Read Sayula Popoluca El Apocalipsis 4 Bible Online

El Apocalipsis 4 - Sayula Popoluca bible

El Apocalipsis 4

¹Mit cʉs̈ tʉn-is̈ tu'c puerta awa'tsicway tsajpni'c. Mit tʉs̈mucots ayé nije'yu jeme tʉs̈mucojtsʉ'cway primeru, mit je' cots as̈am tu'c trompeta iya's̈, mit inʉm: —Cu't yam mit tʉ-actu-e'páj ayé cosajat jatámpay más después.

²Mit Espíritu Santu tʉs̈domina̱t mit tʉs̈actu-is̈ tu'c visión. Tʉn-is̈ tsajpni'c tu'c trono mit jemey itsʉ̱na Dios jeme manda̱tpay itrononi'c.

³Mit Dios tsʉ̱nau itrononi'c, mit je' que's̈ oymanac as̈am jaspe-tsa' mit cornalina-tsa' jeme quijangapay. Mit it itrononi'c tu'c arcu iris mit ayé cuji'c oymanac as̈am tu'c esmeralda-tsa'.

⁴Mit alrededor de ayé trono itey veinticuatro tronowájat. Mit tʉn-is̈ ni'c tsʉ̱ngau en ayé tronowájat veinticuatro na'waywájat mit cutigatsijcat mit po'pjamuc, mit icopacni'jcat icomgau coronajat waticway de oro.

⁵Mit Dios itrononi'c quijan mit ya̱s̈o'c ániway, mit it mayo'c ruidu. Mit mam i-it ayé trono, tinin siete jʉmbolajat, mit ayé inʉmo'jcʉp ayé siete espíritujat jeme tsʉ̱ngapay mit Dios.

⁶Mit jʉpm de ayé trono it as̈am tu'c lama̱t de puru is̈tic, mit que's̈tunas̈ as̈am cristal. Mit tomo'c ayé trono mit alrededor it mactas̈p as̈am ángejlat, mit aye'jat itcʉjʉp mayo'c wijn jʉpm mit mugus̈á̱m.

⁷Mit primeruway ángel, ayé as̈am tu'c león. Mit segunduway ángel as̈am tu'c tu̱ruwáy. Mit tercerway ángel ijtʉu iwindugʉt as̈am jayau. Mit cuartuway ángel as̈am tu'c águila jeme que̱cpay.

⁸Mit ayé mactas̈p ángejlat, cada tu'c ijtʉwey seis ique̱gan, mit iyucuinm mit ijo̱jtugum ijtʉu mayo'c wijn. Mit catentangap iguinʉmga tsu'm mit s̈ʉ̱m: Mʉjninʉmic itsʉ̱na el Señor Dios, mit ca-itp jatu'c as̈am je', mit je' ijtʉp nu'pʉjʉn poder. Je' tsʉ̱nau ámbanu, je' tsʉ̱nap jinap, mit tsʉ̱náj pa siempre.

⁹Mit ayé mactas̈p ángejlat i-oyninʉmgap Dios jeme tsʉ̱napay itrononi'c, mit inʉmí̱jcajap ni'ctiyu̱s̈, ni'c je' tsʉ̱nap pa siempre.

¹⁰Iguimárauga we'n ayé veinticuatro na'waywájat, nicos̈atenda̱jcʉjʉp ita'ná̱m Dios jeme tsʉ̱napay itrononi'c, mit i-adora̱tcap je' ni'c je' tsʉ̱nap pa siempre. Mit ichi'tcap icoronajat mit ica'tscap itrono-á̱m, mit inʉmgap:

¹¹Señor, mi̱ is̈merecia̱tp jayajwat is̈-oyninʉmgáj, is̈mʉjninʉmgáj mit is̈nʉmgajáj ni'c inaguep poder, ni'c mi̱ inwat nu'pʉjʉn cosajat, mit je'jat itcap ni'c we'n is̈wajn, mit jemni'c is̈wajt we'n.