Read Sayula Popoluca Santiago 1 Bible Online

Santiago 1 - Sayula Popoluca bible

Santiago 1

¹Ʉ̱ Santiago. Tʉnservia̱jtap Dios mit el Señor Jesucristu. Tʉnsaluda̱tcʉs̈p nu'pʉjʉn judíujat jeme tsʉ̱ngapay s̈is̈cada'guic jʉmba'tu.

²Tʉnhermanujat, ma ji'jca injo̱jtat cuandu is̈mingajáj may pruebajat.

³Injawigap ni'c is̈mingajap pruebajat pa pi jawiga te micupʉjcap iyacs̈ta'cway, ni'c we'n oyáj is̈majmóyga más.

⁴Po siguiá̱tca majmóyga pa impichingawa'n oy, neti ma is̈catogoygac, pi tsʉ̱nga nu'tsic.

⁵Te tu'c jayau mam intsʉ̱nga iguitogoyp pa iguijawiwa'n más, ma yo'jta Dios mit Dios iguimo'áj, ni'c Dios nas̈moygap pa najawiga nu'pʉjʉn, mit igache'cp nepʉn.

⁶Po ma cupʉc jeme iyo'támpay, mit magaduda̱t nes̈ʉ̱n. Ni'c jeme duda̱tpay ayé as̈am tu'c nʉ-ola lama̱tni'cway jeme iguicus̈újipay s̈e'm, mit jʉmgapa'tu iguimunʉcs̈p.

⁷Ayé jayau duda̱tpay magapensa̱t ni'c iguimo'áj tanti el Señor.

⁸Ayé jayau ipensa̱tpay mechc cosa ca-oyap iyo'y en tu'gu to̱u.

⁹Ayé hermanu pro̱wijway ma ji'c ijo̱jt ni'c Dios igui-ajca's̈ʉ'cway.

¹⁰Po jeme tsʉ̱napay ricu ma ji'c ijo̱jt cuandu Dios igui-acmanagáj. Ni'c tu'c ricu iguijatáj as̈am tu'c ma'jts ipijic ica'u.

¹¹Ni'c ipichijn s̈ʉjw mit ijajic, i-actʉ̱tsp ayé ma'jts mit ipijic cuca'p, mit togoyp i-oymanacway. Wename-ey icʉs̈wa'n tu'c ricu nu'pʉjʉn iwatpay.

¹²Tsʉ̱náj oy ayé jayau jeme imajmoypay pruebajat. Ni'c jeme pichimpay oy mit ayé pruebajat, ipʉctsowáj tu'c premiu, mit ayé premiu inʉmo'jcʉp vida cacʉs̈ámpay, ni'c Dios iprometia̱tp iguimoygʉs̈wa'n jeme je' iguiwangapay.

¹³Cuandu tu'c jayau tenta̱tic pa iguiwatwa'n mal, maganʉm ni'c Dios iguitenta̱tp. Ni'c Dios ca-oyap itsʉ̱na tenta̱tic mit ma̱jlat, mit je' igatenta̱tp nepʉn.

¹⁴Ni'c cada jayau tenta̱tic cuandu ijo̱jt iguiyo'jtap pa iguiwatwa'n mal, mit iguijo̱tju'p ayé ma̱jlat.

¹⁵Mit iguitajnáj ayé mal iwampay, más iwa'náj ayé ma̱jlat, mit ayé ma̱jlat iye'cwa'n más mʉj, cʉs̈wa'n igui-actogoyáj.

¹⁶Tʉnhermanujat jeme tʉwangʉs̈pay, pi is̈cawe̱jta̱jcac nepʉn.

¹⁷Dios yucmay nas̈moygap nu'pʉjʉn cosa oyway mit nu'pʉjʉn más oymanacway. Je' nas̈acmingajap nu'pʉjʉn, mit je' iyac nu'pʉjʉn ta'cs̈capay yucm. Mit je' catigatsp as̈am tu'c amu̱jʉc itigats.

¹⁸Dios nas̈wayjatcau ni'c nacupʉjcajau ipalabra jeme iyacs̈ta'cway pa ʉjtsat natsʉ̱́nga as̈am nas̈primerwajyat, ni'c we'n je' iguiwajn.

¹⁹Tʉnhermanujat jeme tʉwangʉs̈pay, jawiga ni'c nu'pʉjʉn jayajwat ma cuji'cs̈iga iguimaraugawa'n, mit magacotsca jaran, ne maga-awa'niga-ey jaran.

²⁰Ni'c te tu'c jayau awa'nip, igawatp oy as̈am Dios iguiwa'n.

²¹Jemni'c cuyáguiga nu'pʉjʉn mal mit niju'pcʉjʉ mam i-it ma̱jlat. Pʉctsóuga oymanac ayé palabra Dios is̈yajcajaway mijchat, mit ayé oyap is̈salva̱tcap.

²²Po watca lo que inʉmpay Dios, caje' pa is̈maraugawa'nu, caje' inyiwe̱tcʉjʉwa'n mijchatu.

²³Ni'c te tu'c jayau imarap lo que inʉmpay Dios mit igajayaumayp, ayé as̈am tu'c jayau jeme i-e'pay iwindugʉt is̈ticni'c.

²⁴Ni'c je' ni-ís̈ʉu mit cʉs̈ nʉcs̈, mit pe'beto'gatu iguinijawiyo'jt nat ini-ís̈ʉj.

²⁵Po tsʉ̱náj oy tu'c jayau jeme iganijawiyo'tpay Dios iley, ni'c Dios iley yacs̈igo'c mit nas̈libra̱tcap. Je' imutamp ijo̱tni'c, mit iganijawiyo'tp lo que imaraway, po iwatp lo que Dios imanda̱tpay.

²⁶Te tu'c jayau inʉmp ni'c i-adora̱tp Dios po igadomina̱tp lo que inʉmpay, ayé je'yu niwe̱jtʉp, mit jalmanu iguinʉm ni'c i-adora̱tp Dios.

²⁷Jeme i-adora̱tpay Dios iyacs̈ta'cway mit camotic mit ma̱jlat mam Dios Nate̱jat igui-e'p ma wat yename: ma majyigʉs̈ cuya̱macwájat mit cu-o'cwájat cuandu iguitunas̈ca, mit ma nicuida̱jtʉ maganijijnʉ mit ma̱jlat itpay en ayʉ̱́j mundu.