Read Sayula Popoluca Santiago 5 Bible Online

Santiago 5 - Sayula Popoluca bible

Santiago 5

¹Márauga ricujat, jʉ́yga mit ma tu'nga injo̱jtat ni'c mi'náj tiempu pa is̈tunas̈cawa'n.

²Pu̱tscada'guic intumi̱jnat itsʉ̱na, mit injamujcat iguicaygap na̱s̈wech.

³In-orojat mit implatajat chijtito'gaj itsʉ̱nga, mit ayé servia̱tp pa testigu contra mijchat, mit por ayé chijtit is̈condena̱tcáj jʉngʉtʉm. Natsʉ̱ngap últimu s̈ʉjwat po mijchat más inwatcap cuenta is̈apʉcmujca may tumi̱n.

⁴Inyos̈watpajyat jeme i-ajca's̈ʉ'jcaway incosechajat, jʉygap ni'c ingatso̱jcap, inwe̱jta̱jcapu. Mit Dios jeme imanda̱tpay nu'pʉjʉn imarap ijʉyga ayé yos̈watpajyat.

⁵En ayʉ̱́j mundu mitsʉ̱ngap oy mit inaguepcap tiyu inwangapay. Inwatcap lo que iyo'tpay injo̱jtat as̈am aníma̱t i-acye'cpʉjcapay pa igui-ago'jcawa'n.

⁶Inactunas̈cau mit inago'jcau tu'c jayau igawatway neti, mit je' ca-oyawu inicowajnʉ.

⁷Jemni'c hermanujat, atsʉ̱́nga mit calma hasta imi'nwa'n el Señor. E'pca as̈am tu'c camwatpay i-atsʉ̱nap tu'c cosecha oyway mit may calma hasta imi'nwa'n primer tu̱ mit jatu'c tu̱ ituye'gámpay ayé cosecha.

⁸Atsʉ̱́nga-ey mijchat mit calma. Nimajmóygʉjʉ ni'c tomo'ganu pa imi'nwa'n el Señor.

⁹Hermanujat, camniqueja̱tcʉjʉ mijchat pa pigatsʉ̱nga castiga̱tic mit Dios, ni'c je' ayé Juez mit tomo'c itsʉ̱na.

¹⁰Tʉnhermanujat, pʉjca ejemplu mit ayé profetajat jeme cotscaway pa el Señor, ni'c itunas̈cau may po imajmoygau mit calma.

¹¹Injawigap ni'c oyninʉmijcat ayé jeme imajmoygapay cuandu iguitunas̈ca. Inmaraugaway nat Job iguimajmojy cuandu iguitunas̈. Mit injawigap ni'c cʉs̈ iguitunas̈, el Señor iguimajyiwatu, ni'c el Señor ayo̱wis̈o'cp mit jayawano'cp.

¹²Tʉnhermanujat, más oy pi nijawiga ayʉ̱́j: Camtʉ'tsjura̱tcayu, ne por itpay tsajpni'c, ne por itpay na̱s̈ni'c, ne por jatu'c juramentu. Te inyʉmgap jo̱, nʉmga ni'c jo̱. Te inyʉmgap ca̱j, nʉmga ni'c ca̱j, pi is̈cacondena̱tcac Dios.

¹³Te itunas̈p tu'c jayau mam intsʉ̱nga, ma ora̱t. Te ji'cp ijo̱jt tu'c jayau, ma ʉu pa iguimʉjninʉmwa'n Dios.

¹⁴Te tu'nij tambʉn mam intsʉ̱nga, ma ya̱s̈ca jayajwat jeme icuida̱tcapay cupʉcpajyat, ma igui-ora̱tcajac mit ma iguijatscajac aceite, mit ma yo'tcaja el Señor ma iguimajyiyac.

¹⁵Mit te cupʉjcap mʉgʉc cuandu i-ora̱tca, el Señor i-ac-oytanáj ayé tu'nijway mit i-ajca's̈ʉ'gáj. Mit te iwat mal, Dios iguiperdona̱jtáj.

¹⁶Nu'pʉjʉn mijchat ajque's̈ca ayé mal inwatcaway, mit orá̱tca pa pi oytanga. Te tu'c jayau yo'ypay yacs̈ic ora̱tp mʉgʉc, Dios oyap iguipo'jnap jaran.

¹⁷Ayé profeta Elías tu'c jayau as̈am ʉjtsatey, mit ora̱t mʉgʉc pa magami'n tu̱, mit caminu tu̱ na̱s̈ni'c pa tu̱gup s̈iwit mit seis meses.

¹⁸Mit cʉs̈ ora̱twatu, mit min tu̱, mit na̱s̈ i-acye'gatu nu'pʉjʉn cosecha.

¹⁹Hermanujat, te tu'c jayau mam intsʉ̱nga pichimp yacs̈icto̱uni'c, mit te tambʉn igui-acpitucpatu,

²⁰jawiga ni'c te i-acpitucp ayé maljayau jeme pichinway yacs̈icto̱uni'c, imajyiyáj magatogoy pa siempre, mit Dios iguiperdona̱jtáj ayé mal iwatway.