Read Sayula Popoluca El Apocalipsis 5 Bible Online

El Apocalipsis 5 - Sayula Popoluca bible

El Apocalipsis 5

¹Mit Dios tsʉ̱nau itrononi'c, mit tʉn-is̈ i-oyimaycʉ'ni'c tu'c noc sadatsicway jeme tsʉ̱naway ja'yic ijo̱jtugum mit iyucuinm. Mit ayé noc tsʉ̱nau atuguic mit siete sellu itunu'jcaway.

²Mit tʉn-is̈ tu'c ángel jeme ito'jcʉpay maj, mit cots mʉgʉc, inʉm: —¿Pʉn merecia̱tp pa igui-awa'tswa'n ayʉ̱́j noc mit pa iguichi'jtawa'n isellujat?

³Mit nepʉn ca-oyawu igui-awa'ts ayé noc, ne tsajpni'cway, ne na̱s̈ni'cway ne na̱s̈cʉtʉmay, ne ca-oyawu igui-e'p ayé noc.

⁴Mit tʉjʉyo'c ni'c nepʉn camerecia̱tp igui-awa'tswa'n ayé noc, mit nepʉn ca-oyawu igui-e'p ne iguicots.

⁵Mit tu'c de ayé na'waywájat tʉs̈najau: —Camjʉywit. E'pnaj, Jesucristu vencia̱tway, mit jinap je' ijtʉp poder as̈am león. Mit je' pichin Judá ifamiliani'c mit je' pichiney David ifamiliani'c. Je' vencia̱tway mit oyap igui-awa'ts ayé noc, mit oyap iguichi'tcʉs̈a ayé siete sellujat itunu'jcaway.

⁶Mit mam i-it ayé trono mam itsʉ̱nga ayé mactas̈p ángejlat mit mam itsʉ̱nga ayé na'waywájat, meru es̈pu̱tum tʉn-is̈ ni'c tenap tu'c borreguwáy mit que's̈p as̈am jeme i-ago'jcaway. Je' ijtʉu siete iwaj, mit ijtʉwey siete iwijn, mit ayé inʉmo'jcʉp ayé siete espíritujat i-ajyu'tway Dios nu'pʉjʉn laj en ayʉ̱́j mundu.

⁷Mit ayé borreguwáy nʉcs̈ mam itsʉ̱na Dios itrononi'c, mit ipʉc ayé noc jeme Dios ijtʉway i-oyimaycʉ'ni'c.

⁸Mit cuandu iguipʉjc ayé noc, ayé mactas̈p ángejlat mit ayé veinticuatro na'waywájat nicos̈atenda̱jcʉjʉu ita'ná̱m ayé borreguwáy. Nu'pʉjʉn je'jat itcʉjʉu i-arpajat, mit ivasujat waticway de oro patsijcat mit po̱m jeme wi's̈pay, mit ayé po̱m iwi's̈ic inʉmo'jcʉp as̈am i-ora̱tca Dios ijayajwat.

⁹Mit i-ʉugau tu'c namay ʉu, inʉmgau: Mi̱ is̈merecia̱tp is̈pʉcwa'n ayé noc mit is̈awa'tswa'n ayé siete sellujat, ni'c mi̱ is̈ago'jcau mit ʉjtsat is̈juybichingau mit inyipin pa tʉtsʉ̱́nga mit Dios, mit tʉmingap de nu'pʉjʉn grupu de jayajwat, de nu'pʉjʉn cotscapay jatu'c ajwat, de nu'pʉjʉn nʉ'jcopac mit de nu'pʉjʉn na̱s̈.

¹⁰Mit is̈yajcau ʉjtsat pa tʉtsʉ̱́nga as̈am rejyat mit as̈am pa̱nijat pa tʉserviá̱tcaja Dios, mit is̈acmanda̱tcáj na̱s̈ni'c.

¹¹Mit tʉn-is̈ mit tʉnmarau icótsca may ángejlat mam i-it ayé trono mit mam itsʉ̱nga ayé mactas̈p ángejlat mit mam na'waywájat. Mit it may ángejlat hasta nagamaycupa̱tip.

¹²Mit inʉmgau mʉgʉc: Ayé borreguwáy Jesucristu jeme i-ago'jcaway merecia̱tp iguipʉctsowa'n nu'pʉjʉn poder, mit nu'pʉjʉn riqueza. Je' ijawip nu'pʉjʉn mit ijtʉp nu'pʉjʉn poder. Na-oyninʉ́mga je' mit namʉjninʉ́mga, mit nanʉ́mga ni'c je' oymanac.

¹³Mit nu'pʉjʉn iwatway Dios, nu'pʉjʉn jeme itpay tsajpni'c, na̱s̈ni'c, na̱s̈cʉtʉm, lama̱tni'c mit nu'pʉjʉn itpay jem, tʉnmarau iguinʉmga: Na-oyninʉ́mga Dios jeme tsʉ̱napay itrononi'c, mit na-oyninʉ́mga ayé borreguwáy Jesucristu, ni'c je'jat mʉjninʉmijcat mit itcʉjʉp nu'pʉjʉn poder pa nu'pʉjʉn tiempu.

¹⁴Ayé mactas̈p ángejlat inʉmgau: —We'n ma it. Mit ayé veinticuatro na'waywájat nicos̈atenda̱jcʉjʉu mit i-adora̱tcau Dios jeme tsʉ̱napay pa siempre.