Read Sayula Popoluca El Apocalipsis 19 Bible Online

El Apocalipsis 19 - Sayula Popoluca bible

El Apocalipsis 19

¹Mit cʉs̈ tʉnmarau tu'c jayaujuc mayway jeme cotscapay mʉgʉc tsajpni'c, inʉmgau: ¡Namʉjninʉ́mga Dios! El Señor Dios nas̈salva̱tcap. Na-oyninʉ́mga je' mit narespetá̱tca ni'c je' ijtʉp nu'pʉjʉn poder.

²Je' juzga̱tp yacs̈ic ni'c icondena̱t ayé malto's̈ay, ni'c je' i-actuwatcʉs̈ mal nu'pʉjʉn jayajwat ni'c je' ma̱lo'c. Mit Dios i-actutso̱c ayé to's̈ay ni'c je' i-ago'jcʉs̈ Dios ijayajwat.

³Cʉs̈ inʉmgawatu: —¡Namʉjninʉ́mga Dios ni'c i-actutso̱jcáj ayé to's̈ay pa siempre jʉngʉtʉm!

⁴Mit ayé veinticuatro na'waywájat mit ayé mactas̈p as̈am ángejlat nicos̈atenda̱jcʉjʉu mit i-adora̱tcau Dios jeme tsʉ̱napay itrononi'c, mit inʉmgau: —¡We'n ma jat! ¡Namʉjninʉ́mga Dios!

⁵Mit mam itsʉ̱na ayé trono, cots tu'c jeme inʉmway: Oyninʉ́mga Dios ni'c mijchat inservia̱tcajap je', mit impʉ̱tcapey. Ma oyninʉ́mga je' mʉjayajwat mit jeme camʉjninʉmijcatway.

⁶Mit tʉnmarau as̈am icotsca tu'c mayway jayaujuc, mit ayé ya̱s̈ as̈am cuandu ica'u mayo'c nʉ' mit as̈am cuandu iya's̈ mʉgʉc ániway, inʉmgau: ¡Namʉjninʉ́mga el Señor Dios ni'c je' ijtʉp nu'pʉjʉn poder, mit je' manda̱tp!

⁷Ma ji'jca mʉgʉc najo̱jtat mit na-oyninʉ́mga Dios, ni'c ayé borreguwáy Jesucristu imunipʉjcʉ̱́j ijayajwat as̈am tu'c nicʉ'pa̱jtʉpay, mit ijayajwat tsʉ̱ngap prepara̱tic pa iguipʉctsougáj,

⁸mit ijayajwat inʉmgajau ma tsʉ̱nga cutigatsijcat mit jamuc finuway, limpiu mit jeme cuta'cs̈pay. Ni'c ayé jamuc finuway inʉmo'jcʉp ni'c Dios ijayajwat yo'ygap limpiu.

⁹Mit tu'c ángel tʉs̈najau: —Ja'y yename: “Tsʉ̱ngáj oy jeme tsʉ̱ngapay imvita̱tic en ayé cayna̱s̈, ni'c ayé borreguwáy Jesucristu imunipʉjcʉ̱́j ijayajwat as̈am tu'c nicʉ'pa̱jtʉpay.” Mit tʉs̈najau: —Ayʉ̱́j inʉmway Dios pichináj iyacs̈ta'cway.

¹⁰Mit tʉnicos̈atenda̱jcʉu ita'ná̱m ayé ángel pa tʉs̈-adora̱twa'n. Po je' tʉs̈najau: —Camwat we'n. Ʉ̱ tʉnservia̱jtap Dios as̈amu mi̱ mit as̈amey inhermanujat jeme i-actujawigapay jayajwat lo que inʉmway Jesús. Solo Dios inadora̱táj. Ni'c jeme cotscapay pa Dios, inʉmdacyo'ygap lo que Jesús inʉmway.

