Read Sayula Popoluca 3 Juan 1 Bible Online

3 Juan 1 - Sayula Popoluca bible

3 Juan 1

¹Ʉ̱ Juan tʉna'wayanu mit tʉtsʉ̱nap encarga̱tic mam cupʉcpajyat. Tʉja'jyap mi̱ Gayo jeme tʉwampay iyacs̈ta'cway.

²Hermanu jeme tʉwampay, tʉnwamp ma pichin oy nu'pʉjʉn inwatpay. Tʉnwamp pi tsʉ̱na oy en ayʉ̱́j vida as̈am intsʉ̱na oy mit Dios.

³Ji'go'c tʉnjo̱jt imíngaj hermanujat ni'c tʉs̈nʉmgajau ni'c incumplia̱tp pa is̈watwa'n lo que iyacs̈ta'cway ni'c miyo'yp yacs̈ic.

⁴Cuandu tʉs̈marau ni'c yo'ygap yacs̈ic jeme tʉn-e'pcʉs̈pay as̈am tʉnwajyat, ayé más tʉs̈acji'jcap tʉnjo̱jt.

⁵Hermanu tʉwano'cpay, oyo'gu is̈watcʉs̈a hermanujat jeme mingapay jatu'c laj mit jeme tsʉ̱ngapay jem.

⁶Mit je'jat i-actujawigau cupʉcpajyat ni'c inwangʉs̈p nu'pʉjʉn hermanujat. Inwatáj oy te inmajyigʉs̈p ayé hermanujat mit te nʉs̈p is̈yacta̱jcʉs̈ cuandu inʉ́s̈canu, ni'c we'n iguiwa'n Dios pi wat.

⁷Ni'c je'jat pichingau nʉmdacyo'ypay ni'c iservia̱tcajap Jesucristu mit igapʉctsougajawu neti ayé jayajwat iga-is̈capcapay Dios.

⁸Ʉjtsat itp ti nas̈pʉctsougawa'n jayajwat as̈am je'jat mit oy namuyos̈watca pa jayajwat más ma cupʉjca lo que iyacs̈ta'cway.

⁹Tʉnja'ygʉs̈au cupʉcpajyat tu'c noc, po Diótrefes igawatp cuenta lo que tʉnyʉmpay, ni'c je' iwamp imanda̱twa'n mam cupʉcpajyat.

¹⁰Jemni'c te ʉ̱ tʉnʉs̈p jem, tʉ-actujawigʉs̈áj nu'pʉjʉn lo que je' iwatpay ni'c je' nas̈ajca's̈ʉ'jcajap puru we̱t. Je' iwatp más mal ni'c igapʉctsougʉs̈p hermanujat templuni'c, mit i-atujcʉs̈p jeme iwangapay iguipʉctsougawa'n hermanujat, mit i-acpichingʉs̈p templuni'c.

¹¹Hermanu tʉwano'cpay, nagawátca as̈am jayajwat iwatcapay mal, po nawátca as̈am jayajwat iwatcapay oy. Jeme iwatpay oy, ayé Dios ijayau. Jeme iwatpay mal, igani-is̈cap Dios.

¹²Nu'pʉjʉn i-oyninʉmgap Demetrio mit najawigap ni'c je' oyo'c ni'c iwatp lo que iyacs̈ta'cway. Mit ʉjtsat tʉn-oyninʉmgapey, mit mijchat injawigap ni'c ʉjtsat tʉnyʉmgap lo que iyacs̈ta'cway.

¹³Tʉnaguep mayo'c cosajat pa tʉnʉjmawa'n, po tʉngawamp tʉmucotswa'n mayo'c ja'yic nocni'c.

¹⁴Po tʉnatsʉ̱nap pa tʉ-e'pwa'n pe'jyu pa tʉmu-ampiwa'n.

¹⁵Dios pi is̈mutanac. Amigujat jeme tsʉ̱ngapay yam is̈saluda̱tcap mi̱. Nʉmgʉ́s̈a amigujat jeme tsʉ̱ngapay jem ni'c tʉnsaluda̱tcʉs̈p cada jayau.