Read Sayula Popoluca El Apocalipsis 6 Bible Online

El Apocalipsis 6 - Sayula Popoluca bible

El Apocalipsis 6

¹Tʉn-is̈ cuandu ayé borreguwáy Jesucristu igui-awa̱jts tu'c de ayé siete sellujat, mit tʉnmarau iguinʉjm tu'c de ayé mactas̈p ángejlat. Je' cots mʉgʉc as̈am tu'c ániway iya's̈, inʉm: —Mi'n e'p.

²Mit tʉn-is̈ tu'c po'pcawa̱yu, mit jeme iguitucu'tway ijtʉu tu'c arcu itutʉpay, mit imoygau tu'c corona pa iguicomwa'n, mit je' pichin pa ivencia̱twa'n mit oyau iguivencia̱t nu'pʉjʉn.

³Cuandu igui-awa̱jts imumechcway sellu, tʉnmarau iguinʉjm ayé segunduway ángel, inʉm: —Mi'n e'p.

⁴Mit pichin jatu'c cawa̱yu jeme tsabatsway. Mit jeme iguitucu'tway imoygau poder pa igui-actsuguinwatcʉs̈wa'n jayajwat na̱s̈ni'cway, pa we'n jayajwat ma ni-ago'jcʉjʉ. Mit imoygau tu'c mʉjway espada.

⁵Igui-awa̱jts imutu̱gupay sellu, tʉnmarau iguinʉjm ayé tercerway ángel, inʉm: —Mi'n e'p. Mit tʉn-is̈ tu'c yʉgʉjcawa̱yu, mit jeme iguitucu'tway ijtʉu tu'c balanza icʉ'ni'c.

⁶Mit tʉnmarau icojts tu'c mam itsʉ̱nga ayé mactas̈p ángejlat, inʉm: —Itáj tu'c yu' mʉgʉcway, diez pesos pa tu'c kilu trigu, mit diez pesos pa tu̱gup kilu cebada, po moyga laj ma it aceite de olivu mit vinu.

⁷Cuandu igui-awa̱jts imumactas̈pay sellu, tʉnmarau ni'c cotsp ayé imumactas̈pay ángel, mit inʉm: —Mi'n e'p.

⁸Mit tʉn-is̈ tu'c cawa̱yu jeme pu'tsputsway, mit jeme iguitucu'tway inʉ'jy Anima ni'c i-ago'jcʉs̈p jayajwat, mit iguinatspoguiu ayé jeme iguarda̱tcʉs̈pay á̱nimajat cʉtʉm. Mit imoygau derechu pa iguidomina̱tcawa'n tu'c cuarta parte ayʉ̱́j mundu, mit iwatcáj tu'c tsuguin mit o'jcáj jayajwat mit yu', mit tu'ngʉjʉ̱́j pa i-o'jcawa'n, mit igui-ago'jcáj aníma̱jtat ma̱jlatway.

⁹Cuandu igui-awa̱jts imucincuway sellu, tʉn-is̈ tu'c lugar mam isacrifica̱tca, mit tʉn-is̈cʉs̈au jem i-espíritujat ayé jayajwat jeme i-ago'jcaway ni'c icupʉjcau lo que inʉmway Dios, mit ni'c cotstacyo'ygau pa je'.

¹⁰Mit cotscau mʉgʉc, inʉmgau: —Señor, mi̱ mitsʉ̱nap limpiu mit incumplia̱tp nu'pʉjʉn. ¿Hasta jutim is̈juzga̱tcʉs̈wa'n jayajwat jeme tsʉ̱ngapay na̱s̈ni'c? ¿Hasta jutim is̈venga̱tcʉs̈wa'n ni'c ʉjtsat tʉs̈ago'jcau?

¹¹Mit icutigatscau mit po'pjamuc, mit inʉmgajau ni'c ma po'cs̈ca jas̈ʉ̱n hasta tega-o'jcap japu̱t hermanujat jeme iservia̱tcajapay Cristu, ni'c je'jat o'jcámpey as̈amu je'jat.

¹²Tʉn-is̈ cuandu igui-awa̱jts imuseisway sellu, mit nas̈ tu'c us̈ mʉgʉcway, mit s̈ʉwáy jat chi'ch as̈am tu'c yʉgʉcjamuc, mit po'wáy jat as̈am nipin.

¹³Mit ma̱tswájat tsajpni'cway ca'ugau na̱s̈ni'c, as̈am tu'c nojcujy icuca'u itʉjm cuandu iguicus̈ujip tu'c s̈e'm mʉgʉcway.

¹⁴Mit i-is̈togoygau tsajp as̈am tu'c noc sadatsicway, mit nu'pʉjʉn copac na̱s̈ni'cway mit nu'pʉjʉn copac-ajw nʉ'jugumay itigatscau ilajat.

¹⁵Mit rejyat na̱s̈ni'cway, mʉjayajwat, ricujat, capitájnat, jeme itcʉjʉpay poder, mit nu'pʉjʉn mozojat mit jeme yo'ygapay libre, niguyu'tscʉjʉu cʉtni'jcat mit tsa'cʉtʉjmat itpay copacni'jcat.

¹⁶Mit ayé jayajwat imucotscau copajcat mit tsa'jat ma iguituca'ugac mit ma iguicuyu'tscac, ni'c pʉ̱tcau igui-e'pcawa'n Dios jeme tsʉ̱napay itrononi'c, mit ipʉ̱tcau ma iguigacastiga̱tcac mʉgʉc ayé borreguwáy Jesucristu.

¹⁷Ni'c coyway ayé mʉjway s̈ʉjw pa Dios ijuzga̱twa'n, ¿mit pʉn oyáj iguimajmo' ayé?