Read Sayula Popoluca Hebreos 13 Bible Online

Hebreos 13 - Sayula Popoluca bible

Hebreos 13

¹Siguiá̱tca inyiwangʉjʉwa'n as̈am hermanujat ni'c incupʉjcap Cristu.

²Camnijawiyo'tca is̈pʉctsougawa'n oy Dios ijayajwat, ni'c cʉjtu'c ámbanu ipʉctsougau Dios i-ángejlat, mit canimoygʉjʉwu cuenta te ángejlat.

³Nijáwiga jeme tsʉ̱ngapay presu as̈am mitsʉ̱ngapayey presu mit je'jat. Mit nijawiga-ey jeme itunas̈capay as̈am intunas̈capayey mit je'jat.

⁴Nu'pʉjʉn jayajwat ma respeta̱tca ayé cʉ'pa't mit nepʉn magaburla̱t icʉ'pa't, ni'c Dios icondena̱tcʉs̈áj nu'pʉjʉn chajyo'ypajyat.

⁵Campensa̱tí̱jca pa is̈aguepcawa'n may tumi̱n, po tsʉ̱́nga contentu mit lo que inaguepcapay. Ni'c Dios inʉm: “Ʉ̱ tʉganijawiyo'tcʉs̈áj ne tʉgacuyaguigʉs̈áj.”

⁶Jemni'c naconfiá̱tca pa nas̈nʉmgawa'n: El Señor nas̈majyigáj, nagapʉ̱tcáj nejʉmay jayau iwa'námpay nas̈watcajáj mal.

⁷Nijawiga ayé jayajwat is̈cuida̱tcaway, ni'c je'jat is̈ajque's̈cajau Dios ipalabra. Nijáwiga ni'c je'jat yo'ygau oy hasta i-o'jcaj, mit cupʉ́jca as̈am je'jat icupʉ́jcaj.

⁸Jesucristu catigatsp ni'c je' nije'yu ámbanu, jinap mit pa nu'pʉjʉn tiempu.

⁹Camniyajcʉjʉ is̈ajque's̈cajáj nejʉmay ama̱s̈an tigatsicway mit inga-is̈capcapay, ni'c más is̈moygap maj ayé favor iyacway Dios injo̱tni'jcat. Mit caje' is̈cupiugawa'n cayan, ni'c jeme iwatcapay wename nunca iga-aprovecha̱tcap neti.

¹⁰Po ʉjtsat nacupʉjcap Cristu jeme iyacway inipin cunu̱s̈ni'c, mit jeme isiguia̱tcapay ayé ampay creencia itway ámbanu ca-itcʉjʉp parte mit ʉjtsat.

¹¹Ambanu judíujat imʉjpa̱nijat imutʉgʉy aníma̱tnipin en ayé lugar aparta̱ticway pa Dios, mit icojtsau Dios pa jayajwat ima̱jlat. Po ayé aníma̱jtat icuerpujat ino'jcajau pe'ta̱m de ayé laj mam itsʉ̱ngaj.

¹²Mit we'ney Jesús itunas̈ pe'ta̱m de ayé mʉjway nʉ'jcopac Jerusalén, mit iyac inipin pa igui-aparta̱tcʉs̈wa'n ijayajwat pa je'.

¹³Nayo'yga as̈am je' iyo'jy pa nas̈tunas̈cawa'n as̈am je' iguitunas̈ pe'ta̱m de ayé nʉ'jcopac. Mit jemni'c ʉjtsat nas̈tucotscapey maljayajwat.

¹⁴Ʉjtsat yam naga-aguepcap tu'c nʉ'jcopac mam natangawa'n pa siempre. Po nache'ngap ayé nʉ'jcopac itámpay tsajpni'c.

¹⁵Mit como nacupʉjcanup Jesús, itp ti nas̈mʉjninʉmgawa'n Dios ni'c te nawatcap we'n, ayé más oy que nu'pʉjʉn ofrenda icotscajaway Dios ámbanu. Mit más oy nanʉ́mga ni'c je' iwatp oy.

¹⁶Mit naganijawiyo'tca nas̈watcawa'n oy mit namájyiga jeme nesitá̱tijcatway, ni'c ayé as̈am tu'c ofrenda i-acji'jcapay Dios ijo̱jt.

¹⁷Jayaumáyga ayé jayajwat is̈cuida̱tcapay mit watca lo que is̈nʉmgajámpay. Ni'c je'jat is̈cuida̱tcap, ni'c itp ti iguiyajcawa'n cuenta mit Dios ti iwatcaway mit mijchat. Mit te injayaumaygap catu'ngáj ijo̱jtat. Po te ingajayaumaygap, je'jat ca-opámpey is̈majyigap.

¹⁸Orá̱tca pa ʉjtsat. Tʉtsʉ̱ngap seguru ni'c tʉnwatcap oy nu'pʉjʉn cosajat, mit tʉnwangap tʉyo'ygawa'n oy en nu'pʉjʉn tʉnwatcapay.

¹⁹Mit más tʉyo'tcʉs̈ap pi orá̱tca, pa tʉtsʉ̱nawa'natu más pronto mit mijchat.

²⁰Mit ayé Dios iyacpay paz i-acjutucta̱c el Señor Jesucristu mam itsʉ̱nga á̱nimajat, mit je' icuida̱tcʉs̈p nu'pʉjʉn cupʉcpajyat, mit je' más mʉjninʉmic, ni'c je' o'c pa igui-acchu̱chiwa'n tu'c nam acuerdu, mit ayé acuerdu tanáj pa siempre.

²¹Je' pi is̈majyigac pa is̈watcawa'n yos̈ oyway mit pa is̈watcajawa'n lo que je' iwampay, mit pa is̈acji'jcajawa'n je' ijo̱jt ni'c inmutʉgʉygau Jesucristu. Namʉjninʉ́mga je' pa nu'pʉjʉn tiempu. Amén.

²²Hermanujat, tʉtsawigʉs̈p pi mutanga nu'pʉjʉn tʉnʉmgʉs̈away, ni'c tʉgaja'ygʉs̈awu mayo'c en ayʉ̱́j noc.

²³Pi jawiga ni'c Timoteo pichinway cuytujugum, mit je' tu'c hermanu nawano'jcapay. Te mimp pronto yam, tʉnʉs̈cáj tʉ-e'pca mijchat.

²⁴Saludá̱tca ayé jayajwat is̈cuida̱tcapay, mit we'ney nu'pʉjʉn Dios ijayajwat. Jeme tsʉ̱ngapay Italiajway na̱s̈ is̈saluda̱tcap.

²⁵Dios pi is̈moygac favor mijchat minu'pʉjʉjnat. Amén.