Read Sayula Popoluca Hebreos 7 Bible Online

Hebreos 7 - Sayula Popoluca bible

Hebreos 7

¹Mit Melquisedec tsʉ̱nau rey nʉ'jcopac Salem, mit Dios yucmay iguiyac de mʉjpa̱nij. Mit je' pichin iguipa̱jtsou Abraham cuandu iguivencia̱tcʉs̈ ayé rejyat. Mit Melquisedec ibendiciona̱t Abraham.

²Mit Abraham i-aparta̱t ayé biejnat i-actsʉ̱naway en ayé tsuguin, mit imoy tu'c parte Melquisedec pa diezmu. Mit Melquisedec inʉ'jy inʉmo'jcʉp tu'c rey iwatpay iyacs̈ta'cway, mit we'ney tsʉ̱nau rey Salem, mit ayé inʉmo'jcʉp tu'c rey iyacpay paz.

³Mit nepʉn igajawip pʉn ima̱m mit pʉn ite̱t, mit ifamiliajat catsʉ̱ngap ja'ygu'tic Dios ilibruni'c, mit nepʉn igajawip mu̱tij i-ijt ne mu̱tij i-o'jc, mit tsʉ̱nau as̈am Dios iway ni'c tan mʉjpa̱nij pa siempre.

⁴E'pca nat itsʉ̱na mʉjninʉmic Melquisedec, hasta iguimoy Abraham nate̱jtat diezmu, tu'c parte de ayé biejnat i-actsʉ̱naway en ayé tsuguin.

⁵Mit solo jeme pichingaway Leví ifamiliani'c icupiugau pa itangawa'n de mʉjpa̱nij, mit je'jat itcʉjʉu orden pa iguipʉctsougawa'n diezmujat, ni'c we'n iguinʉjm Moisés iley. Mit ayé diezmu iyajcau nije'yu ifamiliajat, ni'c je'jat pichingau Abraham ifamiliani'c mit obliga̱tic iguiyajcawa'n diezmu.

⁶Po Melquisedec capichinu Leví ifamiliani'c, po majawe'naj je' ipʉctsojwau Abraham idiezmu, mit ibendiciona̱t Abraham jeme ipʉctso̱way ayé promesa.

⁷Najawigap ni'c Melquisedec más mʉjninʉmic que Abraham, ni'c más mʉjninʉmic jeme bendiciona̱tpay que jeme ipʉctso̱pay ayé bendición.

⁸Mit Leví ifamiliajat ipʉctsougau diezmujat, mit je'jat o'jcau. Po Melquisedec ipʉctso̱u diezmu, mit inʉm Dios ilibruni'c ni'c je' tsʉ̱nap as̈am ca-o'guicway.

⁹Mit oyapey nas̈nʉm ni'c as̈am Abraham iguimojy diezmu Melquisedec, nu'pʉjʉn Leví ifamiliajat casi imoygawey diezmu Melquisedec, mit je'jatate ayé ipʉctsougámpay diezmujat.

¹⁰Ni'c wejpu'n Leví cani-itp cuandu Melquisedec oy iguipa̱jtsou Abraham, ni'c Leví pichin Abraham ifamiliani'c.

¹¹Ayé pa̱nijat jeme pichingaway Leví ifamiliani'c iyajcajau ley ma jayaumayga ayé jayajwat. Ma pichingate oy ayé pa̱nijat mit jeme ipʉctsougaway ayé ley, ¿tini'c ica's̈ʉ'cwa'n jatu'c mʉjpa̱nij as̈am Melquisedec, mit caje' as̈am Aarón itajn mʉjpa̱nij?

¹²Po como Dios itigats ayé mʉjpa̱nijat, it ti iguitigajtsey ayé ley.