¹¹Mit cʉs̈ tʉn-is̈ tsajp awa'tsic, mit tʉn-is̈ tu'c po'pcawa̱yu, mit jeme itucu'tpay ayé tu'c jeme cumplia̱tpay mit iwatp iyacs̈ta'cway. Mit je' juzga̱tp yacs̈ic mit oyo'gu iguimulucha̱tcʉs̈ jayajwat.

¹²Mit iwijnat que's̈ as̈am jʉjn, mit icopacni'c ijtʉu may coronajat. Mit ijtʉu tu'c nʉ'jy ja'yic, mit nepʉn ca-oyawu igui-is̈cap ayé nʉ'jy, solo je'yu i-is̈cap.

¹³Je' tsʉ̱nau cutigatsic mit tu'c jamuc, mit ayé jamuc jinic mit nipin. Mit ijtʉu tu'c nʉ'jy, inʉm: Ayé Palabra nas̈actu-is̈capcapay Dios.

¹⁴Mit nu'pʉjʉn tsʉ̱ngapay tsajpni'c inatspoguigau je', mit je'jat yo'ygau as̈am tu'c soldajúc, mit tsʉ̱ngau cutigatsic mit puru jamuc finuway, ayé po'p mit limpiu. Mit ituyo'ygau po'pcawa̱yujat.

¹⁵Mit je' i-auni'c pichimp tu'c espada me'icway, mit ayé oyáj iguitucotcʉs̈ nu'pʉjʉn jayajwat, mit imanda̱tcʉs̈áj mʉgʉc. Je' i-actunas̈cʉs̈áj as̈am cuandu iguimʉ'cs̈ca uva, mit Dios icastiga̱tcʉs̈áj mʉgʉc jayajwat, ni'c je' ijtʉp nu'pʉjʉn poder.

¹⁶Mit tsʉ̱nap ja'yic ijamucni'c mit ipuyni'c ayʉ̱́j nʉ'jy, inʉm: “Je' meru Rey mit imanda̱tp nu'pʉjʉn.”

¹⁷Mit tʉn-is̈ tu'c ángel mit je' tenau meru s̈ʉuni'c. Je' cots mʉgʉc mit inʉmgʉs̈au nu'pʉjʉn jojnat jeme que̱jcapay tsajpni'c, inʉm: —Mínga mit ni-apʉcmújcʉjʉ pa intsʉ̱ngawa'n en ayé mʉjway cayna̱s̈ iwatámpay Dios.

¹⁸Mit incaygáj rejyat, capitájnat mit mʉjayajwat. Incaygámpey cawa̱yujat mit jeme iguitucu'tcapay, mit incaygáj nu'pʉjʉn jayajwat yo'ygapay libre mit mozojat, mʉjayajwat mit jayajwat camʉjninʉmijcatway.

¹⁹Mit tʉn-is̈ ayé aníma̱t mit rejyat ayʉ̱́j mundujway, imuyo'ygau soldajúc, mit je'jat ni-apʉcmujcʉjʉu pa iguimutsuguinwatcawa'n Jesucristu jeme itucu'tpay ayé po'pcawa̱yu, mit we'ney ijayajwat.

²⁰Mit i-actangau ayé aníma̱t mit we'ney ayé we̱tpay profeta jeme iwatway milagrujat mam igui-e'p ayé aníma̱t, mit ayé we̱tpay profeta iwe̱jta̱jcʉs̈ ayé jayajwat jeme ipʉctsougajaway imarca ayé aníma̱t, mit jeme i-adora̱tcajaway itiyu̱s̈. Mit cʉs̈ inimechquij ica'tstʉgʉygau nijutujcat en tu'c laguna mam itinin jʉjn mit azufre.

²¹Mit ayé jeme itucu'tpay ayé po'pcawa̱yu i-ago'jcʉs̈ japu̱t jayajwat mit ayé espada jeme pichinway i-auni'c. Mit nu'pʉjʉn jojnat cu̱s̈cʉjʉu iguicáygaj ayé cuerpujat.