Read Sayula Popoluca El Apocalipsis 20 Bible Online

El Apocalipsis 20 - Sayula Popoluca bible

El Apocalipsis 20

¹Mit tʉn-is̈ tu'c ángel imanac tsajpni'c, mit imuyo'y tu'c ya̱pi itu-awa'tsámpay ayé cʉt jeme jugo'cway, mit icʉ'ni'c imuyo'y tu'c mʉjway cadena.

²Mit i-actan ayé dragón, mit je' nije'yu tsanay jeme tsʉ̱naway ámbanu, ijtʉwey inʉ'jy Awayagatsna' mit Satanás. Mit icutsumda̱c pa mil añu.

³Mit ica'tstʉgʉy en ayé cʉt jucway, mit i-atucta̱c mit iyac bien asegura̱tic. Iyac jem pa magajawe̱t nepʉn en ayʉ̱́j mundu hasta tegacumplia̱tp mil añu. Mit cʉs̈wa'n i-acjo'ngájatu pa tu'c tiempu.

⁴Mit tʉn-is̈ may tronojat mit nitsʉ̱nda̱jcʉjʉu jem jeme nʉmicway pa ijuzga̱tcawa'n. Mit tʉn-ís̈ey jeme iyo'cpus̈tujcaway ni'c inʉmdacyo'ygau lo que Jesús inʉmway mit icupʉjcajaway Dios ipalabra. Je'jat iga-adora̱tcawu ayé aníma̱t ne itiyu̱s̈, ne caniyajcʉjʉwu iguimarca̱tcawa'n iwimpacni'jcat ne icʉ'ni'jcat. Je'jat jutucta̱jcau mit manda̱tcau mit Cristu mil añu.

⁵Po japu̱t á̱nimajat cajutucta̱jcawu hasta icumplia̱jt mil añu. Po jeme jutucta̱jcʉ'jcaway, jemé ayé Dios ijayajwat.

⁶Po Dios ijayajwat tsʉ̱ngáj oy ni'c jutucta̱jcʉ'jcau mit cajatsʉ̱ngáj condena̱tic jʉngʉtʉm en ayé últimu castigu. Je'jat tangáj as̈am pa̱nijat pa iguiservia̱tcajawa'n Dios mit Cristu, mit manda̱tcáj mit je' mil añu.

⁷Icumplia̱twa'n ayé mil añu, i-acjo'ngájatu Awayagatsna' mam itsʉ̱na presu cutsumda'guic.

⁸Mit ipichinwa'n, iwe̱jta̱jcʉs̈áj jayajwat jeme tsʉ̱ngapay nu'pʉjʉn mundu. Mit iwe̱támpey ayé rejyat Gog mit Magog, mit i-apʉcmujcʉs̈áj ijayajwat pa itsuguinwatcawa'n. Je'jat mayo'jcat as̈am ayé po'y lama̱t-auni'cway, ayé ca-oyap nas̈maycupa̱ti.

⁹Mit jʉmgapa'tu imingadá̱jcaj mit i-apitucje̱jcau mam itsʉ̱nga Dios ijayajwat en ayé nʉ'jcopac Jerusalén, mit Dios iwano'cp ayé nʉ'jcopac. Mit Dios i-acmanac jʉjn tsajpni'c mit i-ago'cpʉ'n ayé jayaujuc.

¹⁰Mit Awayagatsna' jeme iwe̱jta̱jcʉs̈way ayé jayajwat ica'tstʉgʉygau en ayé laguna mam i-it puru jʉjn mit azufre, mit jemey itsʉ̱nga ayé aníma̱t mit ayé we̱tpay profeta. Mit itunas̈cáj jem tsu'm mit s̈ʉ̱m pa siempre.

¹¹Mit tʉn-is̈ tu'c mʉjway trono po'pway, mit tʉn-ís̈ey Dios jeme tsʉ̱napay jem. Mit nu'pʉjʉn na̱s̈ mit tsajp i-is̈togoygau mit caja-itu laj pa je'jat mam Dios itsʉ̱na.

¹²Mit tʉn-is̈ á̱nimajat jutucta̱jcaway, mʉjayajwat mit camʉjninʉmijcatway. Je'jat tenagau mam Dios itsʉ̱na. Mit Dios i-awa̱ts librujat, mit i-awa̱tsey jatu'c libru, en ayé libru tsʉ̱ngap ja'ygu'tic jeme itcʉjʉpay vida cacʉs̈ámpay. Mit Dios ijuzga̱tcʉs̈ á̱nimajat as̈amu itsʉ̱na ja'ygu'tic libruni'jcat, ni'c jem i-it lo que iwatcaway.

¹³Mit nu'pʉjʉn á̱nimajat tsʉ̱ngaway lama̱tni'c pichingau, mit nu'pʉjʉn ma̱lway á̱nimajat tsʉ̱ngaway cʉtʉm pichingawey, mit Dios ijuzga̱tcʉs̈ as̈amu iguiwátcaj.

¹⁴Mit ayé á̱nimajat pichingaway cʉtʉm ica'tstʉgʉygau en ayé laguna mam i-it jʉjn. Ayʉ̱́j ayé últimu castigu.

¹⁵Mit jeme catsʉ̱ngaway ja'ygu'tic libruni'c ca-itcʉjʉwu vida cacʉs̈ámpay, mit ica'tstʉgʉygau en ayé laguna ijtʉpay jʉjn.