Read Sayula Popoluca 1 Pedro 3 Bible Online

1 Pedro 3 - Sayula Popoluca bible

1 Pedro 3

¹We'ney mijchat to's̈ajyat jayaumáyga inya'jwat, mit te je'jat igacupʉjcajap Dios ipalabra, inganʉmgajáj neti po je'jat oyáj icupʉjca ni'c i-e'pcáj ni'c mijchat miniporta̱tcʉjʉp oy.

²Cupʉjcáj ni'c is̈-e'pcap ni'c miyo'ygap decente mit mirespeta̱tcap.

³Te minigutigatscʉjʉp mit luju, te miniguque'cs̈cʉjʉp oymanac, mit te mini-adorna̱tcʉjʉp mit oro, po camnimʉjninʉ́mgʉjʉ mit ayé.

⁴Más oy pi tsʉ̱nga oy mit Dios, pi tsʉ̱nga tranquilu mit pi watca oy. Mit te inwatcap we'n ayé as̈am tu'c adornu jeme catogoyámpay, mit ayé igui-acji'jcap Dios ijo̱jt.

⁵Ni'c ámbanu ayé to's̈ajyat jeme iwangaway Dios, más ipensa̱tcau pa itsʉ̱ngawa'n oy mit je'. Je'jat icupʉjcau Dios mit ijayaumaygau ina'jwat.

⁶We'ney Sara ijayaumay ina'u Abraham, mit inʉm ni'c je' iguimanda̱tp. Te mijayaumaygap as̈am Sara iguiwajt, inwatcáj oy mit ingapʉ̱tcáj neti.

⁷We'ney mijchat jayajwat, tsʉ̱́nga oy mit into's̈ajyat as̈am jayajwat jeme i-entendia̱tcapay, mit respetá̱tca ni'c tu'c to's̈ay más débil, ni'c miniméchcatij Dios is̈moygau favor pi aguepca vida. Te inwatcap we'n, Dios ipo'náj lo que inyo'tcajámpay.

⁸Tsʉ̱́nga en acuerdu minu'pʉjʉjnat, ni-ayo̱wís̈cʉjʉ, niwangʉjʉ as̈am hermanujat, ayo̱wís̈ca jayajwat, mit camnimʉjninʉ́mgʉjʉ.

⁹Camacpítujcaja mal jeme is̈watcajapay mal. Cammalninʉmga jeme is̈malninʉmgapay, más oy pi oyninʉmga. Injawigap ni'c Dios is̈ya̱s̈cau pa is̈-oyninʉmgáj mijchat.

¹⁰Ni'c jeme iwampay ivida, mit jeme iwampay itsʉ̱nawa'n oy cada s̈ʉjw, maganʉm cosa ma̱jlatway, mit magawe̱t nepʉn.

¹¹Ma cuyagui nu'pʉjʉn ma̱jlat, mit ma wat oy. Ma che'n pa itsʉ̱nawa'n tranquilu, mit ma siguia̱jta ayé.

¹²Ni'c el Señor icuida̱tp jeme iwatpay oy, mit je' ipo'ngʉs̈ap lo que iguiyo'tcajapay, po jeme iwatcapay mal, el Señor iga-e'po'jcʉs̈ʉp.

¹³¿Mit pʉn oyáj is̈watcajap mal te mijchat inwatí̱jcap oy?

¹⁴Po te intunas̈cap ni'c inwatcap oy, ma ji'jca injo̱jtat. Jemni'c campʉ̱tca nepʉn, ne cammoyga laj is̈apʉ̱tigáj.

¹⁵Po respetá̱tca Cristu el Señor mit nu'pʉjʉn injo̱jtat, pa je' ma is̈manda̱tcac. Tsʉ̱́nga prepara̱tic pa is̈po'ngawa'n nu'pʉjʉn jayajwat, ni'c iwangap is̈-ucyo'tcáj tini'c is̈atsʉ̱́nga Cristu, mit impo'ngáj oy mit may respetu.

¹⁶Pi jawiga te oy lo que inwatcapay, ni'c te is̈tucotscap, je'jat winchu̱cta̱jcáj ni'c i-e'pcáj ni'c miyo'ygap oy ni'c incupʉjcap Cristu.

¹⁷Te Dios iwamp, más oy pi tunas̈ca ni'c inwatcap oy, mit caje' is̈tunas̈cawa'n ni'c inwatcap mal.

¹⁸Ni'c Cristu itunas̈ey pa ʉjtsat, mit je' o'c tu'mbagu pa iguitso'cwa'n nu'pʉjʉn mal iwatcaway jayajwat. Cristu iwat oy po itunas̈ pa maljayajwat. Iwat we'n pa nas̈ajcoygáj mam Dios. Iyacs̈ta'cway je' o'c icuerpu po jutucta̱gatu.

¹⁹Cʉs̈ ijutucta̱jc Cristu, je' nʉcs̈ hasta mam á̱nimajat jeme tsʉ̱ngaway cʉtʉm as̈am presujat, mit inʉmgʉs̈au oyway noticia.

²⁰Ayé á̱nimajat cajayaumaygawu ámbanu en ayé tiempu itsʉ̱naj Noé. Wejpu'n Noé iwat ayé barcu, mit Dios ja-i-atsʉ̱ngʉs̈ ayé jayajwat ma cuyaguiga ima̱lway to̱jwat. Mit camayu nisalva̱tcʉjʉway. Solo ocho jayajwatu tʉgʉygau barcuni'c pa inisalva̱tcʉjʉwa'n.

²¹Ayé nʉ' inʉmo'jcʉp as̈am jinap naninʉ'gutemgʉjʉ, mit natsʉ̱ngap salva̱tic ni'c nacupʉjcap ni'c Jesucristu jutucta̱c. Ayé nʉ'gutem caje' pa nas̈limpia̱twa'n nacuerpu po ayé nacumplia̱tcap ni'c najawigap ni'c ayʉ̱́j ayé lo que Dios iwampay.

²²Mit Jesucristu cu't tsajpni'c mit tsʉ̱nap i-oyimaycʉ'ni'c Dios, mit je' jinap iguijayaumaygap ángejlat mit nu'pʉjʉn jeme manda̱tcapay jem.