Read Sayula Popoluca Hebreos 4 Bible Online

Hebreos 4 - Sayula Popoluca bible

Hebreos 4

¹Dios nas̈yajcajau promesa pa nacóyga tsajpni'c mam nas̈acpo'cs̈cáj. Po jinap oy napʉ̱́tca nagaca'uga, ma is̈canʉmgajac nepʉn ni'c migacoygáj mam impo'cs̈cawa'n.

²Ni'c ʉjtsat nas̈moygawey oyway noticia as̈amu je'jat, po je'jat iga-aprovecha̱tcawu lo que imaraugaway, ni'c imaraugau po igacupʉjcawu.

³Po ʉjtsat nacupʉjcapay iyacs̈ta'cway nacoygáj mam napo'cs̈cawa'n, as̈am iguinʉjm Dios ilibruni'c: Tʉnmu-awa'nigʉs̈, jemni'c tʉs̈jura̱jt ni'c cacoygáj mam tʉs̈acpo'cs̈cʉs̈wa'n. Ni'c Dios cuandu cʉs̈ iguiwajt mundu, je' po'cs̈.

⁴Ni'c tu'c jayau inʉm Dios ilibruni'c de ayé po'cs̈ans̈ʉjw: Cʉs̈ iguiwajt Dios nu'pʉjʉn iyos̈, je' po'cs̈ imusietes̈ʉjway.

⁵Mit inʉm jatu'c laj Dios ilibruni'c: Cacoygáj mam tʉs̈acpo'cs̈cʉs̈wa'n.

⁶Mit cʉjtu'c oyáj icoyga, po aye'jat inʉjmʉ'jcajaway ayé oyway noticia ca-oyawu icoyga ni'c cajayaumaygawu.

⁷Jemni'c Dios nas̈yajcajau jinapay tiempu pa najayaumaygawa'n. Mit i-actunʉmey David: Te inmaraugajap jinap Dios ipalabra, camcopacmʉgʉcwátca.

⁸Ni'c Josué ma moygʉs̈ate ayé ampay jayajwat pa ipo'cs̈cawa'n, iganʉmájate Dios ni'c itp jatu'c lugar mam napo'cs̈cawa'n.

⁹Jemni'c Dios imoygʉs̈áj tu'c lugar tsajpni'c mam ipo'cs̈cawa'n ijayajwat.

¹⁰Ni'c pʉn po'cs̈ámpay mit Dios, ayé ni'c cʉs̈way iguiwat iyos̈, as̈am Dios iguiwajt.

¹¹Nasiguiá̱tca mʉgʉc pa nacoygawa'n en ayé lugar mam napo'cs̈cawa'n, pa nagaca'uga-ey as̈am ayé jayajwat jeme cajayaumaygaway.

¹²Ni'c Dios ipalabra nas̈moygap vida mit ijtʉp poder, mit más tsucp ni'c ayé as̈am tu'c espada me'icway mechc laj. Ni'c Dios ipalabra i-actujawip nat itsʉ̱na tu'c jayau ijo̱jt, mit i-actujawipey ti iwatpay tu'c jayau. Mit i-actu-is̈cap nat ipensa̱t tu'c jayau mit ti iyo'tpay ijo̱jt.

¹³Mit ca-itp tu'c cosa iwatway Dios iganijawiyámpay je'. Po nu'pʉjʉn cosa itpay je' i-e'p mit ca-oyap neti itsʉ̱na cuyu'tsic, mit ʉjtsat nanʉmgajámpey Dios ti nawatcaway.

¹⁴Jinap na-aguepcap tu'c meru mʉjpa̱nij mit je' coy meru mam itsʉ̱na Dios tsajpni'c, mit ayé Jesús Dios iway. Jemni'c nasiguiá̱tca mʉgʉc mit lo que nacupʉjcapay.

¹⁵Na-aguepcap tu'c mʉjpa̱nij, mit ayé Jesús. Je' oyap nas̈-ayo̱wis̈cap cuandu nas̈ca-aguepcawa'n maj pa navencia̱tcawa'n, ni'c je' tsʉ̱nau proba̱tic en nu'pʉjʉn as̈amu ʉjtsat, po je' igawatu nejʉmay mal.

¹⁶Jemni'c naconfiá̱tca nas̈cutomigawa'n Dios itrononi'c ni'c je' nas̈wano'jcap, pa we'n nas̈-ayo̱wis̈cámpey mit nas̈majyigáj cuandu nas̈nesita̱tcawa'n tanti.