Read Sayula Popoluca 1 Juan 4 Bible Online

1 Juan 4 - Sayula Popoluca bible

1 Juan 4

¹Mijchat tʉwangʉs̈pay, te impʉctsougap tu'c jayau, proba̱jtʉ'jca te imuyo'yp Espíritu Santu, mit camtʉ'tscupʉ́jcayu jayajwat inʉmgapay ni'c Dios igui-ajyu'tcau, ni'c mayo'c we̱tpajyat ipíchinga en ayʉ̱́j mundu, mit inʉmgap ni'c cotscap pa Dios.

²Yename is̈-is̈capcawa'n imuyo'ygapay Espíritu Santu: Nu'pʉjʉn jayajwat inʉmgámpay ni'c Jesucristu jat jayau yam, aye'jat imuyo'ygap Espíritu Santu.

³Mit nu'pʉjʉn jayajwat inʉmgámpay ni'c Jesucristu cajátu jayau yam, aye'jat igamuyo'ygap Espíritu Santu. Je'jat inʉmgap we'n ni'c igui-ajyu'tcau Cristu imutsuguin. Mijchat inmaraugau ni'c itp ti imi'nwa'n Cristu imutsuguin mit jinap tsʉ̱nanup en ayʉ̱́j mundu.

⁴Mijchat tʉ-e'pcʉs̈p as̈am tʉ̱wajyat. Dios is̈je'játcau mijchat mit imvencia̱tcaway ayé we̱tpay jayajwat, ni'c Espíritu Santu inmuyo'ygapay más ijtʉp poder que ayé malwayna' imuyo'ygʉs̈pay maljayajwat tsʉ̱ngapay en ayʉ̱́j mundu.

⁵Ayé jayajwat solo ipensa̱tcap itpay en ayʉ̱́j mundu, mit jayajwat ayʉ̱́j mundujway imaraugap lo que inʉmgapay.

⁶Ʉjtsat Dios nas̈je'játcau. Jeme i-is̈capay Dios, nas̈maraugapey. Mit jeme caje'way Dios ijayau, nas̈camaraugap. Jemni'c nas̈-is̈cápca jayajwat imuyo'ygapay Espíritu Santu jeme inʉmpay iyacs̈ta'cway, mit na-is̈capcapey jeme imuyo'ygapay malwayna' jeme we̱tpay.

⁷Mijchat tʉwangʉs̈pay, naniwángʉjʉ nanu'pʉjʉjnat, ni'c Dios nas̈acniwángʉjʉp. Pʉmba'tu jeme iwampay ihermanu, ayé Dios ijayau mit i-is̈cap Dios.

⁸Jeme igawampay ihermanu, iga-is̈cap Dios, ni'c Dios iwangʉs̈p nu'pʉjʉn jayajwat.

⁹Dios nas̈actujawigap ni'c nas̈wangap, ni'c je' i-ajyu't iway tu'gujyuway en ayʉ̱́j mundu pa nas̈moygáj vida cacʉs̈ámpay.

¹⁰Yename nas̈jawiga ni'c Dios nas̈wangap: ʉjtsat nagawangapate Dios, po como je' nas̈wangau ʉjtsat, i-ajyu't iway, mit je' o'c pa iguitso'cwa'n nu'pʉjʉn mal nawatcaway.

¹¹Mijchat tʉwangʉs̈pay, te yename Dios nas̈wangap, naniwángʉjʉ-ey nanu'pʉjʉjnat.

¹²Nepʉn igani-e'p Dios. Po te naniwangʉjʉp nanu'pʉjʉjnat, najawigap ni'c Dios nas̈wangap iyacs̈ta'cway, mit je' tsʉ̱nap mit ʉjtsat.

¹³Najawigap ni'c natsʉ̱ngap mit Dios, mit je' tsʉ̱nap mit ʉjtsat, ni'c je' nas̈moygau Espíritu Santu.

¹⁴Tʉ-actujawigap ni'c Dios Nate̱jat i-ajyu't iway pa iguisalva̱twa'n jayajwat ayʉ̱́j mundujway. Mit je' tʉn-is̈cau.

¹⁵Pʉmba'tu jeme inʉmpay ni'c Jesús ayé Dios iway, Dios tsʉ̱nap mit je', mit je' tsʉ̱nap mit Dios.

¹⁶Ʉjtsat najawigap mit nacupʉjcap ni'c Dios nas̈wangap. Dios iwangʉs̈p nu'pʉjʉn jayajwat. Mit jeme iwampay ihermanujat tsʉ̱nap mit Dios, mit Dios tsʉ̱nap mit je'.

¹⁷Te naniwangʉjʉp iyacs̈ta'cway, nagapʉ̱tcáj en ayé s̈ʉjw cuandu Dios i-arregla̱twa'n, ni'c as̈am Jesucristu nas̈wangap, we'ney ʉjtsat naniwángʉjʉ en ayʉ̱́j mundu.

¹⁸Jeme iwampay Dios, capʉ̱tp. Ni'c jeme iwampay Dios iyacs̈ta'cway igapʉ̱táj neti. Po jeme pʉ̱támpay, itunas̈p ni'c igawamp Dios iyacs̈ta'cway.

¹⁹Ʉjtsat nawangap Dios ni'c je' nas̈wajnʉ'jcau.

²⁰Po te tu'c jayau inʉmp ni'c iwamp Dios, mit i-amp ihermanu, ayé tu'c we̱tpay. Ni'c te igawamp ihermanu jeme i-e'pay, ¿natpaj iguiwa'nwa'n Dios jeme igani-e'pay?

²¹Mit je' nas̈moygau ayʉ̱́j mandamientu: ni'c jeme iwampay Dios ma wa'ney ihermanu.