Read Sayula Popoluca Santiago 3 Bible Online

Santiago 3 - Sayula Popoluca bible

Santiago 3

¹Tʉnhermanujat, nagatʉ'tstʉgʉygayu de ajque's̈pay. Najawigap ni'c ʉjtsat na-ajque's̈capay, Dios nas̈-ucyo'tcáj más mʉgʉc te nawatcau oy.

²Ni'c nu'pʉjʉn ʉjtsat nawatcapnaj ma̱jlat. Te tu'c jayau igajanʉmp ma̱jlat, ayé jayau iwatp oy mit oyap iguidomina̱t nu'pʉjʉn iwatpay.

³Nacomgajap frenu tu'c cawa̱yu i-auni'c pa nas̈jayaumaygáj, mit nadomina̱tcajap nu'pʉjʉn icuerpu.

⁴E'pca-ey tu'c barcu majamʉjo'gaj, mit tu'c s̈e'm mʉgʉcway iguimunʉcs̈p, po ituju'pje̱guí̱jcap tu'c timonwáy, mit we'n oyap iguimunʉs̈ acyo'ypayna' mamu iguiwa'n.

⁵We'ney nato̱jts titigo'c, po i-acchu̱chip mayo'c cosajat. Wename-ey tu'c titic jʉn-áratsic igui-actoy tu'c cujyuc mʉjway.

⁶Mit nato̱jts as̈amey jʉjn ni'c i-acchu̱chip nu'pʉjʉn mal, mit ayé tu'c parte itpay nacuerpuni'c mit ayé nas̈acnijingʉjʉp mit ma̱jlat, mit oyap igui-actogoy nu'pʉjʉn navida, ni'c ayé ma̱jlat nanʉmpay i-acchu̱chiu Awayagatsna'.

⁷Jayajwat oyap iguidomina̱tca nu'pʉjʉn aníma̱jtat, jojnat, tsanajyat, mit aníma̱jtat lama̱tni'jcatway, mit domina̱tic igui-actsʉ̱́nga.

⁸Po nejʉmay jayau ca-oyap iguidomina̱t ito̱jts, ni'c nato̱tsni'c ipichin nu'pʉjʉn mal nanʉmpay, mit nepʉn ca-oyap igui-atuc, mit ayé as̈am tu'c venenu nas̈ago'cpay.

⁹Mit na-ajw natu-oyninʉmgap Dios Nate̱jat, mit nije'yu na-ajw natumalninʉmgap jayajwat jeme Dios iwatcʉs̈way as̈am je'.

¹⁰Mit nije'yu na-ajw natu-oyninʉmgap mit natumalninʉmgap. Tʉnhermanujat, ca-oy nas̈watca we'n.

¹¹¿Is̈jawiga oyap ipichin mam imu't nʉ' cadutsnʉ' mit ca̱mpa'cnʉ'?

¹²Tʉnhermanujat, ¿is̈jawiga oyap tu'c higuera-cujy iguiyac aceituna, o oyap tu'c uva-poj iguiyac higu? Wename najawigap ni'c mam imu't nʉ', ca-oyap iguiyac ca̱mpa'cnʉ' mit cadutsnʉ'.

¹³Te tu'c jayau mam mijchat más ijawip mit más i-is̈cap, ma nas̈actujawigaguéy te iwatp oy. Mit te ijawip may, maganimʉjninʉjmʉ cuandu iguiwatwa'n oy.

¹⁴Po te in-angap jeme ijtʉpay mit te mitsuguinwatcap, camnimʉjninʉmgʉjʉ. Ni'c jalmanu is̈jawiga lo que iyacs̈ta'cway, po ingawatcap.

¹⁵Dios is̈camoygap pi is̈capca mal cosajat. Ayé mal inis̈capcapay, ayé yamujyu ichu̱chi en ayʉ̱́j mundu, ni'c ayé mal inis̈capcapay, jayajwat i-acchu̱chigau. Ayé mal cosajat Awayagatsna' is̈moygau pi jawiga.

¹⁶Ni'c te na-angap jeme ijtʉpay o te natsuguinwatí̱jcap, nagatsʉ̱ngap tranquilu ni'c nawatcap puru mal.

¹⁷Po jeme Dios nas̈actujawigapay, primeru ayé nas̈acyo'ygap limpiu, nas̈acniwangʉjʉp, nas̈acjayaumaygap, nas̈actu-ayo̱wis̈cap namupro̱wije̱way, Dios iyacp puru cosa oyway pa nagawétca mit nagatígatsca lo que nanʉmgapay.

¹⁸Jeme iche'ngapay paz, igawatcap tsuguin pa nu'pʉjʉn ma watca lo que iyacs̈ta'cway.