Read Sayula Popoluca 1 Pedro 4 Bible Online

1 Pedro 4 - Sayula Popoluca bible

1 Pedro 4

¹Cristu itunas̈ icuerpuni'c pa ʉjtsat, mit mijchat tsʉ̱́nga-ey dispuestu pa is̈tunas̈cawa'n, ni'c jeme itunas̈way icuerpuni'c, igajawa'náj iguiwatwa'n mal.

²Mit jinap tsʉ̱náj en ayʉ̱́j vida pa iguiwatwa'n lo que Dios iwampay, mit caje' pa iguiwatwa'n lo que iyo'tpay ijo̱jt.

³Ambanu inwatcau as̈am maljayajwat iguiwángaj, po jinap ingajawatcap we'n. Inwatcau mal, inwatcau lo que iyo'tway injo̱jtat, mi-u̱jcau pʉjʉn is̈wángaj, inwatcau tigapa'tu mam in-u̱ctacyo'ygaj, mit inadora̱tcau tiyu̱s̈at jeme ca-ojyatway.

⁴Mit jinap je'jat nigu-épigʉjʉp ni'c mijchat ingajatumuwatcap je'jat ayé mal iwatí̱jcapay, mit jemni'c is̈tucotscap.

⁵Po je'jat inʉmgajáj Dios ti iwatcaway, ni'c Dios itp ti iguijuzga̱tcʉs̈wa'n jeme tsʉ̱ngapnajway mit o'guijcatway.

⁶Jemni'guey Cristu iguinʉmgʉ́s̈aj oyway noticia o'guijcatway, ni'c je'jat o'jcau as̈am jayajwat po je'jat i-espíritu tsʉ̱ngáj pa siempre, as̈am Dios itsʉ̱na pa siempre.

⁷Mit tomo'ganu pa icʉs̈wa'n nu'pʉjʉn cosajat. Jemni'c pensá̱tca oy mit oratí̱jca.

⁸Jinap más oy pi watca ayʉ̱́j: Pi niwangʉjʉ may minu'pʉjʉjnat, ni'c te miniwangʉjʉp, ingawatcáj cuenta te tambʉn is̈watcajap mal, mit miniperdona̱tcʉjʉ̱́j.

⁹Nipʉctsóugʉjʉ oymanac minu'pʉjʉjnat mit camniquejá̱tcʉjʉ.

¹⁰Dios imoy favor cada jayau pa ma oya iguimajyiwa'n ihermanu, mit miyos̈watcáj oy pa Dios te inmajyigap inhermanujat ni'c Dios is̈yajcau pa pi watca we'n.

¹¹Te tu'c jayau cotsp, ma cots as̈am Dios iguiwa'n. Te tu'c jayau iservia̱jtap ihermanu, ma servia̱t as̈am Dios iguimoyp maj pa iguiwatwa'n. Pa we'n Dios tsʉ̱náj oyninʉmic ni'c Jesucristu nas̈moygap nu'pʉjʉn. Na-oyninʉ́mga je' ni'c ijtʉp poder pa nu'pʉjʉn tiempu. Amén.

¹²Mijchat tʉwangʉs̈pay, camnigu-épigʉjʉ te is̈mingajap mʉgʉcway pruebajat, ni'c itp ti is̈jatcáj we'n.

¹³Más oy ma ji'c injo̱jtat ni'c intunas̈cap as̈amu Cristu iguitunas̈, pa we'n ique's̈ta'cwa'n oymanac je', ji'gáj injo̱jtat mʉgʉc.

¹⁴Ni'c te is̈tucotscap ni'c incupʉjcap Cristu, ma ji'c injo̱jtat, ni'c tsʉ̱nap injo̱tni'jcat ayé Dios jeme oyninʉmicway. Iyacs̈ta'cway ayé maljayajwat imalninʉmgap Cristu po mijchat in-oyninʉmgap.

¹⁵Te tu'c jayau mam mijchat itunas̈p, ma tunas̈ pa Cristu. Caje' iguitunas̈wa'n ni'c ago'c o nu'm o iwat mal o ni'c itunitʉgʉjyʉp jayje'.

¹⁶Po tu'c jayau magawinchú̱ga te itunas̈p ni'c isiguia̱jtap Cristu, po ma oyninʉm Dios ni'c je' imutʉgʉyp Cristu.

¹⁷Jinap coyway tiempu pa Dios iguiproba̱tcʉs̈wa'n ijayajwat. Mit te Dios nas̈proba̱jtʉ'jcap ʉjtsat, más mʉgʉc iguicastiga̱tcʉs̈wa'n jeme igajayaumaygapay i-oyway noticia.

¹⁸Mit te tu'c jayau yacs̈icway maj inisalvá̱jtʉ, ¿natpaj inisalva̱tcʉjʉwa'n maljayajwat mit jeme igarespeta̱tcapay Dios?

¹⁹Jemni'c te ʉjtsat natunas̈cap as̈am iguiwa'n Dios, na-entregá̱tcaja je' navidajat mit nawátca oy. Ni'c ʉjtsat Dios nas̈watcau mit je' cumplia̱tp.