Read Sayula Popoluca El Apocalipsis 16 Bible Online

El Apocalipsis 16 - Sayula Popoluca bible

El Apocalipsis 16

¹Tʉnmarau tu'c jeme cotspay mʉgʉc templuni'c, inʉmgʉs̈au ayé siete ángejlat: —Munʉ́s̈ca ayé siete vasujat patsijcatway mit tugumutscu'tca nu'pʉjʉn ayé na̱s̈, ni'c Dios icastiga̱tcʉs̈ájama jayajwat na̱s̈ni'cway.

²Mit nʉcs̈ primeruway ángel mit imutscu't ivasu na̱s̈ni'c, mit jayajwat iguipichingajau lla̱gas ma̱jlatway mit iguipʉgo'jcau. Iguijatcau we'n ni'c imuyo'ygajau ayé aníma̱t imarca, mit i-adora̱tcajau itiyu̱s̈.

³Mit imumechcway ángel imutscu't ivasu lama̱tni'c, mit ayé lama̱t jat tsabats as̈am á̱nima-nipin, mit o'jcau nu'pʉjʉn aníma̱jtat jeme tsʉ̱ngapay lama̱tni'c.

⁴Mit imutu̱gupay ángel imutscu't ivasu mʉjnʉ'ni'jcat mit mam imu't nʉ'jat, mit nu'pʉjʉn jatcau as̈am nipin.

⁵Mit tʉnmarau icots ayé ángel jeme imanda̱tpay nʉ'jat, inʉm: —Oh Señor, oyo'gu lo que inwatpay mit oyo'gu injuzga̱t. Mi̱ mitsʉ̱nau ámbanu, mitsʉ̱nap jinap, mit limpiu intsʉ̱na.

⁶Ni'c ayʉ̱́j jayajwat i-acpujʉ'jcajau inipin injayajwat mit improfetajat, mit jinap inmoygʉs̈p nipin ma u̱jca. We'n iguimerecia̱tcap.

⁷Mit tʉnmarawey jatu'c jeme cotspay mam isacrifica̱tca, inʉm: —Iyacs̈ta'cway ayé, Señor Dios, mi̱ inaguep nu'pʉjʉn poder, mit mi̱ oyo'gu injuzga̱t.

⁸Mit imumactas̈pay ángel imutscu't ivasu s̈ʉuni'c, mit ayé s̈ʉjw imoygau laj ma no'jcʉs̈ jayajwat ni'c toyp as̈am jʉjn.

⁹Mit jayajwat toygau ni'c mʉgʉgo'c ijaj s̈ʉwáy, mit imalninʉmgau Dios ni'c je' manda̱t ma tsʉ̱nga castiga̱tic, mit je'jat igacuyaguigawu ima̱jlat ne iga-oyninʉmgawu Dios.

¹⁰Mit imucincuway ángel imutscu't ivasu itrononi'c mam imanda̱t ayé aníma̱t. Mit cuchítimiu jaran nu'pʉjʉn laj imanda̱tpay ayé aníma̱t. Mit nu'pʉjʉn ijayajwat ito'gau ito̱jtsat ni'c iguipʉgo'jcau ayé.

¹¹Mit imalninʉmgau Dios tsajpni'cway ni'c iguipʉgo'jcau ayé lla̱gas, po majawe'naj igacuyaguigawu ayé ma̱jlat iwatcaway.

¹²Mit imuseisway ángel imutscu't ivasu en ayé mʉjnʉ' Eufrates jeme mʉjo'cway, mit tʉ̱ts jaran ayé nʉ', mit jat tu'c to̱u mam iyo'ygawa'n ayé rejyat orientejatway.

¹³Mit tʉn-is̈ ayé dragón, ayé aníma̱t mit ayé we̱tpay profeta, mit iguipichingajau i-auni'jcat tu̱gup ma̱lway espíritujat as̈am wec.

¹⁴Ni'c ayé espíritujat demo̱nyujat ayé, mit i-ajque's̈cau ipodejrat. Mit nʉs̈cau mam itsʉ̱nga rejyat nu'pʉjʉn mundu, mit i-apʉcmujcau ma tsuguinwatca en ayé mʉjway s̈ʉjw iyacway Dios, ni'c je' ijtʉp nu'pʉjʉn poder.

¹⁵Inʉmp el Señor: “Márauga, tʉmimp de repente as̈am tu'c nu'mpay. Tsʉ̱náj oy jeme prepara̱ticway ni'c je' nicuida̱jtʉp magayo'y sin jamuc, mit we'n nepʉn ca-oyáj igui-acwinchu̱gap.”

¹⁶Mit i-apʉcmujcau nu'pʉjʉn ayé rejyat en tu'c lugar inʉ'jyway hebreo-auni'c Armagedón.

¹⁷Mit imusieteway ángel imutscu't ivasu s̈e'mni'c, mit cʉs̈ mam itsʉ̱na ayé templu tsajpni'cway cotsta̱c tu'c jeme tsʉ̱naway mam i-it ayé trono, inʉm: —Cʉs̈way nu'pʉjʉn.

¹⁸Mit cʉs̈ quijan mit ya̱s̈ ániway mit it may ruidu, mit nas̈ tu'c us̈ mʉgʉcway yam na̱s̈ni'c. Mit nunca cani-itp tu'c us̈ as̈am ayʉ̱́jway desde i-ítcaj jayajwat en ayʉ̱́j mundu.

¹⁹Mit ayé mʉjway nʉ'jcopac jat tu̱gup parte ni'c ni-awa̱jtsʉu na̱s̈, mit ca'ugau nu'pʉjʉn nʉ'jcopajcat, mit Dios inijawiu ayé mʉjway nʉ'jcopac Babilonia pa iguicastiga̱twa'n, mit itu'mbajcastiga̱táj jaran pa ma cʉs̈.

²⁰Mit i-is̈togoygau nu'pʉjʉn copac lama̱jtugumay, mit nejʉmay copac cajatánu.

²¹Mit ca'u tsajpni'c tu'c tsa'tú̱ mʉgʉcway mit iguituca'ugau jayajwat, mit cada tsa'tú̱ u'ts como cuarenta kilu. Mit jayajwat imalninʉmgau Dios ni'c je' i-ajyu't ayé castigu de tsa'tú̱, ni'c mʉgʉgo'c ayé castigu pa je'jat.