Read Sayula Popoluca Hebreos 8 Bible Online

Hebreos 8 - Sayula Popoluca bible

Hebreos 8

¹Tʉnʉmgʉs̈away mayo'c cosajat po tʉnwamp más pi jawiga ayʉ̱́j: ni'c na-aguepcap tu'c meru mʉjpa̱nij as̈amay Jesús, mit je' nitsʉ̱nda̱jcʉu i-oyimaycʉ'ni'c Dios mam je' imanda̱t, mit je' tsʉ̱nap mʉjninʉmic tsajpni'c.

²Mit jinap Jesús tsʉ̱nap de mʉjpa̱nij en ayé lugar i-aparta̱tway Dios tsajpni'c, mit ayé lugar el Señor iwat, mit ayé igawatcawu jayajwat.

³Nu'pʉjʉn ayé ampay mʉjpa̱nijat icupiugau pa iguicotscajawa'n Dios ofrendajat mit aníma̱tnipin. Jemni'c Jesús itey ti iguiyajc je'yu inipin.

⁴Ma tsʉ̱na-ate Jesús yam na̱s̈ni'c, ca-oyájate itan mʉjpa̱nij, ni'c itp may pa̱nijat jeme icotscajapay Dios ofrendajat, as̈am iguinʉm Moisés iley.

⁵Mit ayé ampay pa̱nijat iservia̱tcajau Dios en tu'c tʉjc, mit ayé tʉjc as̈am ayé lugar i-aparta̱tway Dios tsajpni'c. Ni'c Dios inajau Moisés antes iguiwajt ayé tʉjc, inʉm: “Wat ayʉ̱́j tʉjc as̈am tʉ-actu-is̈ cuandu intsʉ̱naj en ayé copac Sinaí.”

⁶Po jinap Cristu iservia̱jtap Dios más oy que pa̱nijat, ni'c je' iwat tu'c acuerdu más oyway pa jayajwat ma tsʉ̱nga oy mit Dios, mit más oy lo que iprometia̱tway mit ayé nam acuerdu.

⁷Mit ma pichinate oy ayé ampay acuerdu, Dios igawatájate jatu'c nam acuerdu.

⁸Mit Dios i-actujawigʉs̈ iculpajat, as̈am iguinʉjm ilibruni'c: Inʉm el Señor: Itáj tiempu cuandu tʉs̈watwa'n tu'c nam acuerdu mit Israelway jayajwat mit we'ney Judá ijayajwat.

⁹Po caje' as̈am ayé acuerdu tʉnwajtʉ'cway mit ite̱jtat ámbanuway cuandu tʉs̈acpichingʉs̈ Egiptojway na̱s̈, mit ʉ̱ tʉnwejnu'pcʉs̈au. Je'jat igamutangawu tʉn-acuerdu, jemni'c tʉs̈cuyaguigʉs̈. We'n iguinʉjm el Señor.

¹⁰Mit ayʉ̱́j ayé nam acuerdu tʉnwatámpay mit Israelway jayajwat yam una̱c s̈ʉjwat: Inʉm el Señor: Tʉnajque's̈cʉs̈áj tʉnley ma mutanga icopacni'jcat, mit imutangámpey ijo̱tni'jcat. Mit ʉ̱ tʉtanáj Dios pa je'jat, mit je'jat tangáj pa tʉnjayajwat.

¹¹Mit cajanesita̱táj igui-ajque's̈awa'n nepʉn imupro̱wije̱way ma tʉs̈-is̈capac ʉ̱, ne iga-ajque's̈ámpey ije̱way, ni'c nu'pʉjʉn jayajwat tʉs̈-is̈capcáj ʉ̱, desde más na'wajyat hasta más titicwájatnajway.

¹²Ni'c tʉmperdona̱tcʉs̈áj jeme iwatcaway mal, mit tʉnyijawiyo'tcʉs̈áj nu'pʉjʉn mal iwatcaway.

¹³Po como Dios iwat nam acuerdu, ayé inʉmo'jcʉp ni'c ampayo'ganu ayé acuerdu iwajtʉ'cway. Mit ayé ampay acuerdu cu-ampayip más, mit cajati pa itogoynuwa'n.