Read Sayula Popoluca El Apocalipsis 22 Bible Online

El Apocalipsis 22 - Sayula Popoluca bible

El Apocalipsis 22

¹Mit cʉs̈ ayé ángel tʉs̈actu-is̈ tu'c mʉjnʉ' tʉ'cs̈icway, mit ayé ijtʉu nʉ' iyacpay vida mit que's̈tunas̈ as̈am cristal. Mit ayé mʉjnʉ' pichin meru Dios itrononi'c mam itsʉ̱na-ey ayé borreguwáy Jesucristu.

²Mit ayé mʉjnʉ' pujʉ'c es̈pu̱t calle en ayé nʉ'jcopac mit cada laj nʉ-auni'c ijtʉu tu'c cujy iyacpay vida, mit ayé iwatp doce clase ifruta, mit iyacp itʉjm cada po'. Mit ayé cujy i-ajy ipʉjcap pa iguitu-ac-oytangawa'n jayajwat.

³Mit caja-itáj jem nejʉmay maldición ni'c jem itsʉ̱nawa'n itronojat Dios mit ayé borreguwáy Jesucristu, mit ijayajwat iguiservia̱tcajáj.

⁴Mit i-e'pcajáj iwindugʉt, mit je' inʉ'jy imuyo'ygáj iwimpacni'jcat.

⁵Mit jem caja-itáj tsu', ne iganesita̱tcáj ayé luz iyacpay tu'c lámpara ne luz iyacpay s̈ʉjw, ni'c el Señor Dios ita'cs̈cʉs̈áj, mit je'jat manda̱tcáj pa siempre.

⁶Mit tʉs̈najau ayé ángel: —Iyacs̈ta'cway ayʉ̱́j lo que inʉmpay Dios, ayé cumplia̱táj. Mit el Señor Dios i-actunʉmgʉs̈p jeme cotscapay pa je', mit i-ajyu't i-ángel pa igui-actujawigʉs̈wa'n ijayajwat jeme jatámpay pe'jyu, mit ayé itp ti ijatwa'n.

⁷Inʉmp Jesucristu: —¡Márauga, tʉmi'náj pe'jyu! Tsʉ̱náj oy jeme iguarda̱támpay lo que inʉmpay ayʉ̱́j libru, mit ayé itp ti ijatwa'n.

⁸Ʉ̱ Juan tʉnmarau mit tʉn-is̈ ayʉ̱́j cosajat. Mit cʉs̈ tʉs̈marajw mit tʉs̈-is̈ ayé, tʉnicos̈atenda̱jcʉu ita'ná̱m ayé ángel pa tʉs̈-adora̱twa'n je', ni'c je' tʉs̈actu-is̈ ayʉ̱́j cosajat.

⁹Po je' tʉs̈najau: —Camwat we'n. Ʉ̱ tʉnservia̱jtap Dios as̈amu mi̱ mit as̈amey inhermanujat jeme cotscapay pa Dios, mit we'ney jeme iguarda̱tcapay lo que inʉmpay ayʉ̱́j libru. Más oy pi adora̱t Dios.

¹⁰Mit tʉs̈najau: —Actujawigʉs̈ jayajwat lo que inʉmpay ayʉ̱́j libru mit camcuyu'ts, ni'c ayé inʉmp ti jatámpay, mit ayé jatáj pe'jyu.

¹¹Jeme iwatpay mal, siguia̱táj iguiwat mal. Mit jeme yo'ypay mancha̱tic mit ma̱jlat, siguia̱táj iyo'y mancha̱tic. Mit jeme iwatpay oy, siguia̱táj iguiwat oy. Mit jeme yo'ypay limpiu, siguia̱táj iyo'y limpiu.

¹²Inʉmp Jesucristu: —Márauga, tʉmi'náj pe'jyu, mit tʉnmumi'náj premiu pa tʉs̈mo'wa'n cada jayau as̈amu iguiwajt.

¹³Ʉ̱ tʉ-Alfa mit Omega, ayé inʉmo'jcʉp ni'c ʉ̱ tʉtsʉ̱najʉ'c mit tʉgacʉs̈áj.

¹⁴’Tsʉ̱ngáj oy jeme icuyaguigaway nu'pʉjʉn ma̱jlat, ni'c je'jat itcʉjʉ̱́j derechu pa itsʉ̱ngawa'n mam i-it ayé cujy iyacpay vida, mit oyáj itʉgʉyga en ayé nʉ'jcopac mam imanda̱t Dios.

¹⁵Po jeme cajayaumaygapay tangáj pe'ta̱m, as̈am tso'cna'jat, chajyo'ypajyat, ago'cpajyat, tiyu̱s̈wampajyat mit nu'pʉjʉn jeme i-ajca's̈ʉ'jcapay we̱jtat.

¹⁶’Ʉ̱ Jesús tʉnajyu't tʉn-ángel pa ma actujawigʉs̈ ayʉ̱́j cosajat nu'pʉjʉn grupu de cupʉcpajyat. Ʉ̱ tʉtsʉ̱najʉ'c mit tʉpichin David ifamiliani'c. Ʉ̱ as̈am tʉma̱jts ta'cs̈pay jopoytsu'mnaj, ni'c tʉmi'náj pa tʉmanda̱twa'n.

¹⁷Mit Espíritu Santu mit Cristu ijayajwat inʉmgap: —Mínga. Mit jeme imarawámpay ma nʉmey: —Mínga. Mit jeme nʉ-u̱go'jcʉpay ma mi'n pa iguipʉctsowa'n we'nujyu ayé nʉ' iyacpay vida, mit jeme iwampay inʉ-u'cwa'n ma mi'n.

¹⁸Tʉnactujawip nu'pʉjʉn jeme imarapay lo que inʉmpay ayʉ̱́j libru mit ayé cosajat jeme jatámpay: Te tu'c jayau i-acyagachip ayʉ̱́j libru, Dios igui-acmijnáj ayé castigujat jeme tsʉ̱napay ja'yic en ayʉ̱́j libru.

¹⁹Mit te tu'c jayau ichi'jtap tu'c parte lo que inʉmpay ayʉ̱́j libru mit jeme jatámpay, Dios iguichi'jtámpey iparte en ayé libru ijtʉpay Dios, mit ca-ijtʉ̱́j vida cacʉs̈ámpay, mit catsʉ̱náj en ayé nʉ'jcopac icupi̱way Dios, mit ne igapʉctsowáj nejʉmay premiu jeme tsʉ̱napay ja'yic en ayʉ̱́j libru.

²⁰Jesucristu nas̈actujawigap ayʉ̱́j cosajat, mit inʉmp: —Iyacs̈ta'cway tʉmi'náj pe'jyu. We'n ma jat. Mi'n Señor Jesús.

²¹El Señor Jesucristu pi is̈moygac favor pa mijchat minu'pʉjʉjnat. Yam icʉs̈.