Read Sayula Popoluca 2 Pedro 3 Bible Online

2 Pedro 3 - Sayula Popoluca bible

2 Pedro 3

¹Mijchat tʉwangʉs̈pay, ayʉ̱́j ayé segunduway noc tʉja'ygʉs̈apay. Mit inimechquij tʉnja'y pa tʉtsawigʉs̈wa'n, pa we'n mipensa̱tcáj más oy.

²Tʉ-actunijawigʉs̈p lo que inʉmgaway ámbanu Dios iprofetajat, mit pi nijawiga-ey lo que inʉmway el Señor Jesucristu jeme nas̈salva̱tcapay, ni'c wename-ey is̈nʉmgajau ayé apóstojlat.

³Oy pi jawijʉ'jca ayʉ̱́j: ni'c últimu s̈ʉjwat mingáj burla̱tpayna'jat. Je'jat iwatcáj mal as̈am iguiyo't ijo̱jtat,

⁴mit inʉmgáj: “¿Tini'c igacumplia̱t ayé promesa ni'c Jesucristu mi'náj? Ni'c desde i-o'jcaj ampay jayajwat, nu'pʉjʉn cosajat tangap ni-as̈amu, mit desde Dios iguiwajt ayʉ̱́j mundu, ni-as̈amu itsʉ̱na. We'n iguinʉmga ayé maljayajwat.”

⁵Je'jat igawangap iguijawigawa'n lo que iwatway Dios. Ni'c ámbanu Dios inʉm ma jat tsajp mit na̱s̈, ni'c ítate puru nʉ' mit Dios i-acjat na̱s̈.

⁶Mit Dios inʉmatu ni'c ayé ampay mundu ma togoy mit nʉ'.

⁷Po tsajp mit na̱s̈ itpay jinap tsʉ̱nap ni'c we'n iguinʉjm Dios, po jinap nʉmic pa itogoywa'n mit jʉjn. Mit jatáj ayé ijuzga̱twa'n Dios mit togoygáj ayé jayajwat igarespeta̱tcapay Dios.

⁸Mijchat tʉwangʉs̈pay, pi jawiga ni'c el Señor igawatp cuenta tiempujat. Je' i-aguep tu'c s̈ʉjw as̈am mil añu, mit mil añu i-aguep as̈am tu'c s̈ʉjw.

⁹El Señor cajecp pa iguicumplia̱twa'n ipromesa, as̈am cʉjtu'c iguinʉ́mga ni'c jego'cway iganicumplia̱tp ipromesa. Po Dios nas̈aguepcajap calma ni'c igawamp nepʉn ma togoy. Je' iwamp nu'pʉjʉn ma cuyaguiga ima̱lway to̱jwat.

¹⁰Po icojawa'n ayé s̈ʉjw itumi'námpay el Señor, je' mi'náj de repente as̈am tu'c nu'mpay icoja tsu'm. Mit wejpu'n cʉs̈áj tsajp mit tu'c mʉjway ruidu. Mit nu'pʉjʉn itpay tsajpni'c cʉs̈áj itininga, mit we'ney na̱s̈ mit nu'pʉjʉn ijtʉpay toygáj.

¹¹Najawigap ni'c nu'pʉjʉn ayʉ̱́j cosajat cʉs̈cáj, jemni'c nayo'yga limpiu mit na-adorá̱tca Dios.

¹²Na-atsʉ̱nga ayé s̈ʉjw itumi'námpay Dios, mit nacuji'cs̈iga nayos̈watcawa'n pa je' ma mi'n más pronto. Ni'c en ayé s̈ʉjw tsajp tinináj hasta tegacʉs̈p, mit nu'pʉjʉn itpay tsajpni'c mit na̱s̈ni'c toygáj.

¹³Po ʉjtsat na-atsʉ̱ngap lo que Dios iprometia̱tway, namay tsajp mit namay na̱s̈, ni'c jem nawatcáj lo que iyacs̈ta'cway.

¹⁴Mijchat tʉwangʉs̈pay, inatsʉ̱ngap ayʉ̱́j jeme jatámpay. Jemni'c cuji'cs̈iga pigatsʉ̱nga jinic mit ma̱jlat, mit nepʉn ma is̈caculpa̱tcac cuandu je' imi'nwa'n, pi tsʉ̱́nga en paz.

¹⁵Pi jawiga ni'c el Señor ijtʉp calma ni'c iwamp jayajwat ma nisalvá̱tcʉjʉ. Mit wename-ey is̈ja'ygajau nahermanujat Pablo jeme nawangapay, ni'c je' Dios iguimoy ma is̈cap.

¹⁶Nu'pʉjʉn noc ija'yway, is̈nʉmgajau pi watca as̈am ʉ̱ tʉnʉmgʉ́s̈aj. Mit una̱c noc ija'yway mʉgʉgo'c pa nas̈-entendia̱tcawa'n. Mit jeme iga-is̈capcapay neti mit jeme cacupʉjcapay mʉgʉc itigatscap lo que ija'yway. Mit je'jat togoygáj ni'c itigatscapey jeme tsʉ̱napay ja'yic Dios ilibruni'c.

¹⁷Mijchat tʉwangʉs̈pay, injawiganup ayʉ̱́j cosajat. Jemni'c nicuidá̱tcʉjʉ pi is̈cawe̱jta̱jcac maljayajwat pa is̈siguia̱tcajawa'n je'jat, mit oyap inca'uga mit migajatsʉ̱ngáj mʉgʉc mit Dios.

¹⁸Siguiá̱tca más mit ayé favor is̈moygapay Dios mit pa is̈-is̈capcawa'n más el Señor Jesucristu jeme nas̈salva̱tcapay. Na-oyninʉ́mga je' jinap mit pa nu'pʉjʉn tiempu. Amén.