Read Sayula Popoluca Santiago 4 Bible Online

Santiago 4 - Sayula Popoluca bible

Santiago 4

¹¿Nat ichu̱chi tu'c tsuguin mit tini'c inyi-ago'jcʉjʉ mijchat? Is̈actuwatcap mal lo que iyo'tpay injo̱jtat.

²Mijchat inyijatcap tu'c cosa hasta mi-ago'jcap pa is̈aguepcawa'n lo que inwangapay. Inwangap jayje' mit mitsuguinwatcap ni'c ca-oyap is̈pʉctsouga lo que inwangapay. Inga-aguepcap neti ni'c ingayo'tcajap Dios.

³Inyo'tcap po ingapʉctsougap, ni'c inyo'tcap mal pa is̈malgasta̱tcawa'n mit ti inwangapay.

⁴Mijchat ingajatcap cumplia̱tca. Oy pi jawiga ni'c te inwangap mal itpay en ayʉ̱́j mundu, inyajcap Dios as̈am inmutsuguijnat. Pʉmba'tu jeme i-amigujatpay jayajwat iwangapay mal itpay en ayʉ̱́j mundu, ayé Dios imutsuguin.

⁵Injawigap ni'c caje' jalmanu jeme tsʉ̱napay ja'yic Dios ilibruni'c: “Ayé Espíritu Santu jeme tsʉ̱napay najo̱tni'c, iwamp nawánga je'.”

⁶Je' nas̈wangap mit nas̈moygap favor. Jemni'c itsʉ̱na ja'yic Dios ilibruni'c: “Dios igapʉctsougʉs̈p jeme nimʉjninʉmgʉjʉpay, po imoygʉs̈p may favor pa jeme canimʉjninʉmgʉjʉpay.”

⁷Ni-entregá̱tcʉjʉ mit Dios. Majmóyga is̈tenta̱tcáj Awayagatsna', mit je' is̈cupo'jcáj.

⁸Cutómiga Dios, mit Dios is̈cutomigáj mijchat. Maljayajwat, camjawatca mal. Mijchat jeme impensa̱tcapay mechc cosa, yo'tcaja Dios pi is̈limpia̱tcac.

⁹Mijchat jeme inwatcapay mal pi tsʉ̱nga triste, ma tu'nga injo̱jtat, pi jʉyga may. Te mis̈i̱jcapate, jinap jʉ́yga. Te ji'cpate injo̱jtat, jinap tsʉ̱́nga triste.

¹⁰Camnimʉjninʉmgʉjʉ mam Dios is̈-e'pcáj, mit je' is̈mʉjninʉmgáj.

¹¹Hermanujat, camnitucotscʉjʉ mijchat. Jeme itucotsámpay mit imalninʉmámpay ihermanu, itucojtsap mit imalninʉjmap Dios iley. Po te mijchat inmalninʉmgap ley, ingajayaumaygap ley, miniwatcʉjʉp as̈am juezat iyajcapay ley.

¹²Itp tu'c jeme iyacway ley mit ayé Dios, mit je' ayé Juez. Je' oyap iguisalva̱t mit oyap igui-actogoy jeme iguigajayaumaypay. Mijchat migaje'jat juezat pa is̈malninʉmgawa'n inmupro̱wije̱way.

¹³Mijchat inyʉmgap: “Jinap o jobom nanʉs̈cáj en tu'c nʉ'jcopac mit natsʉ̱ngáj tu'c s̈iwit, mit najuygáj tanti pa nas̈to'jcawa'n, mit na-actsʉ̱ngáj may tumi̱n.”

¹⁴Mit ingajawigap ti jatámpay jobom. Ni'c ¿as̈am ti ayé navida? Navida as̈am tu'c ma̱nic ni'c que's̈p s̈ʉ̱n, cʉs̈wa'n togoypatu.

¹⁵Po más oy pi nʉmga: “Te Dios iwamp, na-aguepcáj vida, mit nawatcáj ayʉ̱́jway o jatu'c cosa.”

¹⁶Po jinap mijchat minimʉjninʉmgʉjʉp. Malo'c nanimʉjninʉ́jmʉ we'n.

¹⁷Te tu'c jayau ijawip pa iguiwatwa'n oy po igawatp, ayé jayau iwatp mal.