Read Sayula Popoluca El Apocalipsis 10 Bible Online

El Apocalipsis 10 - Sayula Popoluca bible

El Apocalipsis 10

¹Tʉn-is̈ ni'c manac tsajpni'c tu'c ángel jeme ijtʉpay maj, mit je' tsʉ̱nau wintucjugum, mit it tu'c arcu iris icopacni'c, mit iwindugʉt as̈am s̈ʉjw i-anan, mit ita'jnat as̈am tu'c comom jeme tinimpay.

²Je' ijtʉu icʉ'ni'c tu'c libruwáy awa'tsic. Mit iyac i-oyimayta'n lama̱tyucuinm mit i-anajyimayta'n iyac na̱s̈ni'c.

³Mit je' ya̱s̈ mʉgʉc, as̈am tu'c león i-ʉj. Mit cuandu iya̱s̈, ya̱s̈cawey siete ániwayna'jat.

⁴Mit cuandu iyá̱s̈caj ayé siete ániwayna'jat, tʉja'yájate po tʉnmarau ni'c tʉs̈mucotsp tu'c voz tsajpni'cway, mit tʉs̈najau: —Camja'ywit lo que inʉmgaway ayé siete ániwayna'jat, mit camnʉjma nepʉn.

⁵Mit tʉn-is̈ ni'c ayé ángel jeme ijtʉway tu'c ita'n lama̱tyucuinm mit jatu'c na̱s̈ni'c, je' iyucju'p icʉ' pa tsajpni'c,

⁶mit ayé ángel ijura̱jtau Dios jeme tsʉ̱napay pa siempre, ni'c je' iwat tsajp, na̱s̈, mit lama̱t, mit nu'pʉjʉn itpay jem. Mit je' jura̱t ni'c cajajegáj icumplia̱twa'n nu'pʉjʉn,

⁷po en ayé s̈ʉjw igui-acya's̈wa'n itrompeta imusieteway ángel, Dios icumplia̱táj lo que i-actsʉ̱napay cuyu'tsic, as̈am iguinʉmgʉ́s̈aj ayé profetajat jeme iguiservia̱tcajaway.

⁸Mit ayé voz tʉs̈mucotsway tsajpni'c, tʉs̈mucotsatu, inʉm: —Nʉs̈ pʉc ayé libruwáy jeme tsʉ̱napay awa'tsic icʉ'ni'c ayé ángel jeme tenapay lama̱tyucuinm mit na̱s̈ni'c.

⁹Mit tʉnʉcs̈ mam itsʉ̱na ayé ángel, mit tʉnyajau ma tʉs̈mo'ac ayé libruwáy. Mit je' tʉs̈najau: —Pʉc mit incayáj ayé, mit jatáj ta̱mats intinchayni'c, po in-auni'c injawiyáj pa'c as̈am chi̱n.

¹⁰Mit cʉs̈ tʉmpʉc ayé libruwáy icʉ'ni'c ayé ángel, mit tʉncay. Mit pa'c tʉs̈jawij tʉn-auni'c as̈am chi̱n, po cʉs̈ tʉs̈cajy, ta̱mats ijajt tʉntinchayni'c.

¹¹Mit je' tʉs̈najau: —Itp ti is̈nʉmwa'natu ti iguijatcámpay may nʉ'jcopajcat, mit na̱s̈at, jeme cotscapay jatu'c ajwat, mit rejyat.