Read Sayula Popoluca El Apocalipsis 7 Bible Online

El Apocalipsis 7 - Sayula Popoluca bible

El Apocalipsis 7

¹Mit cʉs̈ tʉn-is̈ mactas̈p ángejlat, mit je'jat tenagap cada esquina en ayʉ̱́j mundu, mit itentsougap ayé mactas̈p s̈e'jmat na̱s̈ni'cway pa magas̈ujca na̱s̈ni'c ne lama̱tni'c ne maga-ajca'uga tu'c cujy.

²Mit tʉn-ís̈ey jatu'c ángel, mit je' cu't mam ipichin s̈ʉjw, mit je' imuyo'jyau imarca ayé Dios jeme tsʉ̱napay pa siempre. Ayé marca inʉmo'jcʉp ni'c je'jat Dios ijayajwat. Ayé ángel imucotscʉs̈ mʉgʉc ayé mactas̈p ángejlat, ni'c je'jat imoygau poder ma watca dañu na̱s̈ni'c mit lama̱tni'c.

³Mit inʉmgʉs̈au: —Camniwatca dañu na̱s̈ni'c, ne lama̱tni'c, ne cuyni'jcat. Mojyʉ'jcac laj tʉmarcá̱tca iwimpacni'jcat ayé jayajwat iservia̱tcajapay Dios.

⁴Mit tʉnmarau pʉjʉjnat imarca̱tcámpay. Imarca̱tcau ciento cuarenta y cuatro mil jayajwat, nu'pʉjʉn Israelway jayajwat ifamiliajat.

⁵Imarca̱tcau iwimpacni'jcat doce mil jayajwat jeme pichingaway Judá ifamiliani'c. Imarca̱tcau doce mil jayajwat jeme pichingaway Rubén ifamiliani'c. Imarca̱tcau doce mil jayajwat jeme pichingaway Gad ifamiliani'c.

⁶Imarca̱tcau doce mil jayajwat jeme pichingaway Aser ifamiliani'c. Imarca̱tcau doce mil jayajwat jeme pichingaway Neftalí ifamiliani'c. Imarca̱tcau doce mil jayajwat jeme pichingaway Manasés ifamiliani'c.

⁷Imarca̱tcau doce mil jayajwat jeme pichingaway Simeón ifamiliani'c. Imarca̱tcau doce mil jayajwat jeme pichingaway Leví ifamiliani'c. Imarca̱tcau doce mil jayajwat jeme pichingaway Isacar ifamiliani'c.

⁸Imarca̱tcau doce mil jayajwat jeme pichingaway Zabulón ifamiliani'c. Imarca̱tcau doce mil jayajwat jeme pichingaway José ifamiliani'c, mit imarca̱tcau doce mil jayajwat jeme pichingaway Benjamín ifamiliani'c.

⁹Mit cʉs̈ tʉn-is̈ mayo'c jayajwat mit nepʉn ca-oyawu iguimaycupa̱ti. It jayajwat de nu'pʉjʉn na̱s̈at, nu'pʉjʉn grupu de jayajwat, nu'pʉjʉn nʉ'jcopajcat mit nu'pʉjʉn cotscapay jatu'c ajwat. Mit je'jat tsʉ̱ngau mam Dios imanda̱t itrononi'c, mit mam itsʉ̱na ayé borreguwáy Jesucristu. Mit nu'pʉjʉn je'jat cutigatsijcat mit po'pjamuc, mit imuyo'ygau tu̱ts-ajy icʉ'ni'jcat ni'c imʉjninʉmgau Cristu.

¹⁰Mit cotscau mʉgʉc, inʉmgau: Dios tsʉ̱nap itrononi'c, mit je' mit ayé borreguwáy Jesucristu nas̈salva̱tcau.

¹¹Mit nu'pʉjʉn ángejlat tenagau mam Dios itsʉ̱na itrononi'c, mit mam itsʉ̱nga na'waywájat mit we'ney mam itsʉ̱nga ayé mactas̈p ángejlat. Mit nicos̈atenda̱jcʉjʉu mam i-it ayé trono, mit i-adora̱tcau Dios.

¹²Mit inʉmgau: Namʉjninʉ́mga Dios pa nu'pʉjʉn tiempu. Na-oyninʉ́mga je' mit nanʉ́mga ni'c je' oymanac, mit nanʉmí̱jcaja ni'ctiyu̱s̈ ni'c je' ijawip nu'pʉjʉn mit ijtʉp nu'pʉjʉn poder. We'n ma jat.

¹³Mit cʉs̈ tu'c de ayé na'waywájat tʉs̈mucots, inʉm: —¿Is̈jawiga pʉjnat ayé jayajwat cutigatsijcatway mit po'pjamuc, mit jʉm imíngaj?

¹⁴Mit tʉnyʉjmau: —Señor, mi̱ más injawip. Mit je' tʉs̈nʉjmau: —Ayʉ̱́jat itunas̈o'jcau na̱s̈ni'c mit jinap mingau pa yam. Mit jinap nilimpia̱tcʉjʉu as̈am putsijcatway ijamujcat, mit limpiu itajn ni'c ayé borreguwáy Jesucristu o'c cunu̱s̈ni'c pa iguichi'tcajáj ima̱jlat.

¹⁵Jemni'c je'jat tsʉ̱ngap mam Dios imanda̱t itrononi'c, mit iservia̱tcajap je' tsu'm mit s̈ʉ̱m je' itempluni'c. Mit Dios jeme tsʉ̱napay itrononi'c iguicuida̱tcáj.

¹⁶Mit je'jat cajacayo'jcʉjʉ̱́j ne cajanʉ-u̱go'jcʉjʉ̱́j, mit ne s̈ʉjw iguigajano'jcáj, mit ne catoygáj.

¹⁷Ni'c ayé borreguwáy Jesucristu jeme tsʉ̱napay mam Dios imanda̱t itrononi'c, je' icuida̱tcʉs̈áj, mit je' iwejnu'pcʉs̈áj pa mam imu'twa'n nʉ' jeme iyacpay vida. Mit Dios icupo'tcʉs̈á̱j iwinʉ'jat mit cajajʉygáj.