Read Sayula Popoluca El Apocalipsis 11 Bible Online

El Apocalipsis 11 - Sayula Popoluca bible

El Apocalipsis 11

¹Mit cʉs̈ tʉs̈moygau tu'c pʉ̱yan mit ayé que's̈ as̈am vara natuquips̈pay, mit tʉs̈nʉmgajau: —Ca's̈ʉ'c mit quips̈a Dios itemplu, mit ayé lugar mam igui-adora̱tca Dios, mit maygʉs̈ jeme adora̱tcapay jem.

²Po ingaquips̈áj ayé pe't jeme tsʉ̱napay templu-á̱m, ni'c ayé entrega̱tic pa pe'ta̱may jayajwat, mit je'jat itute'ni̱jcáj ayé nʉ'jcopac i-aparta̱tway Dios pa cuarenta y dos po'jat.

³Mit tʉnajyu'táj mechc tʉntestigujat ma nʉmdacyo'yga pa mil doscientos sesenta s̈ʉjwat, mit icomgáj yʉgʉcjamuc.

⁴Mit ayé mechc testigujat ayé as̈am ayé mechc olivucujyat mit as̈am ayé mechc ta'cs̈anyagajnat, ni'c je'jat tenagap mam itsʉ̱na Dios jeme iwatway na̱s̈.

⁵Mit te tambʉn iwamp iguiwatcajáj mal, pichináj jʉjn i-auni'jcat, mit je'jat icʉs̈cáj imutsuguijnat. Mit pʉmba'tu iwa'námpay iguiwatcajáj mal, wename-ey itp ti i-o'jcawa'n.

⁶Ayé testigujat itcʉjʉp poder pa igui-atujcawa'n tsajp magaca'u tu̱ en ayé s̈ʉjwat inʉmdacyo'ygawa'n. Mit itcʉjʉp poder pa nʉ' igui-acpitujcawa'n nipin, mit pa igui-acmingawa'n nu'pʉjʉn castigu na̱s̈ni'c, mit iwatcáj ayé pʉjʉn veces iguiwangawa'n je'jat.

⁷Mit cʉs̈wa'n iguinʉmdacyo'yga, ayé aníma̱t jeme pichimpay cʉtʉm imutsuguinwatcʉs̈áj ayé testigujat, mit ivencia̱tcʉs̈áj mit i-ago'jcʉs̈áj.

⁸Mit icuerpujat tangáj calleni'c en ayé mʉjway nʉ'jcopac mam iguiyájcaj cunu̱s̈ni'c el Señor Jesús, mit ayé nʉ'jcopac imu-e'p as̈am Sodoma mit Egipto ni'c ma̱lo'jcat ayé jayajwat jeme tsʉ̱ngaway jem.

⁹Mit jayajwat de nu'pʉjʉn nʉ'jcopajcat, grupu de jayajwat, jeme cotscapay jatu'c ajwat, mit na̱s̈at, i-e'pcajáj icuerpujat pa tu̱gup s̈ʉjw mit pu̱t. Mit igayajcáj laj iguini̱pcawa'n.

¹⁰Mit jeme tsʉ̱ngapay na̱s̈ni'c ji'jcáj ijo̱jtat ni'c o'guijcatanu ayé testigujat. Mit iwatcáj ma̱s̈ʉjw, mit i-acpas̈angáj regalujat. Ni'c ayé mechc profetajat i-actunas̈cau ayé jayajwat tsʉ̱ngapay na̱s̈ni'c.

¹¹Po icʉs̈ tu̱gup s̈ʉjw mit pu̱t, Dios igui-acjutucta̱jcau, mit nitenda̱jcʉjʉu. Mit jeme igui-is̈caway, pʉ̱jtʉgʉygau.

¹²Mit ayé mechc testigujat imaraugau ni'c iguimucotscap tsajpni'c mit iguinʉmgajau: —Cu'tca yam. Mit tu'c wintuc iguimunʉs̈cau pa tsajpni'c. Mit imutsuguijnat igui-is̈cau icu'tcaj.

¹³Mit en ayé hora nas̈ tu'c us̈ mʉgʉcway, mit ca'ubʉ'n tu'c parte ayé nʉ'jcopac, mit o'jcau siete mil jayajwat por ayé us̈. Mit japu̱t jayajwat ni-apʉ̱tigʉjʉu mʉgʉc, mit i-oyninʉmgau Dios jeme tsʉ̱napay tsajpni'c.

¹⁴Mit nas̈way segunduway pʉ̱tna̱s̈, mit pe'jyu mimp terceruway pʉ̱tna̱s̈.

¹⁵Mit imusieteway ángel i-acya̱s̈ itrompeta, mit cotscau mʉgʉc jeme tsʉ̱ngaway tsajpni'c, inʉmgau: El Señor Dios mit ayé Cristu jeme Dios icupi̱way, imanda̱tcáj nu'pʉjʉn na̱s̈at ayʉ̱́j mundujway mam imanda̱tca-ate jayajwat, mit je' manda̱táj pa nu'pʉjʉn tiempu.

¹⁶Mit ayé veinticuatro na'waywájat jeme tsʉ̱ngapay itronowayni'jcat mam i-ijtʉ Dios itrono, nicos̈atenda̱jcʉjʉu mit nino'umanajcʉjʉu, mit i-adora̱tcau Dios.

¹⁷Inʉmgau: Tʉnʉmgajap ni'ctiyu̱s̈, Señor Dios, ni'c mi̱ inaguep nu'pʉjʉn poder. Mi̱ mitsʉ̱nau ámbanu, mitsʉ̱nap jinap mit mitsʉ̱náj pa siempre. Mi̱ inaguep nu'pʉjʉn poder mit mimanda̱tájama.

¹⁸Mit nu'pʉjʉn jayajwat awa'nigau, po coyway s̈ʉjw pa is̈juzga̱tcʉs̈wa'n, mit coyway tiempu pa is̈juzga̱tcʉs̈wa'n o'guijcatway, mit inmoygʉs̈áj ipremiujat ayé profetajat jeme is̈servia̱tcajaway, mit inmoygʉs̈ámpey ipremiujat injayajwat jeme is̈-oyninʉmgapay, mʉjayajwat mit jeme camʉjninʉ̱́mijcatway, mit inactogoygʉs̈áj jeme i-actogoygapay jayajwat.

¹⁹Mit i-awa̱tscajau Dios itemplu tsajpni'cway, mit templutujugum i-is̈cau ayé cas̈u̱n mam i-it ayé primer acuerdu iwatway Dios. Mit quijan mit ya̱s̈ ániway, mit it ruidujat, mit nas̈ tu'c us̈ mʉgʉcway, mit ca'u tsa'tú̱.