Read Sayula Popoluca 2 Pedro 1 Bible Online

2 Pedro 1 - Sayula Popoluca bible

2 Pedro 1

¹Ʉ̱ Simón Pedro. Tʉnservia̱jtap Jesucristu mit je' tʉs̈ajyu't pa apóstol. Tʉja'ygʉs̈ap ni'c valia̱to'cp lo que ʉjtsat nacupʉjcapay. Dios mit Jesucristu is̈salva̱tcap mit is̈yacs̈icninʉmgap.

²Dios pi is̈acmingajac may favor mit paz ni'c inis̈capcanup Dios mit el Señor Jesús.

³Dios ijtʉp poder, mit jemni'c nas̈moygau nu'pʉjʉn cosajat nanesita̱tcapay pa ayʉ̱́j vida mit pa nayo'yga mit je'. Jinap Dios nas̈actu-is̈capcap Jesucristu, mit je' nas̈ya̱s̈cau ni'c je' mʉjo'c mit ʉjtsat, mit iwatp cosa majatway.

⁴Jemni'c nas̈yajcajau majatway promesajat jeme valia̱tcapay, mit jemni'c nas̈pʉctsóuga ayé vida iyacpay Dios, ni'c nacuyaguigaway ayé ma̱jlat itpay en ayʉ̱́j mundu, ni'c ayé ma̱jlat nas̈actogoygájate.

⁵Jemni'c mijchat cuji'cs̈iga is̈watcawa'n ayʉ̱́j. Te micupʉjcap, watca-ey oy. Mit te inwatcap oy, inis̈capcáj más.

⁶Mit te inis̈capcap, nidominá̱tcʉjʉ. Mit te minidomina̱tcʉjʉp, inmajmoygáj más. Mit te inmajmoygap pruebajat, miyo'ygáj mit Dios.

⁷Te miyo'ygap mit Dios, inwangáj inhermanujat. Mit te inwangap inhermanujat, miniwangʉjʉ̱́j minu'pʉjʉjnat.

⁸Ni'c te inwatcap we'n, más impʉjcáj maj mit Dios, migacandʉ'nyujcáj mit miyos̈watcáj más pa Dios, mit we'n inis̈capcáj iyacs̈ta'cway el Señor Jesucristu.

⁹Po jeme igawatpay we'n, tsʉ̱nap as̈am tu'c winch jeme ca-e'pay yagats ni'c inijawiyo'tway ni'c Dios iguilimpia̱jtaway ayé mal iwatway ámbanu.

¹⁰Jemni'c hermanujat, cuji'cs̈iga is̈watcawa'n oy, pa we'n mitsʉ̱ngáj seguru ni'c Dios is̈ya̱s̈cau mit is̈cupiugau. Ni'c te inwatcap we'n, migaca'ugáj nunca.

¹¹Ni'c we'n Dios is̈moygáj derechu pa intsʉ̱ngawa'n oymanac mam imanda̱twa'n el Señor Jesucristu. Je' manda̱táj pa nu'pʉjʉn tiempu mit je' ayé nas̈salva̱tcaway.

¹²Mijchat injawigap lo que iyacs̈ta'cway mit micupʉjcanup mʉgʉc, po majawe'naj tʉgatentamp tʉ-actunijawigʉs̈ ayʉ̱́j cosajat.

¹³Mit como tʉtsʉ̱napnaj, tʉs̈jawi oy tʉtsawigʉs̈wa'n pa pi tsʉ̱nga prepara̱tic.

¹⁴El Señor Jesucristu tʉs̈actujawiu ni'c cajati pa tʉ-o'cwa'n.

¹⁵Tʉncuji'cs̈ip tʉnʉmgʉs̈a ayʉ̱́j cosajat, pa we'n tʉ-o'cwa'n inganijawiyo'tcáj lo que tʉnʉmgʉs̈away.

¹⁶Tʉ-ajque's̈cajau ni'c el Señor Jesucristu ijtʉp poder mit mi'nájatu yam. Mit ayé tʉganʉmgajawu as̈am jeme i-ampiugapay we̱jtat pa is̈actugupʉjcáj, po ʉjtsat tʉtsʉ̱ngau mit Jesús, mit tʉn-is̈cau je' cuandu Dios igui-oyninʉm.

¹⁷Mit je' Dios igui-oyninʉm mit iguimucots desde tsajpni'c mam itsʉ̱na oymanac, inʉm: “Ayʉ̱́j ayé tʉnwáy jeme tʉnwampay, mit je' tʉs̈acji'jcap tʉnjo̱jt.”

¹⁸Mit ʉjtsat tʉnmaraugau icojts Dios desde tsajpni'c, ni'c wejpu'n tʉtsʉ̱ngau mit Jesús en ayé copac mam Dios icojy.

¹⁹Mit jinap más najawigap ni'c iyacs̈ta'cway lo que inʉmgaway Dios iprofetajat. Mit oy pi watca cuenta lo que inʉmgaway, ni'c ayé as̈am tu'c jʉmbola jeme ta'cs̈pay chitimicni'c ni'c nas̈actujawigap lo que inʉmway Dios. Ayé nas̈ta'cs̈cáj hasta icus̈ʉwiwa'n, ni'c Cristu mi'náj mit je' nas̈moygáj luz najo̱tni'jcat.

²⁰Pi jawiga ni'c nu'pʉjʉn inʉmgaway profetajat Dios ilibruni'c caje' pa cada jayau igui-entendia̱twa'n as̈amu iguiwa'n.

²¹Ni'c ayé profetajat iganʉmgawu as̈am je'jatu iguiwángaj, po je'jat igui-aparta̱tcau Dios, mit Espíritu Santu iguimoygau ti inʉmgámpay.