Read Sayula Popoluca Hebreos 2 Bible Online

Hebreos 2 - Sayula Popoluca bible

Hebreos 2

¹Jemni'c oy nawátca más cuenta ayé cosajat namaraugaway, pa nagacunʉ́s̈iga jatu'c laj.

²Ni'c nu'pʉjʉn inʉmgaway ángejlat pichin iyacs̈ta'cway, mit nu'pʉjʉn ampay jayajwat iwatcaway mal mit cajayaumaygaway, Dios oyo'gu igui-actutso̱jcʉs̈ jaran.

³Te wename ijajt ámbanu, ʉjtsat ca-oyámpey napo'jca te nagawatcap cuenta tu'c mʉjway salvación. Mit ayé salvación el Señor i-anuncia̱jtʉ'c, mit jeme imaraugaway nas̈nʉmgajau ni'c ayé iyacs̈ta'cway.

⁴We'ney Dios i-actujawigʉs̈ jayajwat ni'c iyacs̈ta'cway ni'c i-actu-is̈cʉs̈ ipoder, mit i-acnigu-epigʉs̈ʉu mit ayé milagrujat iwatway. Mit i-ajyu'tcʉs̈au Espíritu Santu, mit imoygʉs̈ cada jayau as̈am je' iguiwajn.

⁵Dios igamoygʉs̈u ángejlat ma manda̱tca ayé nam mundu mi'námpay, mit jinap na-ampiugap de ayé nam mundu.

⁶Dios itumuyajcʉs̈ jayajwat nu'pʉjʉn cosajat, ni'c tu'c jayau imucots Dios en tu'c salmu, inʉm: ¿Ti valia̱tp tu'c jayau pa is̈nijawiwa'n je'? Tini'c is̈wat cuenta tu'c jayau?

⁷Mi̱ inyajcʉs̈ jayajwat más menus que ángejlat, po inyajcʉs̈ mʉjninʉmijcat, mit intumuyajcʉs̈ nu'pʉjʉn inwatway,

⁸nu'pʉjʉn cosajat inactudomina̱tcʉs̈. Ni'c Dios itumuyajcʉs̈ jayajwat nu'pʉjʉn cosajat, po majawe'naj cani-oyap iguidomina̱tca nu'pʉjʉn cosajat.

⁹Po najawigap ni'c Jesús Dios iguiyac más menus que ángejlat pa tu'c tiempujyu. Dios nas̈wano'jcau mit iyac iway ma o'c pa nu'pʉjʉn jayajwat ma nisalva̱tcʉjʉ, mit jemni'c iyagatu más mʉjninʉmic que ángejlat ni'c je' itunas̈ cuandu i-o'jc.

¹⁰Nu'pʉjʉn cosajat Dios i-actambʉ'mp mit je' iwat nu'pʉjʉn. Mit Dios inʉm ni'c oy iguitunas̈wa'n iway pa ma pichin oy, pa we'n oyáj igui-acnisalva̱tcʉs̈ʉ jayajwat, pa iguimunʉs̈cʉs̈wa'n yucm mam i-oymanagui.

¹¹Ni'c jeme ilimpia̱tcʉs̈away ima̱jlat mit jeme tsʉ̱ngapay limpiu itcʉjʉp tu'gu Dios iguimanda̱tcapay. Jemni'c Jesús cawinchu̱gap iguinʉm ni'c je'jati-e'pcʉs̈p as̈am ije̱wajyat.

¹²Ni'c inʉm Dios ilibruni'c: Tʉnje̱wajyat tʉ-actu-is̈capcʉs̈áj mi̱, tʉn-ʉwáj himnujat pa tʉmʉjninʉmwa'n mam itsʉ̱nga jayajwat apʉcmuguijcat.

¹³Mit inʉmatu: Ʉ̱ tʉconfia̱táj mit je'. Mit inʉmey: E'pca, yam tʉtsʉ̱na mit Dios iwajyat jeme tʉs̈moygʉs̈way.

¹⁴Ʉjtsat najayajwat en ayʉ̱́j mundu, jemni'c Jesús jatey jayau, mit je' o'c pa igui-actogoyda̱jcawa'n Awayagatsna' ipoder, ni'c ayé poder nas̈ago'jcap.

¹⁵Mit Jesús nas̈libra̱tcau nanu'pʉjʉjnat, ni'c Awayagatsna' nas̈actsʉ̱ngau domina̱tic nu'pʉjʉn navidajat ni'c napʉ̱tcapate na-o'jcawa'n.

¹⁶Iyacs̈ta'cway Jesús igamajyigʉs̈u ángejlat, más iwan iguimajyigʉs̈wa'n nu'pʉjʉn jayajwat ni'c je'jat pichingau Abraham ifamiliani'c.

¹⁷Jemni'c Jesús it ti ijajt jayau pa igui-e'pcʉs̈wa'n jayajwat as̈am ije̱wajyat, mit pa itanwa'n je' meru mʉjpa̱nij pa iguiservia̱jtawa'n Dios, ni'c je' más ayo̱wis̈p mit más cumplia̱tp, mit itso̱jcʉs̈au nu'pʉjʉn jayajwat ima̱jlat.

¹⁸Mit como je' itunas̈ cuandu iguitenta̱t ma̱lwayna', jinap je' ijtʉp poder pa iguimajyigʉs̈wa'n jeme yo'ygapay tenta̱tic.