Read Sayula Popoluca El Apocalipsis 12 Bible Online

El Apocalipsis 12 - Sayula Popoluca bible

El Apocalipsis 12

¹Mit que's̈ta̱c tsajpni'c tu'c cosa nas̈acnigu-épijyʉpay. Que's̈ta̱c tu'c to's̈ay apitucjeguic mit s̈ʉwáy, mit po'wáy tsʉ̱nau ita'mpa'tm, mit icopacni'c ijtʉu tu'c corona ijtʉpay doce ma̱tswájat.

²Mit ayé to's̈ay wayajo'gaj itsʉ̱naj, mit je' ya̱s̈ ni'c pʉgo'cp itinchay ni'c ta̱go'jcʉnup.

³Mit que's̈ta̱guey tsajpni'c jatu'c cosa nas̈acnigu-épijyʉpay. Que's̈ta̱c tu'c mʉjway dragón tsabatsway, mit ijtʉu siete icopac mit diez iwaj, mit inisieteij icopac ijtʉu icorona.

⁴Mit itu'jts itu-ajca'u tercera parte ma̱tswájat tsajpni'cway, mit ica'tsmanajcʉs̈ pa na̱s̈ni'c. Mit ayé dragón nitenda̱jcʉu tom mam itsʉ̱na ayé to's̈ay jeme ta̱go'jcʉpay. Je' tenau jem pa iguicajyawa'n iway cuandu ita'cwa'n.

⁵Mit ayé to's̈ay ita̱c tu'c qui'chwáy, mit je' imanda̱táj mʉgʉc nu'pʉjʉn jayajwat. Mit ayé qui'chwáy Dios iguimunʉcs̈ pa itanwa'n itrononi'c.

⁶Mit ayé to's̈ay po'c pa mam igatsʉ̱na nepʉn. Jem Dios igui-oyajcau tu'c laj, mit jem icuida̱tcáj pa mil doscientos sesenta s̈ʉjwat.

⁷Mit cʉs̈ it tu'c tsuguin tsajpni'c. Ayé ángel Miguel jeme más manda̱tpay mam ángejlat i-apʉcmuc i-ángejlat pa iguimulucha̱tcawa'n ayé dragón. Mit ayé dragón iguimajyigau i-ángejlat pa ilucha̱tcawa'n,

⁸po je'jat actogoygau, mit igajamoygawu laj pa itsʉ̱ngawa'n tsajpni'c.

⁹Mit ica'tspichingau ayé mʉjway dragón, mit je' ayé tsanay jeme tsʉ̱naway desde ámbanu, mit ayé inʉmgajap Awayagatsna' mit inʉ'jyey Satanás. Je' iwe̱jta̱cp nu'pʉjʉn jayau. Je' ica'tsmanajcau na̱s̈ni'c, mit we'ney i-ángejlat.

¹⁰Cʉs̈ tʉnmarau tu'c jeme cotspay mʉgʉc tsajpni'c, inʉm: —Jinap nas̈libra̱tcaway, mit Dios manda̱tp mit ipoder, mit manda̱tnupey Cristu jeme Dios icupi̱way, ni'c ica'tspichingaway Awayagatsna' jeme i-acusa̱tway cupʉcpajyat. Je' i-acusa̱tcʉs̈pate tsu'm mit s̈ʉ̱m mam Dios.

¹¹Ayé cupʉcpajyat vencia̱tcau ni'c ayé borreguwáy Jesucristu o'c cunu̱s̈ni'c mit iguichi'tcajau ima̱jlat. Je'jat vencia̱tcau ni'c inʉmgau ni'c icupʉjcap Jesucristu mit nunca iga-ayo̱wis̈cawu ividajat, mit je'jat tsʉ̱ngau dispuestu pa i-o'jcawa'n.

¹²Jinap ma ji'jca injo̱jtat mijchat mitsʉ̱ngapay tsajpni'c. ¡Pro̱wij de aye'jat jeme tsʉ̱ngapay na̱s̈ni'c mit lama̱tni'c! Ni'c Awayagatsna' manacway mam mijchat, mit awa'no'c itsʉ̱na ni'c caja-ijtʉp may tiempu pa iguiwatwa'n mal.

¹³Mit ayé dragón igui-is̈ ni'c ica'tsmanajcau na̱s̈ni'c, ipo'ctan ayé to's̈ay jeme ita̱cway ayé qui'chwáy.

¹⁴Mit ayé to's̈ay imoygau mechc ique̱gan tu'c mʉjway águila. Imoygau ayé que̱gan pa ma oya iguicupo'c ayé tsanay, mit nʉcs̈ nijemu mam igatsʉ̱na nepʉn, mit jem icuida̱tcau pa tu̱gup s̈iwit mit pu̱t.

¹⁵Mit ayé tsanay i-acpichin i-auni'c nʉ', mit jat tu'c mʉjnʉ' mit pujʉ'c mam inʉcs̈ ayé to's̈ay pa ma iguimunʉcs̈ac ayé mʉjnʉ'.

¹⁶Po ayé na̱s̈ imajyiu ayé to's̈ay, ni'c na̱s̈ ni-awa̱jtsʉu mit i-i'cpʉ'n ayé mʉjnʉ' jeme i-acpichinway dragona' i-auni'c.

¹⁷Cʉs̈ ayé dragón imu-awa'niu ayé to's̈ay, mit nʉcs̈ iguimutsuguinwatcʉs̈a japu̱t iwajyat, ni'c je'jat ijayaumaygap lo que imanda̱tpay Dios, mit inʉmgap ni'c icupʉjcap Jesucristu.