Read Sayula Popoluca 2 Juan 1 Bible Online

2 Juan 1 - Sayula Popoluca bible

2 Juan 1

¹Ʉ̱ Juan tʉna'wayanu mit tʉtsʉ̱nap encarga̱tic mam cupʉcpajyat. Tʉnja'jyap ayé hermana mit iwajyat jeme Dios icupiugʉs̈way. Ʉ̱ tʉnwangʉs̈p iyacs̈ta'cway mit caje' ʉ̱jyu, po iguiwangapey nu'pʉjʉn i-is̈capcanupay lo que iyacs̈ta'cway.

²Mijchat tʉwangʉs̈p ni'c incupʉjcapey lo que iyacs̈ta'cway, mit lo que iyacs̈ta'cway tanáj mit ʉjtsat pa siempre.

³Dios Nate̱jat mit iway el Señor Jesucristu pi is̈moygac favor, pi is̈-ayo̱wis̈cac mit pi is̈moygac paz, ni'c je'jat nas̈wangap iyacs̈ta'cway.

⁴Ji'go'c tʉnjo̱jt ni'c tʉmpa̱tcʉs̈way una̱c inwajyat jeme yo'ygapay yacs̈ic as̈am Dios Nate̱jat nas̈manda̱tcau.

⁵Mit jinap, hermana, tʉnʉjmap ni'c naniwángʉjʉ nanu'pʉjʉjnat. Ʉ̱ tʉgaja'jyap tu'c namay mandamientu po tʉja'jyap ayé mandamientu na-aguepcaway desde nachú̱chigaj cupʉcpay.

⁶Mit naniwangʉjʉp cuandu nayo'yga as̈am Dios imanda̱t. Ayʉ̱́j ayé lo que imanda̱tpay ni'c naniwángʉjʉ nanu'pʉjʉjnat as̈am nas̈máraugaj desde nachú̱chigaj cupʉcpay.

⁷Jinap mayo'c we̱tpajyat ipíchinga en ayʉ̱́j mundu. Je'jat inʉmgap ni'c Jesucristu cajátu jayau yam. Mit jeme inʉmpay we'n, ayé tu'c we̱tpay, mit ayé Cristu imutsuguin.

⁸Nicuida̱tcʉjʉ mijchat pa magapichin jalmanu nawatcapay pa Dios, ni'c más oy napʉctsóuga nu'tsic ayé premiu nas̈moygámpay Dios.

⁹Jeme itunitʉgʉjyʉpay jatu'c ama̱s̈an mit igamutamp Cristu i-ama̱s̈an, ayé igamutʉgʉyp Dios. Po jeme imutampay Cristu i-ama̱s̈an, ayé imutʉgʉyway Dios Nate̱jat mit iway Jesucristu.

¹⁰Te tu'c jayau mimp is̈tʉcyo'ygap mam inyi-apʉcmújcʉjʉ, mit te iga-ajque's̈ap Cristu i-ama̱s̈an, campʉctsouga ne camnʉmgaja ni'c oyo'gu icojy.

¹¹Ni'c jeme inʉjmámpay ni'c oyo'gu icojy, imunimojtʉp nu'pʉjʉn mal imuyo'ypay.

¹²Tʉnaguep mayo'c cosa pa tʉnʉmgʉs̈awa'n, po tʉngawamp tʉmucotscʉs̈wa'n mayo'c ja'yic nocni'c. Ʉ̱ tʉnatsʉ̱nap pa tʉnʉs̈wa'n mam intsʉ̱nga, mit tʉmu-ampiugʉs̈áj pa ma ji'cta'c najo̱jtat iyacs̈ta'cway.

¹³Is̈saluda̱tcap inhermana iwajyat jeme Dios icupiugʉs̈way. Yam icʉs̈ lo que tʉnʉmgʉs̈apay.