Read Sayula Popoluca Hebreos 5 Bible Online

Hebreos 5 - Sayula Popoluca bible

Hebreos 5

¹Ambanu ayé judíujat icupiugau jayajwat jeme tanámpay de mʉjpa̱nij. Mit ayé mʉjpa̱nijat servia̱tcau pa jayajwat ma tsʉ̱nga oy mit Dios, mit icotscajau ofrendajat pa Dios mit aníma̱tnipin pa iguitso̱jcawa'n ayé jayajwat nu'pʉjʉn mal iwatcaway.

²Ayé ampay mʉjpa̱nijat i-aguepcajau calma jeme iga-is̈capcapay neti mit igajawigapay lo que iwatcapay, ni'c ayé mʉjpa̱nijat tsʉ̱ngawey débil as̈amu ʉjtsat.

³Mit jemni'c it ti iguicótscaja Dios aníma̱tnipin pa je'jat ima̱jlat mit we'ney pa nu'pʉjʉn jayajwat iwatcaway mal.

⁴Ambanu nepʉn ca-oyawu itan je'yu de mʉjpa̱nij. Ni'c jeme tanámpay, ayé ni'c Dios igui-aparta̱t mit iguicupi̱u, as̈am ámbanu iguicupijw Aarón.

⁵We'ney Cristu iganʉmu je'yu ni'c tanáj de mʉjpa̱nij, po je' Dios iguicupi̱u mit iguimʉjninʉm, mit iguinʉjmau: Mi̱j ayé tʉ̱wáy, jinap tʉwayját ʉ̱.

⁶Inʉmey jatu'c laj Dios ilibruni'c: Mi̱ mitanáj mʉjpa̱nij pa siempre, as̈am itajn mʉjpa̱nij Melquisedec.

⁷Mit Cristu cuandu iyo'jy yam as̈am jayau, i-ora̱jtau mit iyo'jtau mʉgʉc Dios ma iguimajyiyac, mit ijʉjyau mʉgʉc. Je' ijawiu ni'c Dios oyapate iguilibra̱tp maga-o'c, po Dios imarau lo que iyo'tway ni'c je' iguirespeta̱t.

⁸Mit je' Dios iway mit je' jayaumay en nu'pʉjʉn, po majawe'naj it ti iguitunas̈, pa we'n ipʉctanáj pa ijayaumaywa'n más.

⁹Mit como pichin oy, je' oyap iguisalva̱tcʉs̈ pa siempre nu'pʉjʉn iguijayaumaygámpay.

¹⁰Mit Dios iguiyac pa itanwa'n meru mʉjpa̱nij, as̈am iguiyajc Melquisedec.

¹¹Tʉnaguep mayo'c tʉnʉmgʉs̈ámpay pa is̈jawigawa'n de Melquisedec, mit ayé majo'c pa tʉ-ajque's̈cʉs̈awa'n ni'c cani-oyap is̈-entendiá̱tca.

¹²Oyapate is̈ajque's̈caja Dios ipalabra ni'c jego'cway incupʉ́jcaj, po jinap itp ti is̈ajque's̈cajámnaj ni'c inganipʉctangap Dios i-ama̱s̈an nas̈ajque's̈ʉ'jcajaway. Mijchat inyesita̱tcapnaj as̈am leche mit caje' cayan.

¹³Ni'c nu'pʉjʉn i-u̱cpaynaj leche, ayé as̈am yauya̱wájat, cani-oyap igui-is̈cap ayé yacs̈icway to̱u nas̈moygapay Dios.

¹⁴Po jeme icayganupay nu'pʉjʉn, ayé ni'c jayajwatanu, ni'c je'jat imuyujcaway mit i-is̈capcanup ti ayé oyway mit ma̱lway.