¹³Mit el Señor Jesucristu ayé mʉjpa̱nij jeme tsʉ̱napay as̈am Melquisedec, mit je' pichin en jatu'c familia, mit ayé familia ca-ijtʉwu derechu iguisacrifica̱tcawa'n aníma̱jtat pa Dios, as̈am ayé pa̱nijat iguiwátcaj jeme pichingaway Leví ifamiliani'c.

¹⁴Najawigap ni'c el Señor Jesucristu pichin Judá ifamiliani'c, mit Moisés iganʉmu ni'c Judá ifamiliajat pichingáj mʉjpa̱nijat.

¹⁵Mit jinap najawigap más claru, ni'c pichin jatu'c mʉjpa̱nij as̈amu Melquisedec.

¹⁶Ni'c Jesús cajatu mʉjpa̱nij as̈am imanda̱t Moisés iley, ni'c ayé ley inʉm ni'c ma pichinga pa̱nijat Leví ifamiliani'c. Po Jesús jat mʉjpa̱nij ni'c Dios iguimoy poder pa igacʉs̈wa'n nunca.

¹⁷Ni'c Dios inʉjmau je': Mi̱ mimʉjpa̱nij pa siempre, as̈am itajn mʉjpa̱nij Melquisedec.

¹⁸Mit tamp togoyda'guic ayé mandamientu itway primeru, ni'c ca-oyawu nas̈majyigap ne ca-ijtʉwu provechu.

¹⁹Mit como ayé ley nas̈ca-acpichingawu oy, jinap na-atsʉ̱ngap tu'c cosa más oyway ni'c Cristu nas̈ajcoygáj mam Dios.

²⁰Jesús tan mʉjpa̱nij ni'c Dios we'n ijura̱jt.

²¹Po ayé ampay jayajwat cuandu itángaj de pa̱nijat, ca-itu nejʉmay juramentu. Po Jesús Dios iguijura̱jtau, as̈am iguinʉjm ilibruni'c: El Señor Dios jura̱t, mit igatigatsáj lo que inʉmway: “Mi̱ mimʉjpa̱nij pa siempre, as̈am itajn mʉjpa̱nij Melquisedec.”

²²Jemni'c itanwa'n más seguru ayé nam acuerdu iwatway Jesús, mit ayé acuerdu más oy que ayé ampay ley.

²³Ni'c ámbanu mayo'c jeme tangaway de pa̱nijat, ca-oyawu isiguia̱tca ni'c o'jcau.

²⁴Po Jesús tan de mʉjpa̱nij pa siempre, mit ayé nunca catigatsáj ni'c je' ca-o'gáj.

²⁵Jemni'c je' oyap iguisalva̱tcʉs̈ pa siempre nu'pʉjʉn jayajwat icutomigapay Dios ni'c je'jat imutʉgʉygau Jesús. Mit Jesús nas̈majyigap, ni'c je' siempre tsʉ̱nap pa iguiyo'jtawa'n Dios pa ʉjtsat.

²⁶Jinap natsʉ̱ngap oy ni'c na-aguepcap tu'c mʉjpa̱nij as̈amay Jesús, ni'c je' limpiu, iga-is̈capu nejʉmay mal, camancha̱tic mit mal, catsʉ̱nap mit maljayajwat, mit je' tsʉ̱nap más mʉjninʉmic tsajpni'c.

²⁷Mit Jesús caje' as̈am ayé mʉjpa̱nijat ámbanuway, ni'c je'jat iyaguí̱jcau aníma̱tnipin, primeru pa je'jat ima̱jlat, mit cʉs̈ iyajcawatu pa jayajwat ima̱jlat. Po Jesús tu'mbagu iguiyajc inipin ni'c ni-entrega̱jtʉu pa i-o'cwa'n pa ʉjtsat.

²⁸Moisés iley iyac mʉjpa̱nijat jeme capichingaway oy, po más después de ayé ley, Dios jura̱t pa iguiyacwa'n iway de mʉjpa̱nij, mit je' pichin oy pa siempre.