Read Sayula Popoluca 1 Pedro 2 Bible Online

1 Pedro 2 - Sayula Popoluca bible

1 Pedro 2

¹Jinap cuyáguiga nu'pʉjʉn ma̱jlat mit nu'pʉjʉn we̱jtat. Mit camniwe̱tcʉjʉ mijchatu. Cam-ánga jeme ijtʉpay más, mit camtucótsca nepʉn.

²Jinap mitsʉ̱ngap as̈am yauya̱wájat. Oy pi wanga tu'c leche camoticway mit ma̱jlat, ayé inʉmo'jcʉp ni'c pi wanga puru cosa oyway iyacpay Dios, pa we'n miye'jcáj mit mitsʉ̱ngáj salva̱tic.

³Ni'c injawigap ni'c el Señor jayawano'cp.

⁴Nacutómiga Cristu ni'c je' as̈am tu'c tsa' itsʉmtso̱pay nu'pʉjʉn, mit je' nas̈moygap vida. Jayajwat igawangawu Cristu, po Dios icupi̱u mit iwano'cp.

⁵Cristu is̈moygau nam vida ni'c inmutʉgʉygau je' mit jinap Dios is̈pʉjcáj as̈am tu'c templu mam je' itsʉ̱nawa'n. Mit Dios is̈-aparta̱tcau pa intsʉ̱ngawa'n as̈am pa̱nijat pa is̈servia̱tcajawa'n je', mit oyáj is̈cótscaja Dios tu'c ofrenda jeme je' ipʉctsowámpay, ni'c Cristu is̈moygap favor.

⁶Jemni'c ja'yic itsʉ̱na Dios ilibruni'c: Márauga. Tʉnyagáj nʉ'jcopac Sion tu'c tsa' meru tanámpay esquinani'c pa itsʉmwa'n más, mit ayé Dios icupi̱u, mit iwano'cp, mit jeme icupʉcpay je', cawinchu̱gáj.

⁷Jemni'c mijchat micupʉjcapay inwano'jcap je'. Po jeme cacupʉjcapay, icumplia̱tcanup jeme tsʉ̱napay ja'yic Dios ilibruni'c, inʉm: Ayé tsa' igawangaway tʉcwatpayna'jat, Ayé tamp pa esquinani'c pa itsʉmwa'n más.

⁸Mit inʉmey Dios ilibruni'c: Je'jat cunepigap en ayé tsa' mit igui-ajca'ugáj. Je'jat cunepigap en ayé tsa', mit ayé tsa' inʉmo'jcʉp Cristu ipalabra, ni'c ayé jayajwat igajayaumaygap lo que inʉmpay Cristu. Mit Dios inʉm ámbanu ni'c cunepigáj, ni'c cajayaumaygap.

⁹Dios is̈cupiugau pa is̈wayjatcáj. Dios as̈am rey mit je' is̈yajcau pa pa̱nijat pa is̈servia̱tcajawa'n je'. Dios is̈-aparta̱tcau mit is̈actangap pa je'. Jat we'n pa is̈nʉmdacyo'ygawa'n nu'pʉjʉn cosa oyway iwatpay Dios, ni'c Dios is̈ya̱s̈cau pa pi cuyaguiga nu'pʉjʉn mal, pa we'n miyo'ygáj Dios iluzni'c oymanacway.

¹⁰Mijchat primeru migaje'jat Dios is̈jayajwat, po jinap mijchat Dios is̈jayajwat. Primeru Dios is̈ca-ayo̱wis̈cawu, po jinap Dios is̈-ayo̱wis̈canup.

¹¹Mijchat tʉwangʉs̈pay, mitsʉ̱ngap as̈am pe'ta̱majyat en ayʉ̱́j mundu mit as̈am miyo'ygapay jayna̱s̈ni'c. Tʉnʉmgʉs̈ap pi niju'ptangʉjʉ de ayé ma̱jlat iyo'tpay injo̱jtat, ni'c ayé ma̱jlat oyap is̈atujcap mit is̈actogoygáj.

¹²Niportá̱tcʉjʉ oy mam is̈-e'pcap ayé jayajwat jeme iga-is̈capcapay Dios. Jinap is̈tucotscap ni'c mimaljayajwat, po majawe'naj i-e'pcáj ni'c inwatcap oy, mit i-oyninʉmgáj Dios en ayé s̈ʉjw cuandu i-arregla̱twa'n.

¹³Como injayaumaygap el Señor, jayaumáyga-ey nu'pʉjʉn jayajwat jeme manda̱tcapay. Más injayaumaygáj tu'c rey ni'c je' más manda̱tp.

¹⁴Jayaumáyga-ey gobernadojrat ni'c je'jat iyajcau pa iguicastiga̱tcawa'n maljayajwat mit pa igui-oyninʉmgawa'n jeme iwatcapay oy.

¹⁵Dios iwamp pi watca oy, pa we'n in-awatujcáj jeme iga-is̈capcapay Dios, ni'c je'jat igajawigap ti inʉmgapay.

¹⁶Jinap mitsʉ̱ngap libre po caje' pa is̈watcawa'n mal. Dios is̈libra̱tcau pa is̈servia̱tcajawa'n je'.

¹⁷Respetá̱tca nu'pʉjʉn jayajwat, wánga nu'pʉjʉn hermanujat, pʉ̱tca Dios mit respetá̱tca ayé rey jeme is̈manda̱tcapay.

¹⁸Mozojat, jayaumáyga mit respetá̱tca injaycat. Caje'yu jeme manda̱tcapay oy po we'ney jayaumáyga injaycat jeme iga-ayo̱wis̈capay nepʉn.

¹⁹Te is̈actunas̈cap ni'c inwatcap oy, Dios is̈-oyninʉmgáj, ni'c intunas̈cap ni'c inwatcap lo que je' iwampay. Solo oy pi majmoyga is̈tunas̈cawa'n.

²⁰Ni'c te is̈actunas̈cap ni'c inwatcap mal ¿pa ti oy te inmajmoygap? Po te intunas̈cap ni'c inwatcap oy mit inmajmoygap, iyacs̈ta'cway Dios is̈-oyninʉmgáj.

²¹Mit Dios is̈ya̱s̈cau pa is̈tunas̈cawa'n, ni'c we'ney Cristu itunas̈ pa ʉjtsat mit nas̈yajcajau ejemplu pa nayo'yga as̈am je' iyo'jy.

²²Cristu igawatu mal, ne cawe̱tu nunca.

²³Cuandu iguitucótscaj je', igapo'ngʉs̈u mal. Cuandu je' iguitunas̈, iganʉmu ni'c venga̱táj, po iyajcau nu'pʉjʉn Dios icʉ'jugum pa je' ma juzga̱tcʉs̈ yacs̈ic.

²⁴Cristu itunas̈ pa ʉjtsat mit itsʉm nu'pʉjʉn mal nawatcaway cuandu i-o'jc cunu̱s̈ni'c. Je' iwat we'n pa ʉjtsat natsʉ̱́nga libra̱tic pa nagajawátca mal, mit we'n nayo'ygáj yacs̈ic. Mit je' imoyta̱jcau pa mijchat pi oytanga.

²⁵Ni'c mijchat mitsʉ̱ngau as̈am borregujat jeme cunʉs̈igapay, po jinap incutomigau Cristu ni'c je' as̈am tu'c borregucuida̱tpay, mit je' icuida̱tp imvidajat.