Read Sayula Popoluca Hebreos 3 Bible Online

Hebreos 3 - Sayula Popoluca bible

Hebreos 3

¹Hermanujat, Dios is̈aparta̱tcaway pa je', mit is̈ya̱s̈cau pa intsʉ̱ngawa'n mit je' tsajpni'c. Jemni'c watca cuenta Cristu Jesús jeme Dios i-ajyu'tway, mit je' meru mʉjpa̱nij ni'c nas̈yajcajau lo que nacupʉjcapay.

²Mit je' icumplia̱jtau nu'pʉjʉn ni'c je' Dios iguiyac pa ma iguiservia̱jtac, mit we'ney Moisés icumplia̱t ni'c iservia̱tcʉs̈awey Dios ijayajwat.

³Mit Jesús más mʉjninʉmic que Moisés, ni'c tu'c tʉcwatpay más mʉjninʉmic que tu'c tʉjcuida̱tpay.

⁴Nu'pʉjʉn tʉjc itp pʉn iguiwatway, po nu'pʉjʉn cosa itpay ayé Dios iwat.

⁵Iyacs̈ta'cway Moisés as̈am mozo icumplia̱t nu'pʉjʉn ni'c iservia̱tcʉs̈au Dios ijayajwat, mit i-ajque's̈cʉs̈au nu'pʉjʉn lo que inʉmámpay Dios.

⁶Po Cristu más cumplia̱tp pa iguiservia̱tcʉs̈awa'n Dios ijayajwat ni'c je' Dios iway, mit ʉjtsat Dios nas̈jayajwat te nasiguia̱tcap mʉgʉc naconfia̱tca hasta nas̈-e'pcawa'n je', mit ji'cp najo̱jtat ni'c na-atsʉ̱ngap je'.

⁷Mit Espíritu Santu inʉm Dios ilibruni'c: Te inmaraugajap jinap Dios ipalabra,

⁸camcopacmʉgʉcwátca as̈am iguiwátcaj inte̱jtat ámbanu, cuandu tʉs̈ac-awa'nigau, ni'c iwangau tʉs̈proba̱tcáj mam igatsʉ̱na nepʉn.

⁹Mit jem tʉs̈proba̱tcau inte̱jtat ámbanu, mit i-is̈cau ni'c cuarenta s̈iwit tʉnwatcʉs̈au oy.

¹⁰Mit jemni'c tʉnmu-awa'nigʉs̈ ayé jayajwat, mit cʉs̈ tnyʉm: “Siempre je'jat pensa̱tcap pa icunʉs̈igawa'n, mit iga-is̈capcawu ayé to̱u tʉnmoygʉs̈way.”

¹¹Mit tʉnmu-awa'nigʉs̈, jemni'c tʉs̈jura̱jt ni'c cacoygáj mam tʉs̈acpo'cs̈cʉs̈wa'n.

¹²Hermanujat, jinap nicuidá̱tcʉjʉ, pigaduda̱tca mit is̈watcawa'n mal cosajat. Te inwatcap we'n, oyáj is̈cuyaguiga ayé Dios jeme tsʉ̱napay pa siempre.

¹³Más oy pi nitsawigʉjʉ cada s̈ʉjw, pa pi aprovecha̱tca jinapay tiempu, mit nepʉn mam mijchat magacopacmʉgʉcwát, mit iniwe̱jtʉwa'n mit mal cosajat.

¹⁴Ni'c natsʉ̱ngáj mit Cristu te naconfia̱tcap mʉgʉc. As̈am nachú̱chigaj naconfiá̱tca, we'n nasiguiá̱tca hasta te nagacoygap mam je' itsʉ̱na.

¹⁵Ni'c we'n iguinʉjm Dios ilibruni'c: Te inmaraugajap jinap tʉmpalabra, camcopacmʉgʉcwátca, as̈am tʉs̈ac-awa'nigau inte̱jtat ámbanuway.

¹⁶¿Pʉjnat ayé imaraugaway Dios mit cʉs̈ igui-ac-awa'nigau? Igui-ac-awa'nigau nu'pʉjʉn ayé jayajwat jeme Moisés i-acpichingʉs̈way Egiptojway na̱s̈.

¹⁷¿Mit pʉjnat Dios imu-awa'nigʉs̈ cuarenta s̈iwit? Imu-awa'nigʉs̈ jeme iwatcaway mal, mit aye'jat jemu i-o'jcaj mam igatsʉ̱na nepʉn.

¹⁸¿Mit pʉjnat inʉmgʉs̈au Dios ni'c cacoygáj mam ipo'cs̈cawa'n? Inʉmgʉs̈au ayé jeme cajayaumaygaway.

¹⁹Mit najawigap ni'c ca-oyawu icoyga ni'c cacupʉjcawu iyacs̈ta'cway.