Read Sayula Popoluca 1 Pedro 5 Bible Online

1 Pedro 5 - Sayula Popoluca bible

1 Pedro 5

¹Jinap tʉntsawigʉs̈áj na'waywájat jeme is̈cuida̱tcapay mijchat, ni'c ʉ̱ tʉna'wayanu-éy as̈am je'jat. Ʉ̱ tʉn-is̈ nat iguitunas̈ Cristu, mit natsʉ̱ngámpey mit Cristu cuandu itsʉ̱nawa'n mʉjninʉmic itrononi'c.

²Tʉtsawigʉs̈p pi cuida̱tca Dios ijayajwat ni'c je'jat tsʉ̱ngap as̈am borregujat mam mijchat. Incuida̱tcáj po caje' ni'c mitsʉ̱ngap obliga̱tic, ne caje' pa inactsʉ̱ngawa'nu, po incuida̱tcáj mit nu'pʉjʉn injo̱jtat, ni'c we'n iguiwa'n Dios pi watca.

³Ingamanda̱tcáj mʉgʉc Dios ijayajwat as̈am mozojat, po inyajcajáj oyway ejemplu je'jat.

⁴Mit mi'nájatu Cristu meru jeme icuida̱tcʉs̈pay nu'pʉjʉn cupʉcpajyat, mit ique's̈ta'cwa'n je', napʉctsougáj tu'c premiu oymanacway jeme catogoyámpay.

⁵We'ney mijchat ya̱wájat, jayaumáyga na'waywájat, mit minu'pʉjʉjnat nirespetá̱tcʉjʉ, mit camnimʉjninʉ́mgʉjʉ. Ni'c Dios igapʉctsougʉs̈p jeme nimʉjninʉ́mgʉjʉpay, Je' imajyigʉs̈p jeme canimʉjninʉ́mgʉjʉpay.

⁶Tsʉ̱́nga domina̱tic Dios icʉ'jugum ni'c je' ito'jcʉp poder pa is̈manda̱tcáj, mit icojawa'n tiempu Dios is̈yajcáj pi jatca mʉj.

⁷Tigapa'tu is̈jatcámpay, campensa̱tca, solo yájcaja nu'pʉjʉn Dios icʉ'jugum ni'c je' pensa̱tp pa is̈cuida̱tcáj mijchat.

⁸Pensá̱tca oy mit tsʉ̱́nga prepara̱tic, ni'c Awayagatsna' ayé inmutsuguijnat, mit je' as̈am león i-ʉjtacyo'y, ni'c iche'mp pʉn i-ajca'wámpay.

⁹Majmóyga ayé ma̱lwayna' mit cupʉ́jca mʉgʉc Dios. Injawigap ni'c jʉmba'tu en ayʉ̱́j mundu inhermanujat itunas̈cap ni-as̈amu.

¹⁰Dios nas̈moygap nu'pʉjʉn favor, mit je' nas̈ya̱s̈cau pa natsʉ̱ngawa'n mam i-oymanagui pa nu'pʉjʉn tiempu. Jatáj we'n ni'c namutʉgʉygau Jesucristu. Natsʉ̱ngáj mit je' cʉs̈wa'n nas̈tunas̈ca yam tu'c tiempu. Dios nas̈acpichingáj oy, nas̈moygáj maj mit nas̈actsʉ̱ngáj mʉgʉc.

¹¹Na-oyninʉ́mga Dios ni'c je' ijtʉp poder pa nu'pʉjʉn tiempu. Amén.

¹²Silvano tʉnactuja'y ayʉ̱́j noc ni'c tʉmpensa̱tp ni'c je' tu'c hermanu cumplia̱tpay. Tʉgaja'ygʉs̈awu mayo'c en ayʉ̱́j noc pa tʉtsawigʉs̈wa'n. Tʉ-actujawigʉs̈p ni'c Dios is̈wangau iyacs̈ta'cway ni'c is̈moygau favor. Jinap tsʉ̱́nga mʉgʉc mit ayé favor is̈moygaway Dios.

¹³Is̈saluda̱tcap Dios ijayajwat tsʉ̱ngapay Babilonia, ni'c aye'jat Dios icupiugʉs̈ as̈amu mijchat. Mit is̈saluda̱tcapey Marcos jeme tʉn-e'pay as̈am tʉnwáy.

¹⁴Nisaludá̱tcʉjʉ minu'pʉjʉjnat mit tu'c ame'tamuc ni'c miniwangʉjʉp. Dios pi is̈moygac paz minu'pʉjʉjnat ni'c inmutʉgʉygau Jesucristu. Amén.