Read Sayula Popoluca El Apocalipsis 13 Bible Online

El Apocalipsis 13 - Sayula Popoluca bible

El Apocalipsis 13

¹Tʉnitenda̱jcʉu lama̱t-auni'c, mit tʉn-is̈ lama̱tni'c ni'c cu't tu'c aníma̱t. Mit ayé aníma̱t ijtʉu siete icopac mit diez iwaj, mit iwajni'jcat ijtʉu diez coronajat, mit icopacni'jcat itcʉjʉu tu'c nʉ'jy ja'yic, mit ayé itucotsp Dios.

²Mit ayé aníma̱t tʉn-is̈way imu-e'p as̈am tu'c ca̱jau, mit ijtʉu ita'jnat as̈am oso, mit i-ajw imu-e'p león i-ajw. Mit ayé dragón imoy ipoder, mit imoyey itrono pa imanda̱twa'n mʉgʉc.

³Mit tʉn-is̈ ni'c tu'c icopac pus̈ic hasta o'go'jcʉp, po cʉs̈ oytan ayé pus̈ mit ca-o'gu. Mit nu'pʉjʉn jayajwat nigu-épigʉjʉu mit inatspoguigau ayé aníma̱t.

⁴Mit i-adora̱tcau ayé dragón jeme imoyway poder ayé aníma̱t, mit i-adora̱tcawey ayé aníma̱t, inʉmgau: —¿Pʉn icojyáj ayé aníma̱t, mit pʉn oyáj iguimulucha̱t?

⁵Mit imoygawey ayé aníma̱t ma nʉm cosa ma̱jlatway, mit ma tucots Dios. Mit imoygau laj ma manda̱t cuarenta y dos po'jat.

⁶Mit chu̱chiu iguitucots Dios, mit itucojtsau inʉ'jy, mit itucotsey ayé laj aparta̱ticway mam itsʉ̱na Dios, mit itucotscʉs̈ey jeme tsʉ̱ngapay tsajpni'c.

⁷Mit imoygau laj ma mutsuguinwatcʉs̈ Dios ijayajwat, mit ma vencia̱tcʉs̈. Imoygawey laj ma manda̱tcʉs̈ nu'pʉjʉn grupu de jayajwat, nu'pʉjʉn nʉ'jcopajcat, nu'pʉjʉn cotscapay jatu'c ajwat, mit nu'pʉjʉn na̱s̈at.

⁸Mit i-adora̱tcau ayé aníma̱t nu'pʉjʉn jayajwat tsʉ̱ngapay en ayʉ̱́j mundu, ni'c ayé jayajwat catsʉ̱ngap ja'ygu'tic inʉ'jyat en ayé libru ijtʉpay ayé borreguwáy Jesucristu jeme iyacpay vida cacʉs̈ámpay, ni'c desde ichu̱chij ayʉ̱́j mundu je' nʉmic pa i-o'cwa'n.

⁹Te tu'c jayau ijtʉp ita̱tsʉc pa iguitumarawa'n, ma marau.

¹⁰Jeme imunʉs̈pay presu jatu'c jayau, je' we'ney iguimunʉs̈cawa'n. Te tu'c jayau ago'cp mit espada, je' we'ney i-o'cwa'n. Jemni'c Dios iguinʉmgʉ́s̈aj ijayajwat ma majmoyga mit ma cupʉjca mʉgʉc.

¹¹Mit cʉs̈ tʉn-is̈ jatu'c aníma̱t ipichin na̱s̈cʉtʉm pa na̱s̈ni'c. Mit ijtʉu mechc iwaj as̈am tu'c borreguwáy iwaj, po je' cotsp as̈am dragón.

¹²Mit je' manda̱tp as̈am primeruway aníma̱t, mit manda̱t mit je', mit inʉmgʉs̈ap jayajwat jeme tsʉ̱ngapay en ayʉ̱́j mundu ma adora̱tca ayé primeruway aníma̱t jeme igui-oytajnaway ipus̈ mit ca-o'gu.

¹³Je' iwatey majatway milagrujat, ni'c oyau igui-acmi'n jʉjn desde tsajpni'c hasta na̱s̈ni'c mam igui-e'pca nu'pʉjʉn jayajwat.

¹⁴Mit iwe̱jta̱cp nu'pʉjʉn jayajwat tsʉ̱ngapay en ayʉ̱́j mundu ni'c igui-actuwat ayé milagrujat ayé primeruway aníma̱t. Ayé iwat mam igui-e'p ayé aníma̱t, mit imanda̱tcʉs̈ jayajwat ma watca tu'c tiyu̱s̈ imu-e'pay ayé aníma̱t jeme tsʉ̱naway pus̈ic mit oytan.

¹⁵Mit ayé segunduway aníma̱t imoygau laj ma mo' vida ayé tiyu̱s̈, pa we'n oyáj icots, mit inʉmáj ni'c ma o'jca nu'pʉjʉn jeme igawangapay igui-adora̱tcap.

¹⁶Mit inʉm ni'c nu'pʉjʉn jayajwat, mʉjayajwat mit jeme camʉjninʉmijcatway, ricujat, pro̱wijat, yo'ygapay libre mit mozojat, ma yajcaja tu'c marca i-oyimaycʉ'ni'jcat o iwimpacni'jcat.

¹⁷Mit inʉm ni'c nepʉn ca-oyáj ijuy ne ito'c te igamuyo'yp ayé marca, te igamuyo'jyap inʉ'jy ayé aníma̱t, mit te igamuyo'jyapey inúmero.

¹⁸Mit pa nas̈jawiwa'n ayʉ̱́j, oy na-is̈cápca. Jeme i-is̈capay, ma majya inúmero ayé aníma̱t, ni'c ayé número inʉmo'jcʉp tu'c jayau. Mit ayʉ̱́j ayé número: seiscientos sesenta y seis.