉ̱ngap jem ni'c inʉ'jyat tsʉ̱ngap ja'ygu'tic en ayé libru ijtʉpay Dios. Mit jemey itsʉ̱na Dios jeme ijuzga̱tcʉs̈ámpay nu'pʉjʉn jayajwat, mit jemey itsʉ̱nga ayé jayajwat yacs̈ijcatway jeme pichingaway oy.

²⁴Mit jemey itsʉ̱na Jesús jeme i-acchu̱chiway ayé nam acuerdu pa jayajwat ma tsʉ̱nga oy mit Dios. Mit je' i-acpujʉ'c inipin pa natsʉ̱nga perdona̱tic, mit ayé caje' as̈am Abel inipin, ni'c ayé iyo't pa jayajwatitsʉ̱ngawa'n castiga̱tic.

²⁵Jinap márauga cuandu is̈mucotscap Dios. Ni'c ayé ampay jayajwat igamaraugawu Dios, mit ca-oyawu iguicupo'jca ayé castigu, mit Dios itsawigʉs̈ yam na̱s̈ni'c. Mit ʉjtsat más ca-oyáj napo'jca te nagamaraugap Dios jeme nas̈tsawigapay desde tsajpni'c.

²⁶Ayé tiempu icojts Dios hasta i-acyʉgʉn na̱s̈, po jinap iprometia̱t, mit inʉm ilibruni'c: “Jatu'mbac tʉnacyʉgʉnáj na̱s̈ mit tʉnacyʉgʉnámpey tsajp.”

²⁷Mit cuandu iguinʉm jatu'mbac i-acyʉgʉnáj na̱s̈ mit tsajp, ayé inʉmo'jcʉp ni'c Dios i-actogoyáj nu'pʉjʉn cosa catanámpay pa siempre, ni'c cʉs̈áj nu'pʉjʉn cosa waticway na̱s̈ni'c mit tsajpni'c, pa we'n tanáj ayé cosajat jeme nunca cacʉs̈pay.

²⁸Mit jinap napʉctsougau tu'c lugar catogoypay mam Dios imanda̱t tsajpni'c, mit jemni'c nanʉmí̱jcaja Dios ni'ctiyu̱s̈. Mit naserviá̱tcaja Dios, napʉ̱́tca je' mit narespetá̱tca as̈am je' iguiwa'n.

²⁹Ni'c Dios as̈am tu'c jʉjn jeme ino'cpay nu'pʉjʉn ma̱jlat.